- A prevención de incendios choca coa protección da natureza.
- Unha cousa é o que levas no programa electoral e outra cousa é a situación económica.
- A forma de contratalas é o menos relevante. (Sobre a contratación das brigadas)
- Se me fala de orzamentos non lle podo dicir canto aforramos. (Sobre o aforro que supón contratar a través de empresas privadas)
- Cada un é libre de denunciar o que queira. (Sobre a denuncia da CIG por prevaricación e fraude)
Con estas perlas se despacha a inverecunda Rosa Quintana, conselleira de Medio Rural e do Mar en declaracións ao diario El País (18/08/2012).
Queda patente a incapacidade desta señora non só para dar resposta aos problemas que se xeran senón para levar a xestión política dunha consellería cuio nome está ordinariamente asociado ao fracaso.
Empresas públicas e privadas dan mordiscos ao orzamento desta consellaría e xeran o caos no servizo. Condicións laborais biafreñas onde se retiran as compensacións aos brigadistas. Prevaricación e fraude cometidos por altos cargos e pola conselleira, contratando a dedo a empresas cun sobreprezo.
Este é o panorama ante o que nos atopamos cunha degradación cada vez maior das condicións de traballo e cun puzzle de empresas e entes que tratan de gañarlle espazo ao SPDCIF, o que vai provocar poñer en perigo unha vez máis os montes galegos e as vidas humanas daqueles que prestan o seu servizo en beneficio de todos protexendo o noso entorno natural.
Non cabe máis resposta que a mobilización e por iso, a CIG, xunto con CCOO, UGT e CSIF convoca para este xoves 23 de agosto ás 11:00 na explanada da estación de buses de Compostela (fronte á Consellaría de Medio Rural e do Mar) unha concentración pola defensa dun Servizo público, único e integral de defensa contra incendios forestais.
Pola defensa do SPDCIF coma servizo público e único da loita contra o lume!!!
Máis coordinación, seguridade e profesionalización!!!
Non a uns cadros de servizo abusivos!!!
