A CIG reclama avaliacións de riscos para todo o persoal axente ambiental e garda de recursos naturais en base as novas directrices do INSST

Nestes días estamos a solicitar á Xunta a elaboración de novas avaliacións de riscos laborais adaptadas á Lei 4/2024, básica de axentes forestais e medioambientais, e ás novas directrices do Instituto Nacional de Seguridade e Saúde no Traballo, publicadas neste mes de xuño.

As solicitudes diríxense aos distintos departamentos nos que existen postos destas escalas:

• Consellería de Medio Ambiente e Cambio Climático: persoal da Dirección Xeral de Patrimonio Natural. Incluímos aquí tamén a gardería dos recursos naturais pola similitude dos riscos e por estar comprendidos no ámbito da lei en razón das funcións que poden desenvolver.
  
  
• Consellería do Medio Rural: persoal dependente dos distritos forestais, da DXDM e do AGACAL.
  
  
• Consellería de Economía e Industria: postos dependentes do XERA, no CIF de Lourizán.
  
  

As avaliacións existentes, que teñen importantes carencias, deben ser substituídas por estudos adaptados ás funcións e ás condicións reais de cada ámbito.

As novas avaliacións das tarefas de campo son independentes dos centros de traballo e deben analizar os riscos específicos da actividade, a organización do servizo, os medios empregados, o traballo en solitario, os riscos psicosociais e as situacións de conflito ou emerxencia. Pero non valen unhas avaliacións xenéricas para todos/as, senón que deben analizar as diferentes condicións, ter en conta cando se desenvolve o traballo nunha zona de costa ou no macizo central, unha granxa intensiva ou en extensivo, unha inspección dentro de instalacións ou no río, etc.

Agora xa non o di só a CIG: tamén o establece a normativa. A Xunta terá que poñerse as pilas, avaliar correctamente os riscos e protexer de maneira efectiva o seu persoal.

A norma xa di especificamente que as novas avaliacións deberán realizarse coa participación do persoal afectado e da representación preventiva e incorporar transversalmente a perspectiva de xénero. Isto inclúe a adecuación da uniformidade e dos EPI, os riscos ergonómicos, as condicións hixiénicas e as desigualdades na exposición e nos efectos sobre a saúde e non se poden quedar so nas cuestións de maternidade.

Tamén deberán analizar os riscos para a seguridade derivados das actuacións con persoas armadas ou potencialmente agresivas, das situacións de illamento e da prestación de servizos en lugares afastados ou con dificultades de comunicación, e analizar obrigatoriamente os riscos psicosociais. Tampouco lles vale derivar a un futuro protocolo que ao final nunca se fai.

Esta é unha cuestión que a CIG xa trasladou durante a tramitación da Lei básica, cando demandamos estudos específicos de riscos e de vixilancia da saúde, unha planificación preventiva adecuada e unha protección efectiva desde a perspectiva de xénero. Lembramos que a necesidade desta lei naceu logo do asasinato a queimarroupa de dous compañeiros en Cataluña no 2017, e as agresións, insultos e vexacións seguen sendo frecuentes nestes funcionarios/as. Case dez anos despois seguimos loitando para que a lei sexa útil e que non quede en simples declaracións de intencións ou en papel mollado, conseguímolo coa xubilación anticipada, agora toca a prevención.