Agora agardan que o Conselleiro de Sanidade cumpra a súa palabra e convoque inmediatamente a mesa de negociación que ofreceu para resolver o conflito.

Os Farmacéuticos Inspectores de Saúde Pública, acordaron en asemblea, na tarde de onte, desconvocar a folga indefinida que mantiñan desde o 18 de maio, para iniciar a negociación, que ofreceu o Conselleiro de Sanidade.

Este acto de responsabilidade, dos Farmacéuticos Inspectores, debe ser correspondido por parte da Consellería de Sanidade, coa inmediata convocatoria da mesa de negociación coas organizacións sindicais, presentando unha proposta concreta que permita resolver as múltiples eivas que ten pendentes de resolver este corpo de funcionarios.

O corpo de Farmacéuticos Inspectores de Saúde Pública, fixera un xesto para canalizar este conflito por medio do diálogo desconvocando, desde o día 8 de xuño, tódolos actos de protesta e reivindicacións que tiñan previsto realizar, polo que agora con esta nova decisión non hai escusa para a Consellería de Sanidade de dilatar mais no tempo a negociación dun acordo xusto para ámbalas partes.