Novas por contido

Hidratación, avituallamento e medios de apoio

A CIG solicita á Consellería do Medio Rural medidas preventivas para garantir a seguridade e a saúde do persoal que permanece longos períodos fóra da base durante episodios de calor.

A SITUACIÓN

Coas vagas de calor que estamos sufrindo, o persoal do SPIF está sometido a un estrés térmico engadido ao propio estrés térmico da súa actividade. É preciso establecer medidas preventivas nas vagas de calor para evitar os riscos asociados a altas temperaturas e radiación solar elevada.

Durante as quendas de traballo, o persoal do SPIF pode permanecer durante longos períodos fóra da base, en desprazamentos, labores de vixilancia e prevención, intervencións ou dispoñibilidade operativa.

Cando os equipos están integrados por máis de catro persoas, o espazo dispoñible no vehículo e nos medios asignados resulta insuficiente para transportar axeitadamente neveiras portátiles, acumuladores de frío, auga fresca, bebidas e alimentos básicos para toda a quenda.

Esta carencia dificulta garantir unha hidratación suficiente e unhas condicións mínimas de recuperación, sobre todo con temperaturas elevadas, avisos meteorolóxicos ou traballos en zonas afastadas da base e sen acceso inmediato a puntos de subministración.

Ademais da auga fresca, nas xornadas prolongadas con calor e actividade física pode ser necesario dispor dun avituallamento básico de apoio.

A CIG SOLICITA

1. Incluír esta situación na avaliación de riscos laborais das quendas do SPIF durante os períodos de altas temperaturas.

2. Adoptar medidas organizativas e materiais que garantan a dispoñibilidade de auga fresca durante toda a quenda cando deban permanecer afastados da base.

3. Facilitar neveiras portátiles ou bolsas isotérmicas, acumuladores de frío, auga fresca, avituallamento básico e os medios necesarios para conservar estes produtos.

4. Establecer instrucións claras, nos días de especial risco, sobre hidratación, pausas, reposición de auga e alimentos, organización das tarefas e demais medidas preventivas.

5. Habilitar puntos de avituallamento ou reposición durante a xornada cando o persoal non poida regresar á base ou careza de medios suficientes.

6. Autorizar a utilización dun vehículo de apoio cando o equipo estea formado por máis de catro compoñentes, para transportar con seguridade o persoal, a auga, o avituallamento e o material necesario.

PREVIR A CALOR É PROTEXER AO PERSOAL E A PRESTACIÓN DO SERVIZO

Outras novas recentes

Xoves, 19 Novembro 2026

Oposicións acceso libre: corpos superior, xestión, administrativo, auxiliar; escala FOL; enquisador, (para 24/11/26)

A Dirección Xeral de Emprego Público e Administración de Persoal convocou Mesa Xeral e Mesa Sectorial para discutir as bases das convocatorias dos seguintes procesos selectivos. Se é do teu interese, podes contactar coa CIG: Corpo superior-A1. Acceso libre. 60 prazas. Oposición. Descargar Corpo de xestión-A2. Acceso libre. 57 prazas. Oposición. Descargar Corpo...
Mércores, 18 Novembro 2026

RPT do Mar (centros de ensino) (26/11/26)

A Secretaría Xeral do Mar convocounos a unha xuntanza para o xoves 26 de novembro, para tratar unha proposta de modificación da súa Relación de Postos de Traballo. A proposta afecta ás escolas oficiais nautico-pesqueira de Ferrol e Ribeira, ao instituto en acuicultura da Illa de Arousa e ao instituto marítimo-pesqueiro do Atlántico de Vigo. En todos eles crean postos de...
Venres, 13 Novembro 2026

Agacal, Gain e Intecmar quedan para a seguinte OEP de funcionarización

A directora xeral de Emprego Público comunicounos na Mesa Xeral do 10 de novembro de 2026 que o persoal de AGACAL, GAIN e INTECMAR quedará para a seguinte OEP de funcionarización (para a cal non teñen data) porque aínda non está integrado. A integración é un requisito previo para que o persoal que o desexe poida funcionarizarse. Sen convocatoria á CIG para as negociacións...