No día de onte confirmouse o rumor que viña circulando dende hai días entre os/as traballadores/as da Xunta de Galiza.
Na película de Stanley Kubrick, Sendeiros de Gloria, un xeneral incompetente e culpable de lanzar un ataque suicida a posicións enemigas, decide limpar a súa imaxe castigando a outros. A responsabilidade da masacre non a asume el senón que lla fai pagar a outros co fusilamento de tres soldados escollidos ao azar. Este comportamento é o que agora reproduce o noso xeneral Mireau, o director xeral da Función Pública José María Barreiro, mandando fusilar a subdirectora xeral de Provisión de Postos. Está claro que a subdirectora non é un soldado raso, tal vez unha comandante, pero a carga suicida ordenouna o xeneral Barreiro.
O cese da subdirectora xeral de Provisión de Postos e Selección de Persoal, Eduarda Varela Castro, é un acto miserable, e non polo cese en si, pois calquera subdirector/a pode ser cesado discrecionalmente, senón porque tras esta acción o que se pretende e evadir a responsabilidade que recae no titular do órgano directivo, o director xeral da Función Pública, José María Barreiro, como responsable dos escándalos producidos en varios procesos selectivos.
A falta de valentía e de decoro do director xeral da Función Pública e da Conselleira de Facenda, Marta Fernández, non ten parangón.
Hai que lembrar que esta subdirectora foi confirmada no seu posto polo actual director xeral, e que estando ela nese posto se chegaron a acordos positivos que afectan á Función Pública, como a negociación do Acordo de mellora de Emprego, o aumento de prazas para a promoción interna con temarios axustados ao obxectivo das probas, etc. tendo ademais un carácter aberto e receptivo que favorecía o diálogo social.
É certo que a subdirectora xeral ten a súa parte de responsabilidade nas disfuncións que se producen no acceso ao emprego público, pero a responsabilidade última é do director xeral e da Conselleira de Facenda, que non adoptaron as medidas necesarias para corrixir o acontecido nos procesos selectivos.
Hai que recordar que este director xeral de Función Pública estreouse no cargo eliminando parte do sistema de garantías que existía para o acceso ao emprego público:
- Impediu que un dos vogais do tribunal fose proposto pola parte social, como se viña facendo.
- Aumentou a presencia de persoas de designación política nos tribunais, persoas que lle deben o seu posto a que alguén as nomeou e que poden ser cesadas polo mesmo, configurándose así un modelo de tribunais políticos.
Tamén queremos denunciar a campaña indecente da Xunta no relativo ás Instruccións dos Tribunais, falseando o que nelas se dispón.
Nas Instruccións do 2007, que a CIG-Autonómica non considera axeitadas, xa están contempladas todas as causas de abstención e recusación, en especial no relativo a participación de familiares dos membros dos tribunais nos procesos selectivos, así como a imposibilidade de ser opositor e membro dun tribunal á vez se hai interese persoal nos dous procesos. Nesta semana a CIG-Autonómica fará pública a súa proposta de Instruccións dos Tribunais.
Cesar á subdirectora xeral implica, por decencia, a DIMISIÓN de quen a nomeou e de quen ten a responsabilidade última neste asunto.