A CIG asiste a unha xuntanza co SXT da Consellaría de Medio Rural. A xuntanza era para escoitar as cuestións do persoal da Consellería de Medio Rural que a CIG considera que hai que atender á maior brevidade. A modo de resumo serían as seguintes:

Axentes

• Demandamos a negociación do regulamento de funcións da nova escala de axente técnico en xestión ambiental, que tiña que estar rematado no ano 2019.
• Queremos unha revisión do acordo de condicións de traballo de axentes, debido a que os lumes xa non entenden de estacións, e deben adaptarse os horarios aos novos tempos e aos horarios de bombeiros/as forestais.
• Grupo B: o acordo do 2016 di que se activaría ao chegar ao 40% de axentes coa titulación de acceso. Xa é hora.
• UIFO e UDEX: previsións de creación de postos. E necesaria convocatoria de concurso de traslados para a súa cobertura.

Bombeiros/as forestais e emisoristas/vixilantes

• Seguridade e saúde laboral: manifestamos que desdobrar as brigadas e deixar unha delas sen xefe/a de brigada, á parte dunha eiva organizativa, provoca unha mingua importante na seguridade laboral. A maiores solicitamos que se implante xa e para todo o persoal un protocolo de desinfección dos EPIS.
• Conciliación: pensamos e así o transmitimos que xa é hora de que a Consellaría se pare a pensar e negociar medidas que supoñan a posibilidade real de conciliación da vida laboral e familiar do persoal da Consellaría de Medio Rural e non abocalos a ir á vía xudicial sistematicamente.
• Acordos pendentes: reiteramos que deberían instar a Función Pública para asinar dunha vez a modificación substancial das condicións de traballo do persoal descontinuo de 6 meses para ampliar o seu tempo de traballo. Ademais, debería asinarse tamén xa o novo acordo de condicións de traballo do persoal funcionario e non estar a aplicalo por “anacos”. A modo de exemplo dende o 1 de maio implantaron as quendas de 10 horas pero non a parte económica.
• Coeficientes redutores: preguntamos se teñen previsto establecer a cotización adicional económica precisa se como todo apunta se aproba a nova Lei do estatuto do bombeiro/a forestal.
• Nocturnidade: puxemos de manifesto os continuos problemas que se suscitan co cobro da nocturnidade e que non suceden noutras consellerías, e iso que cobran mensualmente.

AGACAL

• Xudicialización dos dereitos do persoal: solicitamos que se active unha interlocución real para negociar dereitos xudicializados nos últimos anos, como a roupa de traballo e EPIs, a unificación dos complementos do persoal de campo e a falta de transparencia nas contratacións de persoal nesta axencia.
• Capacitación para traballos con animais de investigación e docencia: preguntamos como se vai solucionar que boa parte do persoal investigador e todo o persoal de campo da axencia non teña en vigor esta acreditación, e como afecta ás iniciativas de investigación. Lembramos que a responsabilidade de que se cumpra esta normativa recae precisamente na propia AGACAL.
• Fondos europeos perdidos: segundo se observa no Contrato de xestión 2021-2024 AGACAL, deixaron sen executar algo mais de 10 millóns de euros de fondos de recuperación destinados a investimentos. Manifestamos a nosa preocupación por esta nefasta xestión económica.

Persoal técnico

• Solicitamos da Consellaría a convocatoria urxente (antes da campaña de verán) da mesa de seguimento do acordo das escalas de enxeñeiros técnicos forestais e enxeñeiros de montes do Servizo de Prevención Contra Incendios Forestais, que foi rexistrado con data do 6 de marzo do 2024.
• Solicitamos información para cando son as tomas de posesión pendentes das escalas de enxeñería forestal.
• Preguntamos que pasa coas especializacións, que non se está contando co persoal técnico.
• Solicitamos apertura de prazas no AGADER para as escalas de enxeñería forestal, para dar cumprimento a Lei de recuperación de terras (lei que ten gran parte do seu articulado referido aos terreos forestais).

Outras cuestións xerais

A maiores das cuestións específicas, demandamos que se cubrisen regulamentariamente dunha vez as prazas de concurso específico, pois as persoas que as ocupan están a bloquear outras prazas; solicitamos que deixen de concentrar postos en servizos centrais, pois dificultan a provisión e promoción do persoal; demandamos que dunha vez poñan en funcionamento as dobres listas de substitución (funcionariado e persoal laboral); para rematar este apartado, queremos que convoquen cunha periodicidade adecuada as comisións de seguimento dos acordos pactados.

Unha última observación que fixemos foi a necesidade de solucionar o problema que a Administración lle está a causar á cidadanía: a obrigatoriedade de realizar trámites telemáticos nas oficinas agrarias e nos distritos forestais, como permisos de queimas, etc. O envellecemento da poboación, e a fenda dixital existente, obriga ás persoas a acudir a xestorías para xestionar trámites de non teñen maior complicación.