Chegando a mediados de outubro estamos a padecer unha vaga de lumes propia dun caloroso verán e o Goberno da Galego o único que se lle ocorre é ocultar datos e ten a caradura de presentarse no Parlamento para dar como finalizada a campaña mentres Galiza arde.

Levamos tempo denunciando a falla de medios materiais e humanos e o desprezo que se mostrou pola profesionalidade dos traballadores do Servizo de Prevención e Defensa contra Incendios Forestais ao contratar persoal a mediados de xullo e despedilos aínda non rematado o mes de setembro. A realidade e que hoxe a provincia de Ourense esta a ser especialmente castigada pola barbarie incendiaria, arden centos de hectáreas,  e na páxina web da Xunta hai poucas novas ao respecto (Minimizando os lumes e negándose a dar datos de incendios de menos de 20 has).

Non será este sindicato o que pretenda sacar proveito da catástrofe que representan os incendios, pero o que non faremos tampouco será deixar de denunciar feitos gravísimos que contribúen a que a situación empeore.

DENUNCIAMOS:

1. O operativo anti-incendios está ao 40% do habitual no verán por diferentes razóns:
• A Xunta rescindiu centos e centos de contratos, tanto do persoal laboral do SPDCIF como da empresa pública SEAGA. Destacar especialmente o despedimento dos conductores de motobombas a 23-24 setembro contratados a mediados xullo pola Xunta de Galicia ( PLADIGA ).
• Non se cobren as baixas, permisos, vacacións... nin as vacantes (hai brigadas con só 2-3 persoas, cando o establecido son 5-7).
• No caso do persoal funcionario, Axentes forestais e Técnicos/as de Distrito, tampouco se cubren vacantes, permisos nin baixas de longa duración o que fai que haia escaseza neste persoal que dirixe os incendios forestais e traballa na súa coordinación dende os 19 Distritos Forestais.
2. Os Axentes Forestais non están en período de gardas (período extraordinario), polo que o persoal esta a ampliar as súas quendas moi por enriba do limite establecido na normativa, chegando a duplicar (14h continuadas) para atender o traballo na extinción dos incendios forestais. Destacar que no caso dos Axentes Forestais traballan cun Acordo de Condicións de Servizo, do 2004, que se demostra caduco e obsoleto e que a pesar das denuncias e solicitudes de negociación das organizacións sindicais a Xunta de Galicia non convocou unha soa xuntanza dende que entrou o PP no Goberno.
3. A Xunta oculta deliberadamente datos de incendios, tanto do número total como das dimensións dos mesmos (coma exemplo que na páxina web o luns non hai datos dos numerosos lumes do fin de semana, Cenlle, Castrelo de Miño, Monterrei, Montederramo…)
4. Os Distritos están sen persoal de vixilancia nas torretas durante toda a xornada polo que a detección dos lumes é máis tardía.
5. Aqueles camións autobombas que se avarían non son reparadas coa prontitude precisa e os que hai non traballan 24h pola falta de conductores a pesar da súa necesidade.
6. Dado que os medios propios non abondan, estanse a botar man diariamente do persoal voluntario de protección civil (112) os que  realizan prolongadas xornadas de traballo.
7. Estanse a utilizar masivamente os medios aéreos para compensar a perda de persoal de terra.
8. As BIIF (Brigadas de Investigación de Incendios Forestais) da Xunta de Galicia foron desmanteladas polo Goberno de Feijoo, cuestión amplamente denunciada dende CIG-Autonómica. A investigación dos indicios é a clave para a detención dos delincuentes incendiarios.
9. A seguridade e saúde dos traballadores do SPDCIF non esta garantida desde o momento que a Xunta nega as Avaliacións de Prevención de Riscos nin da formación en materia de seguridade como xa temos denunciado en numerosas ocasións.
10. O Indice de Risco Diario a día de hoxe, 10 de outubro, segundo páxina da Consellería de Medio Rural é de moi alto e extremo en todo o interior de Galicia e a Xunta de Galicia tiña datos da seca deste mes de outubro.

Todos estes feitos poñen de manifesto a total ineficacia da Xunta de Galicia, que tan só se encomendan ao cambio do tempo para combater o lume. Nunca tanto desprezo e inoperancia se ten posto de manifesto por parte de quen ten a responsabilidade na loita contra os incendios. Agora os traballadores e traballadoras da loita contra o lume estamos ao límite das nosas forzas, traballamos arreo e esiximos dignidade e respecto por parte da Consellería de Medio Rural.

Polo que dende a  CIG-Autonómica instamos á dimisión de Samuel Juarez, Conselleiro de Medio Rural, e esiximos  ao Presidente da Xunta a un trato respectuoso e responsable cos traballadores e traballadoras do SPDCIF. E que de a cara ante os cidadáns e explique por qué arde Galiza? Por que non se traballa na detención dos delincuentes incendiarios?