Este órgano de representación dos 3.500 funcionarios e funcionarias dos servizos centrais da Xunta de Galiza concentrarase en sinal de protesta polo menosprezo da Administración galega no exercicio das súas funcións legalmente recoñecidas

Día: xoves, 26 de xaneiro de 2012

Hora: 12.00 – 12.30

Lugar: Edificio Administrativo de San Caetano (diante da cafetería)  Ver fotos da concentración

Nos 9 meses que leva en funcionamento, na actual xunta de persoal foi intensa a actividade desenvolvida sen que, nalgúns casos, os departamentos da Xunta de Galicia se dignasen en prestar un mínimo de interese. É a tónica xeral, no noso trato coa Administración, a dificultade tan só de obter unha resposta ás diversas suxestións ou requirimentos feitos. Na maioría dos casos son reiterados os escritos e chamadas realizadas para obter varios meses despois respostas evasivas da problemática proposta que en ningún caso son satisfactorias para os intereses das persoas que representamos.

Entre os aspectos máis destacados se atopa:

• Solicitude de entrevista co presidente da Xunta para mostrar a nosa indignación pola campaña de humillación contra a nosa figura. Nin tan sequera nos respostou a carta que lle remitimos.

• Solicitude de información sobre as asistencias técnicas despregadas en cada consellaría. Sólo foron dúas as que contestaron (Medio Rural e Traballo) cun tono prepotente e mentindo cando aseguran que non había ningunha. 

• Solicitude de desatasco dos procesos pendentes en Función Pública; nomeadamente os concursos de traslados. Co director xeral foron solicitadas varias xuntanzas amosando bastantes dificultades mentres recibe persoas a nivel particular sen ningún problema. En todo caso, sempre achamos respostas evasivas aos asuntos demandados.

• Solicitude de homexeneización dos criterios de interpretación nos distintos departamentos das vacacións, permisos e licenzas. Tempo xa que se leva prometido un borrador sen obter ningunha resposta.

• Solicitude de melloras concretas do procedemento disciplinario co obxecto de facelo máis garantista no dereito ao posto das persoas que en sentenza xudicial foses declaradas inocentes. Non obtivemos resposta.

• Solicitude de xuntanzas para tratar problemáticas laborais de diferentes compañeiros sen que nin sequera chegasen a recibirnos (secretario xeral de Educación e secretaria xeral de Traballo).

Convidamos, e solicitamos o seu apoio, ao resto de delegados e delegadas do Comité de Empresa así como das seccións sindicais, que no seu traballo diario na defensa dos intereses das traballadoras e traballadores públicos deste centro teñen tamén que lidiar co menosprezo da Administración.