Na Mesa Sectorial de Persoal Funcionario (MSFP) do venres 19 de xuño tratamos a modificación da RPT de Aturga, e preguntámoslle á DXEP sobre varias cuestións a respecto dos procesos en marcha: as tomas de posesión das escalas sociais, as devolucións dos pagamentos de taxas de procesos selectivos do SPIF anulados, o concurso F0425, a IT no momento da elección de destino e as vacacións e asuntos propios no cambio de vínculo xurídico de persoal interino a persoal funcionario de carreira.
Modificación da RPT de Aturga
Trouxeron a esta mesa unha modificación da RPT de Aturga negociada semanas antes cunhas pretensións un pouco máis optimistas, e atopámonos agora unha RPT castrada pola DXEP, pois aínda que algunha cousa foi modificada pola Axencia a petición deste sindicato, hai que dicir que botamos de menos a proposta de Aturga da apertura dos postos base C1 a xefaturas de grupo abertos a C1 e C2 para dar unha maior cobertura ao posto.
Tamén mantemos a esixencia da modificación, como mínimo, do complemento específico dos postos de persoal técnico de cociña, pois aínda que pedimos que o complemento de destino sexa de nivel para equiparalos a outros postos iguais, ao cambiar as condición laborais e poñerlle agora “xornada especial”, con base na información exposta na memoria funcional, entendemos que esta modificación das condicións de traballo debe reflectirse no complemento específico, que é o destinado para tal efecto.
Toma de posesión das escalas sociais. Instrucións e protocolos para a calidade e continuidade da prestación de servizos
Na rolda aberta de intervencións a DXEP comezou dicindo que no mes de setembro si que será a toma de posesión das escalas sociais, sempre despois das escalas de infantil e de persoal auxiliar coidador, para que non coincidan.
Tamén indicou que cando se realizan as tomas de posesión envían instrucións ás secretarías xerais técnicas das consellarías. Neste caso, dado o volume de persoas que se moven, envían tamén un protocolo para establecer pautas para garantir a continuidade e calidade na prestación dos servizos públicos, minimizar disfuncións e garantir a transmisión ordenada de coñecemento.
Devolución de pagamento de taxas de procesos selectivos do SPIF (convocatoria de xullo 2025)
Preguntamos pola devolución do pagamento de taxas dos procesos selectivos do SPIF. O 30 de xaneiro de 2026 publicaron no DOG a resolución (23 de xaneiro de 2026) coa que anularon os procesos selectivos do SPIF convocados en xullo de 2025 (resolucións do 18 de xullo de 2025) e aprobaban a devolución de oficio das taxas por dereitos de exame, establecendo 30 días para introducir o número de conta no Fides. Como a día de hoxe non se efectuou esa devolución, preguntamos cando a van facer. A diretora contestou que consultará como está o tema.
Concurso F0425
Na MSPF do mércores 17 de xuño faltou información sobre o concurso F0425-Laboratorio, mantemento, limpieza, cociña, recursos naturais e forestais, e precisamos aclarar cales son as convocatorias que incluirán no acto de elección de destino. A DXEP responde que cando estean máis avanzadas as resolucións dos procesos irán informando.
Consulta sobre a IT no momento de escoller destino
Tamén pedimos aclaración do seguinte: No caso dunha persoa que ocupa unha praza en destino provisional e participa no acto de elección de destino, que situación administrativa lle corresponde se, no momento de escoller destino, se atopa en situación de incapacidade temporal (IT) e continúa en IT no momento da toma de posesión? Ademais, que sucede se a praza que estaba ocupando provisionalmente tamén sae a concurso e é adxudicada a outra persoa? En que situación adminstrativa quedan estas persoas?
Sabemos que poden escoller destino e que se agarda para que asinen a toma de posesión após a súa alta médica, pero precisamos saber cal é a situación administrativa, porque entendemos que cesa no destino provisional (xa que outra persoa puido elixilo). Di a directora que hai moitas casuísticas e que dependerá de cada caso, co cal continuamos sen resposta.
Volvemos pedir aclaracións a respecto de vacacións e asuntos propios, pero non as dan
Por último, insistimos en que aclaren a cuestión das vacacións e asuntos propios e o cambio de vínculo xurídico, algo que xa temos solicitado en tantas mesas. A subdirectora xeral de Provisión de Postos e Selección de Persoal traslada que ao existir un cambio de vínculo xurídico de persoal funcionario interino a persoal funcionario de carreira, teñen que desfrutar a parte proporcional das vacacións e asuntos propios polo tempo traballado como persoal interino até a data na que se produce ese cambio, e o resto como persoal funcionario de carreira despois. O problema é que parece que están enviando instrucións diferentes nas distintas consellerías.
Emprego Público di que a xestión das vacacións e asuntos propios a regulan as secretarías xerais técnicas das distintas consellerías, co cal seguimos no mesmo punto de partida, estando a finais de xuño e sen recibir instruccións claras por parte de ninguén.
