No último plenario da Xunta de Persoal, que tivo lugar o 5 de outubro, os principais acordos adoptados foron os seguintes:
Solicitar unha entrevista coa S.X. de Traballo e Benestar para que nos aclaren a negativa que se lle deu a un funcionario desa consellería pola súa solicitude de gozo do seu período vacacional. Este compañeiro estivo de baixa durante durante una ano e hai sentenzas que lle amparan no seu dereito. Así mesmo faranse as xestións pertinentes perante Función Pública para que se inclúa este dereito na normativa propia do persoal funcionario.
Nos informes que emita esta Xunta de Persoal con respecto ás flexibilizacións horarias incluirase una petición de copia da resolución posterior e unha indicación de que se informa favorablemente, xa que nalgún caso o departamento de persoal correspondente ten emitido algunha resolución desfavorable sen informar á Xunta de Persoal.
Solicitar unha reunión a Renfe para que nos informe sobre as frecuencias de horarios, prezos e descontos a grandes colectivos sobre as liñas con orixe na Coruña, Ourense, Vigo e Pontevedra e destino en Compostela. Posteriormente convocarase unha asemblea informativa para pór a disposición dos compañeiros e compañeiras interesadas nestas liñas de transporte esa información.
Solicitar unha xuntanza co concello de Santiago de Compostela para abordar diversas cuestións relacionadas co transporte urbano (chegada de liñas ao Monte Gaiás e transbordos coa tarxeta de bus da Xunta de Galicia) e cos problemas de aparcamento que hai no entorno de San Caetano.
Decidiuse por unanimidade dos presentes e coa ausencia dos representantes da CSIF, enviar unha solicitude de resposta de todos os escritos pendentes de contestar por parte da Administración remitidos por esta Xunta de Persoal. Debido á burla constante á que é sometido este órgano de representación acordouse facer un acto de protesta para denunciar esta situación.
Acordouse tamén dar un impulso á Comisión pola Dignidade do Empregado Público, xa que hai razóns e motivos suficientes para facelo. Neste punto tamén se acordou solicitar unha relación das Asistencias Técnicas que están prestando servizos en locais da Xunta de Galicia, nomeadamente nos Servizos Centrais.
Por último, acordouse tamén solicitar unha entrevista co secretario xeral da Consellería de Educación e Ordenación Universitaria para abordar a problemática da ausencia de persoal subalterno na Secretaría Xeral de Política Lingüística e que está a provocar que o resto do persoal estea a facer este traballo de xeito rotatorio. Todo o persoal menos os xefes de servizo.
Pilar de Celis Getino
Presidenta da Xunta de Persoal de Servizos Centrais
