Novas por contido

Postos que non saen a convocatoria pública e comisións de servizo que duran máis do tempo permitido. Consecuencia: despois de levar anos esperando por un concurso, atopámonos con que non saen todos os postos que deberían. A dificultade de garantir o cumprimento da normativa se atopa nunha aplicación de seguimento de comisións de servizo defectuosa e que o único xeito de controlar o estado dos diferentes postos é o testemuño das compañeiras e compañeiros.

A norma é clara: deben convocarse no vindeiro concurso todos os postos cuxa cobertura sexa necesaria, entendéndose como tal que estean ocupados en comisión de servizo ou por persoal interino. A miúdo aparecen misteriosas excepcións. No tema das comisións de servizo a normativa non é moi esixente, pero sí o é nos prazos: 6 meses como moito nos postos de LD e 1+1 ano no caso dos de concurso. O realmente difícil é chegar ao control do cumprimento desta normativa.

As comisións de servizo

Actualmente as organizacións sindicais temos unha ferramenta electrónica de consulta das diferentes comisións de servizo por data de pedimento á Función Pública. Desde esa data ata a concesión final poden pasar desde 4 días ata 2 meses ou máis. Porén, non existe o campo de tempo de duración, número de renovacións e tempo acumulado total. Tampouco funcionan os filtros para seleccionar as comisións por localidade, nivel ou consellaría. E desde logo, tampouco se poden imprimir ou exportar listados en arquivos aparte.

A CIG-Autonómica solicitou reiteradamente a mellora desta aplicación. Porén, parece ser que o director xeral de Función Pública non está pola labor da transparencia nin, por suposto, da publicidade do resultado das comisións de servizo. Desta volta, nos só nos insistimos na nosa solicitude presentada por rexistro o 7 de outubro, senón que facemos denuncia pública desta situación.

Postos vacantes ou non vacantes

Outro dos grandes misterios á hora de abordar un concurso é o estado dos postos. Desde vai anos, desapareceu das RPTs a súa cualificación de vacante / non vacante. En teoría se ía fornecer ás organizacións sindicais dunha ferramenta alternativa para poder ter acceso á situación de cada posto. Pasado o tempo sen que cambiase nada, a CIG-Autonómica solicita a posta a disposición dunha ferramenta para ter acceso á consulta do estado das prazas que figuran nas diferentes RPTs. E de xeito transitorio, a resposta ás múltiples solicitudes por escrito que levamos presentado.

Soan ecos desde fai tempo de vindeiros concursos de traslados (corpos especiais primeiro e xerais despois). En primeiro lugar, demandamos que as ditas convocatorias se realicen coa axilidade que marca a lei. En segundo lugar, solicitamos que antes de que se oferten o listado de postos dispoñibles, estean solucionados estes dous aspectos que hoxe denunciamos. Só deste xeito se garantirá o exercicio do dereito de mobilidade en igualdade de condicións para todo o persoal funcionario.

Outras novas recentes

Venres, 13 Novembro 2026

Agacal, Gain e Intecmar quedan para a seguinte OEP de funcionarización

A directora xeral de Emprego Público comunicounos na Mesa Xeral do 10 de novembro de 2026 que o persoal de AGACAL, GAIN e INTECMAR quedará para a seguinte OEP de funcionarización (para a cal non teñen data) porque aínda non está integrado. A integración é un requisito previo para que o persoal que o desexe poida funcionarizarse. Sen convocatoria á CIG para as negociacións...
Venres, 13 Novembro 2026

Promoción interna de corpos xerais; funcionarización en excedencia; finanzas-veterinarios/as-agacal-gain-intecmar (MSF e MX 10/11/26)

O martes 10, véspera da Folga Xeral, asistimos á Mesa Xeral e Mesa Sectorial de Persoal Funcionario, nas que se trataron as convocatorias de promoción interna a corpos xerais e dos procesos de funcionarización de persoal laboral fixo que está en excedencia. Na rolda aberta de intervencións a DXEP deu información da escala de finanzas, da repesca de funcionarización de...
Luns, 09 Novembro 2026

Dúbidas ante a folga xeral do 11 de novembro

Respostas ás preguntas máis frecuentes para que todas as persoas traballadoras poida facer valer os seus dereitos Desde a CIG tentamos responder ás principais dúbidas que xiran arredor da convocatoria de Folga Xeral do vindeiro 11 de Novembro para que todas as persoas traballadoras do país poidan facer valer os seus dereitos e secundar a mobilización con liberdade. 1. Cal...