Sete meses despois do primeiro borrador, os sindicatos recibimos a segunda versión da proposta da convocatoria dos graos I, II e III da carreira profesional extraordinaria (carreira administrativa para o persoal funcionario e complemento de desempeño para o persoal laboral). Os textos veñen xa cociñados por Xunta e outros sindicatos, e con cambios tan importantes como substituír a palabra “proposta” por “borrador”, nada máis.

Por tanto, a convocatoria dos graos I, II e III da carreira profesional EXTRAORDINARIA, que tiña que estar negociada antes de rematar o ano 2024, continúa a ter os mesmos problemas que xa tiña en decembro.

Non debe existir prazo para as solicitudes

O recoñecemento dos graos debe producirse no momento en que a persoa empregada pública reúna os requisitos (de antigüidade, de horas de formación, etc.). É dicir, que o noso sistema de carreira debe ser aberto, sen agardar a que a Xunta teña a ben convocar. Sería como acontece cos trienios, que se cobran de xeito automático ao cumprir os anos; ou tomando como exemplo a carreira profesional do persoal docente, os sexenios, que se cobran a instancia de parte.

Isto ten que ser así para que non nos atopemos, por exemplo, con casos de compañeiras/os que ao ter só 16 anos e 11 meses non poidan acceder ao grao III ata dentro de 3 ou 4 anos. E o mesmo sucede co resto dos graos.

E tamén para evitar que quen accedeu a un grao en xaneiro de 2024 vexa limitado o acceso ao grao seguinte.

Non hai que esixir estar en activo nunha data

Manter o requisito de estar activo nunha data (31/12/2024) é tamén unha eiva xa que o único que busca é excluír ao persoal que por diversas causas non estaba traballando nesa data exacta (invalidez provisional con reincorporacion, cesar dun posto ocupado como interino/a, etc.). Si atenden á nosa primeira alegación (sistema aberto, sen prazos) deixa de ter sentido.

Acceso a todos os graos da carreira

No SERGAS, onde se implantou un sistema de carreira similar, o persoal xa cobra o grao IV. Entendemos que, por ser extraordinario este sistema, se debe DAR ACCESO A TODOS OS GRAOS de xeito simultáneo e non consecutivos, como propón a Xunta, para compensar o atraso e discriminación que a mesma Administración realiza co seu persoal.

Calquera persoa que cumpra os requisitos para acceder a máis dun grao, fundamentalmente os anos de servizo, debe poder acceder a eles simultaneamente. Isto non só para acceder agora aos graos III e IV, senón para aqueles compañeiros e compañeiras a quen se lles limitou o acceso aos graos I e II.

Se a finalidade do sistema extraordinario é que o persoal con bastante tempo traballado poida acceder ao grao que lle corresponda en consonancia cos servizos prestados, este modelo que deseña a Xunta leva a que o persoal se xubile sen poder acceder a todos os graos.

Ao mesmo tempo con isto se paliaría o castigo ao persoal interino e temporal aos que se lles negou en 2019 o acceso á carreira profesional.

Andamos escasiños de cartos para financiar a carreira?

Dende 2020 os Orzamentos da Comunidade medraron nun 38%. O capítulo de persoal só un 27%.

Se presumen de que temos os maiores Orzamentos da historia, ao redor de 14.000 millóns de euros, case un 38% máis que hai 5 anos, non se pode entender que o capítulo de persoal medre só nun 27%. Tería que incrementarse en 400 millóns para acompasar o seu crecemento ao dos Orzamentos. E iso valería para financiar, dende o grao III ao grao XXXIII.

Fenda salarial

Manteñen os importes previstos nos acordos de Xunta con CCOO, UGT e CSIF, de xeito que o subgrupo superior (2.773,44 €/ano no 2024) cobrará máis do triplo do subgrupo inferior, agrupación profesional (858,48 €/ano no 2024).

A Lei 30/1984 establece que o soldo dos funcionarios do grupo A non poida exceder en máis de tres veces o soldo dos funcionarios do grupo E. Se ben é certo que isto fai referencia ao soldo, a filosofía e o espírito da norma parecen claros ao establecer unhas limitacións para NON INCREMENTAR A FENDA SALARIAL entre grupos. E tamén hai que lembrar que os sexenios do profesorado se establecen con contías iguais independentemente do subgrupo ao que se pertenza.

Desta forma, a CIG defende un incremento acaido dos importes inferiores para minorar a fenda retributiva.

Reinicio da carreira nun novo subgrupo

O persoal que acceda a outro grupo ou subgrupo deberá reiniciar a carreira recoñecéndoselle e actualizándoselle as contías ás do novo grupo ou subgrupo, cando este sexa superior. O importe dos graos debe percibirse na contía do subgrupo onde se prestan servizos. Ao igual que outros complementos débense actualizar co cambio de situación.

Cómputo da antigüidade

Para o cómputo da antigüidade bastaría con ter en conta os certificados de servizos prestados a efectos de trienios. Si a unha persoa se lle recoñece o tempo de traballo prestado para un concepto retributivo debería servir tamén para acreditar a antigüidade a efectos da carreira. Deste xeito se suprimirían as exclusións expresas e tácitas do texto.

Formación

Establecen os seguintes requisitos de formación segundo os graos:

• Grao I: 40 horas
• Grao II: 80 horas
• Grao III: 180 horas

Non podemos aceptar estes requisitos mentres non se dea acceso á formación a todo o persoal que o solicite e mentres non se recolla a nosa demanda de non existir prazo aberto para as solicitudes.

Deste xeito, a quen non cumpra agora pero se lle dea acceso á formación poderá solicitala en canto cumpra o requisito sen ter que esperar anos ata que abran un novo prazo. E a EGAP debería habilitar de urxencia formación para garantir unha oferta suficiente e de calidade para que quen queira acceder a ela poida facelo xa.

Vai rematar a chantaxe da funcionarización?

Non pode ser que a Xunta siga mantendo a privación do dereito á carreira como sanción ante a negativa á funcionarización do persoal laboral fixo que quere seguir mantendo o seu vínculo laboral.

Solicitamos que se lles restitúa a carreira no grao que corresponda, se permita acceder aos novos graos segundo o sistema aberto proposto pola CIG, e se lles abonen os atrasos derivados da suspensión ás persoas que optaron por non funcionarizarse.

Tramos dos efectos económicos

Fraccionar a carreira non é boa idea, sobre todo porque significa adiar aínda máis o acceso pleno a un sistema limitado de carreira profesional. Si seguimos por esta senda imos atoparnos que para cobrar plenamente o ºgrao IV con todos os efectos teríamos que esperar probablemente ata o 2031, e compañeiras/os que comezaron no 2019 no sistema “extraordinario” con 53 anos, por poñer un exemplo, xamais chegarán a cobrar grao IV enteiro. Isto demostra que o sistema, de extraordinario nada ten.

A proposta da Xunta é a seguinte:

Por iso dende a CIG esiximos que non existan tramos, e a carreira se faga efectiva na súa totalidade dende o momento en que se solicite, co 100%.

Rematar coas exclusións

Non se nos escapa que o obxectivo da Administración e excluír ao máximo persoal posible da carreira. Fixérono co persoal interino ata que tiveron que incluílo tras a demanda gañada pola CIG, e o mesmo pasou cando intentaron deixar fora a antigüidade noutras administracións. Pero continúan excluíndo a unha parte importante do persoal como o dalgúns entes e axencias etc. Solicitamos que lles apliquen a carreira subsidiariamente mentres non teñan unha propia.

Estamos ante unha nova oportunidade para darlle a volta a un sistema de carreira que non cumpre as expectativas da maior parte das persoas empregadas públicas. Solicitamos que a Xunta atenda as demandas do persoal, cun novo modelo de carreira extraordinaria máis equilibrado e áxil.