O 22 de marzo houbo unha xuntanza entre sindicatos e consellería (acudiron o vicesecretario, a xefa de persoal, o subdirector do servizo e o xefe do servizo).
Segunda actividade
Referente ás prazas da segunda actividade, contemplada na Lei 2/2004 polo que se crea o Servizo de Gardacostas nos seus artigos 9º, 10º e 11º, din que cos recortes actuais non poden crear prazas novas polo que tras afirmar que o ven difícil, non se comprometen máis que a estudalo (fume, vamos).
A CIG entende que tiveron 12 anos para desenvolver a segunda actividade e chegamos a un punto en que debido ao incremento da media de idade no colectivo estanse a presentar xa casos de dificultade para facer o traballo con normalidade, especialmente as inspeccións no mar.
Réxime de prestación de servizos, horarios, vacacións, licenzas, permisos e compensacións económicas
Despois de solicitalo reiteradamente, falamos da comisión de seguimento da Orde do 2 de maio de 2006, pola que establece o réxime de prestación de servizos, horarios, vacacións, licenzas e permisos e compensacións económicas para percibir polo persoal do Servizo de Gardacostas de Galicia.
Dende a CIG expusemos que hai problemas cos cadrantes de horarios nalgunhas bases. As persoas representantes da Administración afirman que non teñen coñecemento de ningunha queixa, algo que desmente a CIG e así llo demostramos con papeis. Reafirmámonos na nosa intención de tratar o asunto coa máxima urxencia. A Administración comprométese a xuntar a comisión a primeiros de abril.
Regulamento de funcións
Segundo nos manifestan, teñen unha proposta de regulamento de funcións que nos enviarán proximamente. A CIG pregunta se é o mesmo que xa nos presentaran aos delegados e delegadas sindicais fai ano e medio e que rexeitamos, mesmo con sinaturas da maior parte dos traballadores e traballadoras. Afirman que efectivamente é o mesmo con "pequeñas cositas" (segundo o subdirector). Sendo así, estaremos en contra, polo que reclamamos variacións significativas.
Comité de prevención de riscos laborais
A CIG solicita a convocatoria do comité de prevención de riscos laborais por mor das avaliacións pendentes das embarcacións auxiliares. Respostan que convocarán a primeiros de abril.
