O Goberno ven de aprobar a suba salarial adicional do 0,5% confirmando a perda do poder adquisitivo do persoal empregado público . Esta miseria é froito do pacto salarial de CCOO e UGT, e agora pretenden de novo vender como un éxito o que foi un “pacto de perdas”

Os tres protagonistas da última tomadura de cabelo ás empregadas e empregados públicos saíron nestas últimas horas a felicitarse por algo insólito: imos cobrar os atrasos que nos deben! O goberno central, CCOO e UGT aplauden como un éxito que vaiamos cobrar unha suba do 0,5% cun carácter retroactivo de 18 meses.

Se xa é un escándalo que ese pagamento non se tivese producido cando correspondía (xaneiro do 2025) aínda o é máis que ninguén das persoas responsábeis poña o acento no realmente importante: como queda o poder adquisitivo dos e das empregadas públicas logo do pacto salarial 2022-24? Estivo ese pacto á altura das circunstancias? Respondeu á necesidade de recuperar o que nos recortaron previamente? Estabilizou cando menos o noso soldo ao respecto do IPC? Todas as respostas a estas preguntas son a mesma: un rotundo NON.

O efecto do pacto sindical estatal de 2022 (vencido en 2024) foi unha suba do 9.8% (computando xa o 0.5% que imos cobrar agora). Neste mesmo tempo, sen contar este ano 2025, o IPC subiu un 12,10%. Isto supón unha depreciación do noso salario dun 2,30%. 

Por que chegamos a esta situación? Porque quen pactou non tivo en conta unha cuestión fundamental: vincular os salarios co IPC, algo que, sen ir máis lonxe, se fixa por lei coas pensións. Esa foi precisamente a proposta coa que a CIG sentou unha vez máis á mesa de negociación en 2022 e esa segue sendo a exixencia do sindicato para este ano 2025.

O salario e o goberno, conxelados

Chegado xa a metade do ano e cun goberno paralizado en multitude de aspectos, máis notoriamente no que ten a ver coas retribucións do sector público, non hai enriba da mesa ningunha proposta de suba para este ano ou para os vindeiros. Levamos, polo tanto, un desfasamento e unha conxelación de facto de medio ano e non hai ningunha medida anunciada. Unha vergoña.

Como xa fixemos nas diferentes mobilizacións ao longo deste ano, así como nos anteriores, a CIG exixe a negociación, con carácter de urxencia, da actualización dos nosos salarios, partindo destas premisas:

• Suba salarial do 5% para este ano 2025, con efectos retroactivos desde xaneiro. Esta suba implicaría recuperar o desfasamento do pacto salarial 2022-24.
  
  
• Incorporación dunha cláusula de garantía salarial vinculada ao IPC, de tal xeito que calquera suba dos prezos ao respecto da suba salarial se compense a finais de ano.
  
  
• Recuperación íntegra das pagas extras, recortadas desde 2010 no salario base e os trienios
  
  
• Plan de recuperación do poder adquisitivo perdido nos últimos anos, que sumado ao que levamos deste ano 2025 xa supera o 20%.