Novas por contido

A CIG desenvolveu este mércores 12 concentracións diante dos edificios administrativos da Xunta de Galiza en rexeitamento ao Anteproxecto de Lei de orzamentos presentados polo Goberno galego para 2015, uns orzamentos continuístas que afondan na destrución dos servizos públicos, no recorte das condicións laborais e salariais das súas empregadas e empregados e que non permitirán recuperar o traballo destruído.

Dende o ano 2010 os traballadores e traballadoras ao servizo das administracións perderon un 30,9% da súa capacidade retributiva. Ademais, séguese afondando nas diferenzas salariais entre o persoal das distintas administracións, xa que “o Estado recuperou o cobro íntegro das pagas extraordinarias, mentres que a Xunta mantén o recorte do 40% nas dúas pagas, o que implica unha nova baixada do 7% dos nosos salarios para o próximo ano”.

Criticamos que o Executivo de Feijoo siga o ditado de Madrid e manteña a taxa de reposición no 0%, agás no caso dos servizos esenciais (como saúde ou ensino), que se sitúa nun 50%, claramente insuficiente para cubrir as vacantes producidas nos últimos anos. Por iso estes orzamentos implicarán a desaparición de servizos públicos e o aniquilamento total doutros. Xa estamos vendo, a día de hoxe, o que isto significa para a administración: externalización e privatización dos servizos públicos”. Unhas privatizacións que están no fondo dos escándalos de corrupción que a diario se destapan.

A CIG demanda un cambio nas políticas neoliberais do executivo galego; a recuperación do poder adquisitivo do persoal dependente da Xunta de Galiza e a supresión dunhas taxas de reposición que afogan os servizos públicos minguando a súa calidade. Isto xunto coa exixencia de que se devolvan, enteiras, as pagas extra de todos estes anos.

Ausencia de investimento produtivo

A formulación dos Orzamentos da Xunta entra en contradición coas propias perspectivas de crecemento económico defendidas dende o Goberno do PP. “Se é certo que vai haber recuperación económica e o PIB galego vai medrar, o normal sería que a Xunta modificara as políticas de austeridade e recortes e apostara por recuperar uns servizos públicos que son fundamentais para a calidade de vida e para xerar emprego, que é o gran problema que temos”.

Pero a orientación das contas da Xunta non camiña nesta liña, de igual xeito que non se incrementa o investimento público nin o investimento nos sectores produtivos que contribúa a reactivar a economía. Neste senso, criticamos que o PP fundamente as políticas de recuperación en precarizar condicións laborais e rebaixar os salarios baixo o argumento de aumentar a competitividade e as exportacións, cando os países da UE aos que fundamentalmente exporta o Estado e Galiza se atopan nunha situación de crecemento mínimo e mesmo corren serio perigo de entrar en recesión.

“Coa caída dos salarios e a precarización non se vai reactivar o consumo interno -hai que lembrar que a grande maioría das empresas galegas producen para o mercado interno- e polo tanto non se reactivará a economía nin se xerará emprego. Con este tipo de orzamentos e de políticas non vemos saída nin que mellore a situación de anos pasados. Séguese a destruír moito emprego indefinido e a cambialo por emprego temporal e, sobre todo, por emprego a tempo parcial”.

O PP pretende trasladar unha visión moi positiva á cidadanía de cara aos procesos electorais do 2015 “nos que o se xoga perder a maioría absoluta”. A realidade, non obstante, é que nos seguimos movendo en índices de desemprego históricos, cunhas cifras alarmantes de parados/as de longa duración e de traballadores/as que non cobran ningún tipo de prestación -e que se atopan en serio perigo de caer nunha situación de pobreza e exclusión social-, mentres se seguen deteriorando os servizos públicos e os sistemas de protección social.

{phocagallery view=category|categoryid=20}

Outras novas recentes

Mércores, 02 Xullo 2025

Confírmase a estafa: cando nos paguen os atrasos do 0,5% levaremos perdido o 2,30% en tan só tres anos

O Goberno ven de aprobar a suba salarial adicional do 0,5% confirmando a perda do poder adquisitivo do persoal empregado público . Esta miseria é froito do pacto salarial de CCOO e UGT, e agora pretenden de novo vender como un éxito o que foi un “pacto de perdas” Os tres protagonistas da última tomadura de cabelo ás empregadas e empregados públicos saíron nestas últimas...
Venres, 11 Xullo 2025

Resolución do concurso de traslados de enxeñería, enxeñería técnica, arquitectura, arquitectura técnica e ciencias

No DOG do 11/07/2025 publican a RESOLUCIÓN do 9 de xullo de 2025, da Dirección Xeral de Emprego Público e Administración de Persoal, pola que se resolve o concurso ordinario para a provisión de postos de traballo vacantes de corpos e escalas de Administración especial da Administración Xeral da Comunidade Autónoma de Galiza, escalas de enxeñeiros, enxeñeiros técnicos,...
Mércores, 02 Xullo 2025

Xerencia do Consorcio: deus críaos e o PP xúntaos!

O xerente non xestiona e a xerenta adxunta para escolas infantís non resolve pero ameazaO 6 de marzo de 2025, o persoal do Consorcio pasou a ser persoal da Consellaría de Política Social da Xunta de Galiza. Nas nosas nóminas xa non aparece o NIF do Consorcio. Pero é o único cambio que se percibe porque a xestión por parte do Consorcio segue a ser nefasta e seguimos a...