O pasado 10 de xuño, a Axencia Galega de Infraestruturas (AXI) publicou na páxina de Contratos Públicos de Galiza a documentación relativa á contratación da conservación ordinaria e vialidade invernal das estradas dependentes da Xunta de Galicia. Nos pregos desta licitación figuran os requisitos e tipo de persoal con dedicación exclusiva que deben contratar as empresas adxudicatarias do contrato.

A vixilancia de conservación xa ven sendo realizada dende fai anos polas empresas adxudicatarias. Porén, nestes novos pregos técnicos entre as condicións para Coruña Norte e Coruña Sur, aparecen catro contratos denominados expresamente como “vixilantes de explotación” (2 para cada zona). No resto das zonas non aparecen este tipo de vixilantes.

A vixilancia do estado de conservación e explotación dos elementos que integran o dominio público viario, das obras dirixidas pola Axencia Galega de Infraestruturas ou obras realizadas por terceiros, son funcións propias da escala de axentes de inspección, especialidade de vixilancia de estradas, segundo indica a Lei de emprego público de Galiza, quenes teñen a condición de axentes da autoridade segundo a Lei 8/2013 de estradas de Galiza.

A privatización encuberta das funcións de vixilancia e inspección supón unha vulneración flagrante do marco legal vixente, ademais de implicar unha perda de garantías para a cidadanía e unha desvalorización inxustificada do emprego público. A CIG dirixiu escrito á Consellería de Vivenda e Planificación de Infraestruturas Públicas, así como á Axencia Galega de Infraestrutura, no que lle esiximos o cumprimento estrito da lexislación e a defensa do carácter público das funcións que implican autoridade administrativa.