Nesta xuntanza do 10 de xullo da Comisión de Persoal tratamos a situación caótica dos actos de elección de destino. O propósito da CIG é trasladarmos información completa e transparente e que se negocie, algo que botamos en falla. A modificación da resolución da elección de destino das escalas sociosanitarias (DOG do 13 de xullo) incluirá a eliminación de persoas falecidas e xubiladas e a adición de máis postos para códigos de dobre titulación e para persoal pedagogo. É posible que o luns 13 de xullo saia a elección de destino de infantil e persoal coidador.

A situación está sendo caótica, tendo en conta que é o maior movemento de persoal que se pode dar, debido a todos os procesos selectivos en marcha. Consideramos que estes espazos de negociación deberían ser un lugar de traballo e, por suposto, de negociación, e botámolo en falla. 

O propósito da CIG, nestas mesas, é poder sumar e trasladar información completa e transparente ao saír da xuntanza, que conleve que os traballadores e traballadoras comprendan que o que aquí se trata coa representación das persoas traballadoras é produtivo. 

Porén, publicación tras publicación no DOG, as últimas semanas están sendo un desastre recoñecido pola propia Administración, que ten que publicar correccións por cuestións de moito calado.

Vacantes que non saen nas eleccións de destino

O feito de que as caixas de postos se creen de cero, sen ter en conta o mapa total de vacantes que pasaron polos concursos de traslados, está sendo desolador entre as persoas traballadoras, que non entenden a que atende esta motivación de deixar tanta vacante atrás. Non ten explicación que se unha vacante pasou polo concurso de traslados, non pase polo acto de elección de destino.

É unha mágoa que o que tería que ser un acto satisfactorio, após aprobar un proceso selectivo, se converta nun calvario.

Escalas sociosanitarias: modificación da resolución de elección de destino o 13 de xullo

O luns publicarase no DOG unha modificación da resolución do 3 de xullo sobre o acto de elección de destino das escalas sociosanitarias. A DXEP di que farán modificacións —ao eliminar persoas que non poden elixir destinos (falecidas, xubiladas…)- e engadirán máis postos, tanto no caso daqueles códigos que teñan dobre titulación, como tamén postos que non exixan o requisito de carné de conducir no caso do persoal pedagogo.

Infantil e persoal coidador: publicación o 13 de xullo da elección de destino?

Canto a infantil e persoal coidador, a DXEP indicou en varias ocasións que o acto de elección de destino sería a primera quincena, así que lle solicitamos a data concreta de publicación no DOG, e a información que nos traslada é que «a ver» se sae este luns 13 de xullo. Coma sempre a directora é un libro aberto!