A CIG presenta achegas ao borrador de Real Decreto que desenvolve a Lei básica de bombeiros forestais en materia de prevención incidindo, entre outras cuestións, na limitación da xornada máxima, a formación previa, a obrigatoriedade de investigar os accidentes, na inclusión de todas as actividades onde estea presente o lume e o estudo, XA, das enfermidades profesionais.  

O borrador de Real Decreto polo que se desenvolve a disposición final primeira da Lei 5/2024, de 8 de novembro, básica de bombeiros forestais obriga á prevención de riscos laborais dentro dos incendios forestais. En xeral valoramos positivamente o texto de borrador que nos remitiu o Goberno. Imos poñer o maior empeño en sacar para adiante un texto que responda ás necesidades do noso persoal, como así llo fixemos saber. Pero aínda así faltan cousas e temos que destacar que a modificación do RD 1561/1995 de xornadas especiais de traballo co que pretenden ampliar a xornada máxima de 12 a 14 horas, non é algo correcto. 

Que vai regular este Real Decreto?

 As cuestións que afectan aos riscos para a seguridade e saúde das tarefas de extinción de lumes. 

Que di o borrador? 

• Afecta unicamente a bombeiros/as forestais cando realicen actividades de extinción dentro dun incendio forestal.
• Modifica o RD 1561/1995 sobre xornadas especiais de traballo co que meten a burrada de permitir ampliar a xornada máxima ordinaria de 12 a 14h cada 24h (durante a extinción dun incendio forestal, causas de forza maior excepcionais e xustificadas). Como positivo o descanso de 12h entre xornadas e que os desprazamentos, as pausas e descansos e o tempo de retirada dos EPIS e materiais empregados para o traballo son tempo de traballo.
• Crean un novo artigo co que limitan o tempo de traballo dentro dos lumes e sinalan pausas na actividade: 8 horas máximo/día cun descanso de 15 minutos por cada hora de traballo, que se reducirán a 6 no caso de fenómenos meteorolóxicos adversos de nivel laranxa ou vermello (AEMET ou Meteogalicia) 
• Obriga á Xunta a facer as avaliacións de riscos laborais das actividades dentro dos incendios.
• Dentro das medidas preventivas obriga a ter ben dimensionado o cadro persoal ao igual que os tempos de traballo e as pausas, os EPIs, os procedementos de traballo seguros etc. 
• A Xunta será a responsable da retirada e entrega para limpeza e descontaminación dos EPIs que teremos que ter en número suficiente e limpos ao comezar a xornada (queda prohibido lavalos na casa) e terá que ter os repostos necesarios.
• Dereito a o avituallamento e a unhas bases adecuadas, con zonas de recuperación e aseo. 
• Deberá formar e informar aos bombeiros/as forestais sobre os riscos e medidas preventivas deste RD e os sinala especificamente por bloques.
• Teñen que elaborar, implantar e comprobar ás medidas de emerxencias nos  incendios forestais (ata agora so o facían nos centros de traballo -oficinas-)
• Recoñecementos médicos anuais obrigatorios e específicos. 
• As administracións terán que coordinar as actividades empresarias e verificar que cumplen estas normas tamén no caso de subcontratas e empresas auxiliares. 
• Crean a figura de vixiante de seguridade e saúde designado/a entre o persoal bombeiro de cada unidade operativa básica.

Que NON di, o que lle falta ou o que hai que corrixir… 

• Opoñémonos ás 14 horas. A xornada máxima ordinaria de traballo debera ser de 10 horas ampliable a 12 horas en situacións de causa maior, excepcionais e xustificadas.
• Sinalar a obrigatoriedade da formación previa, en tempo de traballo e a definición das horas mínimas necesarias por bloque.
• Que se inclúan todas as actividades nas que se usa o lume (queimas controladas, ou as de extinción que están fora do limite do incendio forestal) e as tarefas posteriores a declaración de extinción dun incendio pero nas que seguimos en contacto con tóxicos e risco.  
• A definición específica da necesidade do estudo de enfermidades e danos pola exposición repetida aos riscos nos incendios forestais, como trastornos musculoesqueléticos ou enfermidades consecuencia ou agravadas pola inhalación de fumes e exposición repetida a tóxicos.
• Un artigo que sinale a obrigatoriedade de investigar os accidentes e incidentes laborais e o establecemento de medidas correctoras. Incluídos os incidentes nos que non houbo danos pero con risco para a seguridade e saúde laboral, como por exemplo os atrapamentos nun incendio forestal.  
• Referencia ás probas psicofísicas previas adaptadas ao tipo de posto/actividade e aos diferentes sexos. 
• A perspectiva de xénero está ausente en todo o documento, dende a vixilancia saúde específica xa que a exposición a tóxicos e máis lesiva nas mulleres por exemplo, linguaxe inclusiva, medidas para compensar a infrarrepresentación de mulleres, etc.

Esta norma ten que servir para avanzar e non para limitar dereitos, por iso e polo RESPECTO a todo o persoal bombeiro forestal dende a CIG animámosvos a acudir á manifestación, convocada pola PASF na que participa a CIG, en Madrid este sábado 18 de outubro. 

Estamos a organizar autobuses para acudir a mobilización, contacta coa CIG.