Xa vai moito tempo que dende a CIG vimos denunciando como a Xunta precariza o traballo do seu persoal e trata con total desleixo os servizo públicos, sen parecerlle importar o máis mínimo xa non a saúde do seu persoal senón a calidade do servizos prestados e a eficacia na xestión. Máis o que estamos a ver nestes últimos días supera o inimaxinable e lle debería de sacar as cores a máis de un/unha que se fachenda de bo/a xestor/a.

Dous son os casos que exemplifican á perfección este proceder temerario, rácano e ruín:

O caso do IES San Paio de Tui. Logo do desafortunado pasamento dun dos tres subalternos cos que conta o centro, a Xunta decide amortizar esta praza deixando un IES con 624 alumnos/as con quenda de mañá e tarde, isto é de 8.30 a 22.30 horas, ao dispor tamén dunha Escola Oficial de Idiomas. Se ata o de agora e xa dende a implantación desta EOI, fai máis de 14 anos, o centro contaba con 3 conserxes agora pretenden, aproveitando o falecemento do compañeiro, roubarlles persoal. Sí decímolo ben alto, isto é un atraco!!! porque, como entón se debería de chamar ao incumprimento flagrante dos rateos aprobados polo normativa legal?

Por outro lado facemos constar o caso, tamén sangrante, do IES Pedras Rubias de Salceda de Caselas. Fai xa máis de medio ano, o conselleiro de Educación paseouse por varios xornais e televisións do país anunciando a máis que necesaria obra de ampliación do IES no que se investiu máis de 3 millóns de euros, construíndo un edificio anexo de máis de 1600 metros cadrados para dar cabida á implantación do bacharelato no concello, evitando o desprazamento do alumnado.

Dende a CIG sempre apoiamos o investimento no ensino público de Galiza, máis o que xa nos parece impresentable é que non se dote esta ampliación do persoal preciso para mantelo. O persoal de limpeza leva 6 meses facéndose cargo dos 1600 metros construídos sen que a Xunta fose quen de  apoiar e reforzar o seu traballo. Dende a consellería levan mareando a perdiz co compromiso de ampliación na RPT, máis o atraso deste proceso e a negativa a adoptar algunha medida provisional está tendo un impacto moi negativo no persoal, producindo situacións de esgotamento que desembocan en situacións de incapacidade temporal.

Logo a Xunta pregúntase por que Galiza ten, segundo eles, uns índices porcentuais de baixas entre o persoal máis altas que outras partes do Estado?, pois ao mellor non dotar dos medios necesarios para facer o traballo ten algo que ver con todo isto...