No verán do 2023, o director xeral de Defenda do Monte, por iluminación divina, sen negociación coa representación sindical do persoal, escolleu a dedo a un grupo de funcionarios/as públicos, da escala de axentes ambientais, para formar parte dunhas unidades segregadas chamadas UDEX (unidades de directores de extinción). Sería algo así como unha unidade de elite para dirixir grandes incendios forestais.

O que daquelas fora unha ocorrencia para uns postos que non existían na relación de postos de traballo, queren agora “regularizala”. A tal fin, decidiron enviar aos sindicatos a súa proposta, que consiste na creación de 6 postos coa forma de acceso de libre designación e concurso específico, de xeito que así poderá seguir cubrindo os postos coas persoas elixidas a dedo.

Estes postos ademais van estar localizados en servizos centrais. Sendo así, como é posible que teñan a capacidade para dirixir a extinción de grandes lumes cando non coñecerán o terreo?

A CIG rexeita a proposta de creación dos postos de UDEX cubertos por LD e por concurso especifico.