Novas por contido

Co silandeiro cesamento do director do IGE, Rueda liquida o que até o de agora fora o Instituto Galego de Estatística, vendido ás empresas privadas e transformado nun medio de censura máis, xunto coa RTVG

Esta é a crónica dunha suplantación fría e rapidamente calculada. Dende o intre en que Rueda encargou un informe á medida á empresa Sondaxe —grupo de La Voz de Galicia— para desdicir, previo pagamento, a «Enquisa estrutural a fogares. Coñecemento e uso do galego» do Instituto Galego de Estatísica (IGE), feita pública o 11 de outubro de 2024, e que destapaba a situación crítica da lingua galega, xa todo quedou dito. A cabeza do até entón director do organismo de maior relevancia da estatística pública de Galiza quedou sentenciada, só era cuestión de tempo... As críticas a Rueda, Feijoo e, en xeral, a todo o PP, pola deliberada incompetencia na xestión da política lingüística, non tardaban en chegar, e dirixirse tamén cara ao conselleiro de Cultura, Lingua e Xuventude, José López Campos. Saldábanse de contado dende dentro do propio PP, coa dimisión e baixa no partido do seu coordinador de Cultura o 19 de novembro de 2024. 

Para Rueda —activista de Galicia Bilingüe—o IGE cometía o «erro» imperdoábel de transmitirlle á opinión pública a situación de alarmante retroceso do uso do galego, tras 20 anos de manifesto incumprimento de toda a lexislación lingüística galega por parte do PP. Os resultados marcaban un punto de inflexión ao constatar que, por primeira vez, o castelán superaba o galego como lingua máis falada habitualmente na Galiza. 

De contado, o conselleiro da Lingua, José López Campos, lonxe de dimitir, presentaba publicamente o 6 de febreiro de 2025, o seu informe á medida: a «Enquisa sobre a percepción social do galego» de Sondaxe. Inmediatamente despois, o 12 de febreiro de 2025, López Campos anunciaba no Parlamento a suposta «renovación» do Plan Xeral de Normalización da Lingua Galega (PXNLG), instrumento aprobado por unanimidade no Parlamento de Galiza o 21 de setembro do 2004, con máis de 400 medidas concretas para favorecer o uso do galego en todos os ámbitos sociais… Plan que o PP se negou a implantar e facer efectivo até agora, en favor dunha verdadeira política lingüística exterminadora da lingua galega. 

Acto seguido, o 10 de marzo de 2025, Rueda ultimaba, a fume de carozo, os correspondentes retoques na estrutura da Xunta, creando varios postos a dedo, usurpándolle ao IGE toda posible autonomía, e apropiándose do control de toda a estatística pública galega. Ese mesmo día, o conselleiro de Presidencia, Diego Calvo, anunciaba a licitación dun contrato «para que as empresas tecnolóxicas poidan ofrecer os seus servizos para centralizar, xestionar e explotar» os datos estatísticos públicos, incluíndo os do IGE.

 

Finalmente, a guinda de pastel pona agora o DOG deste 23 de xuño de 2025, co silandeiro cesamento do até agora director da institución, sen ningunha comunicación aos medios. O IGE enteiro non desaparece, é certo, pero pouco importa, porque anulado queda, pois Rueda pasou a ter o control absoluto como presidente do IGE, como presidente do Consello Reitor do IGE e como presidente do Consello Galego de Estatística, o máximo órgano consultivo na materia, como denunciamos hai uns meses, e con el as empresas privadas, métense a manexar e lucrarse —sen maiores espaventos—, cos datos públicos estatíticos de toda a cidadanía galega.

Temos a Santa Trindade —desculpa a comparación— presidindo a nosa estatística pública, nun exemplo estrela do que é o uso partidista das institucións públicas. O até agora director do IGE, e todo o persoal empregado público da institución, foron postos en entredito por non publicar milongas, que era o que se supón que Rueda esperaba que fixeran. 

Así que, agora si…, xa temos o Instituto Galego de Trolas definitivamente montado!!!!

 

Outras novas recentes

Venres, 13 Novembro 2026

RPT Emprego, Comercio e Emigración (11/11/26)

A Consellería de Emprego, Comercio e Emigración, convocou aos sindicatos a unha xuntanza para falar da súa proposta de modificación da Relación de Postos de Traballo da consellería. Descargar Contactamos coa consellería para pedir explicacións polo feito de que nos convocasen con menos de 48 horas de antelación (restando a xornada de Folga Xeral), o que imposibilita estudar...
Venres, 13 Novembro 2026

Promoción interna corpos xerais; funcionarización en excedencia (para CP 17/11/26)

A directora xeral de Emprego Público e Administración de Persoal convocounos a unha xuntanza da Comisión de Persoal que será o martes 17 de  novembro, coa seguinte Orde do día: Convocatoria do proceso de funcionarización para o persoal laboral fixo que está na situación de excedencia. Descargar Convocatoria de promoción interna ao corpo superior-A1. Descargar Convocatoria...
Xoves, 19 Novembro 2026

O sector dos coidados e a atención ás persoas en loita!

As traballadoras do sector de coidados e atención denuncian a precariedade da súa situación laboral e dos servizos que se prestan desde a Consellería de Política Social e a Consellería de Educación. Centos de manifestantes marcharon en Santiago de Compostela o sábado 14 de novembro, reclamando a creación dun Servizo Público Galego de Atención ás Persoas que garanta servizos...