Novas por contido

O Instituto Galego de Estatística pasa a ser un instrumento directo da Presidencia da Xunta. Néganse a explicar cal vai ser o papel das empresas privadas, que poderían ter acceso aos datos ou participar directamente suplantando as funcións do persoal empregado público. Con esta manobra, o PP e o presidente asestan outro duro golpe aos servizos públicos para ampliar a censura e manipulación da información exercidas na RTVG.

A organización estatística de Galiza está constituída polo Instituto Galego de Estatística (IGE), o Consello Galego de Estatística (CGE) e os órganos estatísticos sectoriais (OESs). Canto ao IGE, a Lei estipula que é o órgano central da nosa organización estatística, cuxa principal misión é a de dirixir e coordinar a estatística galega. Trátase dun organismo público autónomo adscrito á consellaría competente en materia de facenda dende a súa creación no ano 1988.

En datas recentes o IGE emitía un informe devastador que puxo en evidencia a situación dramática e sen precedentes de perda de falantes que vive o galego tras sucesivos gobernos do PP, que non só ignoraron por completo o Plan Xeral de Normalización da Lingua Galega  aprobado por unanimidade no Parlamento no ano 2004, senón que incluso lexislaron na súa contra. Para tentar contrarrestar estes resultados feitos públicos polo IGE, Rueda, como bo activista de Galicia Bilingüe que é, contratou unha enquisa á empresa Sondaxe (grupo de La Voz de Galicia), quen emitiu un informe «á medida» que concluíu o contrario que os informes estatísticos elaborados polo persoal empregado público do organismo. 
 
Esta experiencia debeulle facer cavilar a Rueda de que a cousa podería non acabar aí, e que o IGE, un servizo público estratéxico e clave de noso, podería volver poñer en práctica a independencia profesional do persoal estatístico, a imparcialidade, a obxectividade e transparencia, así como a confidencialidade dos datos achegados pola cidadanía e as empresas; características todas elas nas que a propia Xunta poñía o foco con motivo da entrada en vigor da Lei 6/2024 de estatística de Galiza

Só deste xeito se explica o actual escenario de cambio drástico de status do IGE, tras as modificacións  da estrutura da Xunta de Galiza levadas a cabo por Rueda. Estas modificacións implican a adscrición do IGE directamente a Presidencia —é dicir, a si mesmo—, despois de 37 anos nos que figuraba adscrito a Facenda. Deste xeito, segundo o Estatuto da entidade, Rueda pasaría a ser o presidente do IGE, o presidente do Consello Reitor do IGE e o presidente do Consello Galego de Estatística, o máximo órgano consultivo na materia.

É evidente que o que Rueda pretende supeditando o IGE a si mesmo é silenciar de xeito definitivo as informacións «inoportunas» de futuros informes estatísticos; e para iso reforza agora a Oficina de Coordinación Económica da Presidencia, da que fai depender o IGE, creando varios postos de persoal mediante libres designacións (persoal a dedo). Ademais, Rueda proxecta tamén a curto prazo a licitación dun contrato «para que as empresas tecnolóxicas poidan ofrecer os seus servizos para centralizar, xestionar e explotar os distintos datos dos que dispón a Xunta», segundo o propio comunicado aos medios.

Estamos, polo tanto, ante o desmantelamento do IGE e da estatística pública de Galiza. Queda patente a posíbel usurpación das funcións do servizo público prestado de xeito imparcial durante preto de catro décadas polo IGE, para facer do tratamento de datos públicos un negocio privado que venda as informacións públicas, sensíbeis e estratéxicas de Galiza para que as exploten e obteñan lucro delas empresas privadas, mentres se pon en perigo a seguridade e intereses da cidadanía e sociedade galegas.

Xa lle adiantamos a Rueda que non imos permitir que o Instituto Galego de Estatística se poña nas mans de empresas privadas, e lembrámoslle que a recente sentenza do TSXG a favor da CIG tras a privatización dos procedementos de avaliación ambiental, deixa claro que non se pode substituír o traballo do persoal funcionario público, garante da imparcialidade e do interese xeral, por empresas «colaboradoras» privadas, con ánimo de lucro.

Outras novas recentes

Luns, 28 Xullo 2025

Caos nas probas visuais da Consellería do Medio Rural

Tras dous anos agardando pola creación das listas de escalas de persoal funcionario do Servizo de Prevención e Incendios Forestais (SPIF), fixeron unha apertura extraordinaria destas listas en xaneiro, seica pola urxencia, pero as probas non as fixeron ata a semana pasada, en plena campaña de alto risco. Na proba visual, realizada na EGAP o 23 de xullo, houbo unha...
Mércores, 30 Xullo 2025

A CIG pide a retirada da denominación sexista «Valedor do Pobo» da fachada do edificio da institución

A entidade está a negociar cos sindicatos o seu I Plan de Igualdade, que chega 18 anos tarde ―contando con que a súa aprobación sexa en 2025 A pesar de que dispoñemos cada vez de máis lexislación no eido da igualdade, o seu incumprimento é sistemático por parte das administracións, sen que teña consecuencias que as disuadan do contrario. A lexislación obriga ás...
Mércores, 23 Xullo 2025

A titulación do persoal de cociña esgánaselle a Función Pública

Diante das incoherencias da Administración galega acerca de cal vai ser a titulación que se recoñeza para acceder aos procesos selectivos das categorías de cociña, a CIG solicitou resposta escrita á Dirección Xeral de Función Publica e Administración do Persoal, polo cambio introducido nas recentes convocatorias dirixidas ó persoal das cociñas da Xunta, e especialmente á...