- Detalles
Na Comisión de Persoal do martes 13/12/2011, a CIG-Autonómica vén de demandar á Dirección Xeral da Función Pública aclaracións sobre as repercusións para os empregados públicos do novo Decreto 218/2011, de certificación de competencias dixitais.
Este decreto, publicado no DOG do 30/11/2011, e aprobado sen negociación coas organizacións sindicais, vén a introducir unha nova certificación que pode ser esixida como mérito ou como requisito de participación en procesos de provisión de postos (concursos de traslados) e de selección de persoal (promoción interna e acceso á función pública), o que significa que terá importantes efectos no futuro para o desenvolvemento profesional de todos os empregados públicos da Xunta de Galicia.
- Detalles
No DOG de 05/12/2011 publícase a Resolución do 1 de decembro de 2011 pola que se convocan as probas de avaliación de carácter libre das actividades formativas que compoñen o Plan formativo ofimático de Galicia para o persoal ao servizo da Administración pública da Comunidade Autónoma de Galicia.
Poderán participar nas probas convocadas por esta resolución os empregados públicos e as empregadas públicas destinados na Administración pública da Comunidade Autónoma de Galicia que se atopan en situación de servizo activo ou excedencia polo coidado dun fillo ou dun familiar e que reúnan os requisitos establecidos na presente convocatoria. Está exceptuado o persoal docente da Consellería de Educación e Ordenación Universitaria e o persoal sanitario, sempre que non desempeñen postos na Administración xeral.
- Detalles
No DOG nº 229 do 30/11/2011, vén de se publicar o Decreto 218/2011, do 17 de novembro, polo que se regula a certificación galega de competencias dixitais en ofimática.
Este decreto, que foi aprobado sen previa negociación coas organizacións sindicais, regula os requisitos para a obtención da certificación de competencias dixitais en ofimática.
No artigo 4 do decreto, disponse que a dita certificación "poderase valorar como mérito ou establecer como requisito de participación nos procesos de provisión de postos de traballo ou de selección de persoal e como base obxectiva para a promoción profesional, nos termos que estableza a normativa reguladora da función pública da Xunta de Galicia".
Isto podería ter consecuencias para o persoal subalterno que participe en procesos de promoción interna para subgrupo C2, pero tamén para calquera proceso de provisión de postos ou proceso selectivo no que se establecese a dita certificación como requisito de participación.
- Detalles
A web da EGAP é de sobra coñecida polos seus "ansiados" temarios que saen tarde, mal e arrastro, agora tamén polo atraso engadido das edicións en galego e inzadas estas de erros. Desde fai uns meses a falta de actualización da plataforma "on-line" converteuse tamén noutra das deficiencias desta escola.
A CIG-Autonómica vén de formular queixa e reclamar que se adopten medidas urxentes para resolver estes asuntos que se producen con demasiada e reiterada frecuencia na EGAP.
- Detalles
Na Mesa Xeral do 29 de xullo, e tras ser retirada a RPT de Traballo e Benestar, quedou como único da orde do día a modificación da RPT Santiago Apostol. Un proxecto que define pola desaparición deste centro de atención especializada e a creación do almacén de persoas discapacitadas C.A.P.D. Coruña.
Desde a CIG criticamos moi duramente que se peche un centro referente na comarca educativa e socialmente e se cree un almacén de discapacitados amortizando as prazas de persoal educativo (8 prazas de educadores). Este tipo de política social desenvolvida pola Consellaría de Traballo e Benestar vai na liña de hai moitos anos atrás na que había reformatorios, asilos, colexios de subnormales, e coma neste caso, almacens de desfavorecidos. Tamén criticamos a ausencia da secretaria xeral Cristina Ortiz, que non considera de suficiente importancia este asunto.
- Detalles
No DOG do 13/05/2011 faise pública a convocatoria da EGAP do 2º semestre do 2011 dos cursos de formación contínua para o persoal ao servizo da Administración pública da Comunidade Autónoma de Galicia. As solicitudes realizarase vía telemática na páxina web da EGAP: http://egap.xunta.es. O prazo de presentación de solicitudes rematará ás 14.00h do 23 de maio de 2011.
Podedes consultar o listado de cursos ofertados e as condicións da convocatoria na seguinte ligazón.
Máis información: 981 54 62 46, 981 54 62 57 ou xestion.egap@xunta.es
- Detalles
Ao abordaxe dos Servizos Sociais públicos botándolle un cabo á iniciativa privada.
Nestes últimos días, tanto o presidente da Xunta, Alberto Núñez Feijoo, funcionario descastado, como a conselleira de Traballo, Beatriz Mato, hooligan da política de privatizacións na Xunta, veñen de facer declaracións aos medios na liña de desacreditar o traballo dos/as empregados/as públicos/as, os servizos públicos que se prestan a través da Administración da Xunta en xeral e da Consellaría de Traballo en particular, a eficiencia dos mesmos e a necesidade de tomar unha serie de medidas para corrixir esa situación de “desmadre”.
- Detalles
No DOG do 19 de abril convócanse varias edicións dun curso de conducción de vehículos autobomba para persoal dos servizos de prevención e defensa contra incendios forestais. O curso terá unha duración de 9h e impartirase na Academia Galega de Seguridade sita no Concello de A Estrada en Pontevedra. Hai un total de 4 edicións con 20 prazas dispoñibles en cada unha.
As solicitudes faranse vía telemática a través da páxina web http://agasp.xunta.es. O prazo para a presentación de solicitudes será de 15 días naturais a partir do día seguinte ao da publicación desta resolución no Diario Oficial de Galicia
- Detalles
No DOG do 14 de abril convócanse varias edicións dun curso de conducción de vehículos todoterro para persoal dos servizos de prevención e defensa contra incendios forestais. O curso terá unha duración de 9h e impartirase na Academia Galega de Seguridade sita no Concello de A Estrada en Pontevedra. Hai un total de 8 edicións con 20 prazas dispoñibles en cada unha.
As solicitudes faranse vía telemática a través da seguinte ligazón. O prazo para a presentación de solicitudes será de 15 días naturais a partir do día seguinte ao da publicación desta resolución no Diario Oficial de Galicia
- Detalles
Logo da protesta da CIG-Autonómica o persoal sanitario da Xunta regulado pola lei 17/1989 poderá participar nas accións formativas da EGAP. O máis paradóxico é que a Escola de Formación do Sergas tampouco os viña considerando persoal propio e este colectivo ficaba en terra de ninguén en materia de formación por parte da Administración.
O 7 de abril o director xeral de Función Pública comunicounos que se asinou un convenio de colaboración entre a Fundación Pública Escola Galega de Administración Sanitaria (FEGAS) e a Escola Galega de Administración Pública (EGAP) para o Desenvolvemento de Actividades de Formación, Divulgación e Investigación, co obxecto de facilitar que os funcionarios da Lei 17/1989, de 23 de outubro de creación de escalas de persoal sanitario ao servizo da Comunidade Autónoma, poidan participar nos cursos da EGAP.
