O proxecto de decreto contempla o despido aos cinco anos en caso de avaliación negativa e deixa fóra o 70% dos traballadores/as do sector

A Xunta de Galiza presentounos un proxecto de estatuto do persoal investigador da Administración xeral e das entidades instrumentais integrantes do sector público autonómico. Nel loan as bondades de unificar ao persoal que realiza tarefas de investigación e como potenciador do Sistema galego de investigación e innovación. Pero cando lemos o articulado do mesmo vemos con claridade a falsidade destas supostas bondades.

A CIG presentou alegacións a un proxecto de estatuto que afonda na inestabilidade laboral ao contemplar o despido procedente aos cinco anos en caso de avaliación negativa, deixa fóra o 70% dos traballadores/as, xa que non regula o persoal de administración e xestión nin os ciclos formativos, e abre a porta da privatización ao permitir a entrada directa das empresas.

• Non unifican o persoal investigador, xa que deixan fóra ao persoal investigador do sistema universitario. E tamén deixan fóra a unha parte importante do persoal que a lei 14/2011, do 1 de xuño da Ciencia recolle como integrante do Sistema Español de Ciencia, Tecnoloxía e Investigación: o persoal que realiza funcións de xestión, administración e servizos.
  
  
• Tampouco “harmonizan” ó persoal: o que fan é pretender obrigar a todo o persoal funcionario e estatutario, que leva moitos anos realizando investigación, a laboralizarse empregando a chantaxe de quedar fóra da carreira investigadora.
  
  
• E de paso precarizanos, introducindo un sistema de avaliación permanente que pode supor o despido procedente.
  
  
• Non define o sistema de avaliación que pretende implantar, e tampouco ten acordado coa Axencia Estatal de Investigación que esa avaliación sexa homologada para progresar na carreira investigadora.
  
  
• E aínda hai unha novidade que vai máis aló do ámbito de aplicación deste estatuto: por primeira vez unha norma que ten como ámbito subxectivo o “persoal laboral de investigación da Administración Xeral e das entidades instrumentais do sector público autonómico de Galicia” vai ser de aplicación a persoal de empresas privadas.
  
  
• Hai outro aspecto onde esta norma é completamente deficiente, na perspectiva de xénero e na igualdade. Non establece medidas concretas neste eido e nin tan sequera ten elaborado un informe de impacto de xénero.

Rolda de prensa 21/03/2023, polo estatuto do persoal investigador