O martes 14 de xullo, discutimos con Medio Rural a súa proposta de Concurso Específico para os postos de xefaturas de distrito forestal. Constatouse unha máxima da moi rica e variada gastronomía galega: igual que temos caldo de repolo, de nabizas ou de grelos coas miles de variantes comarcais e incluso familiares, a Xunta pretende emulala nos concursos específicos. 

O Concurso Específico é, xunto coa Libre Designación e o Concurso Ordinario, unha das tres formas de provisión previstas, basicamente para as xefaturas de servizo, algunhas seccións, e direccións de centros, e ven a ser unha especie de libre designación con estabilidade por cinco anos, tempo tras o que deben pasar unha avaliación que habilitaría a súa remoción do posto, o que supón unha espada enriba da súa cabeza. En definitiva, teremos mandos intermedios máis dóciles, menos independentes, que poden ser cesados do posto.

A pesares de que esta forma de provisión está prevista pola LEPG dende o ano 2015, e a pesares de que no ano 2022 se aprobou o Decreto que regula a súa cobertura, a día de hoxe os 800 postos de concurso específico están todos ocupados en comisión de servizos.

En xuño do 2025 a dirección xeral de Emprego Público impuxo un modelo de bases xenéricas para a convocatoria destes postos, bases que posteriormente cada consellería debería concretar. En grandes liñas, o modelo: 

• Non obriga a un prazo máximo para convocar as prazas, nin para resolver o procedemento.
• Hai unha primeira fase, de valoración obxectiva, que debe puntuar un mínimo do 55%, e unha segunda fase, de valoración subxectiva e que inclúe unha entrevista, que debe valorarse nun máximo do 45%. Cada consellería pode decidir as porcentaxes.
• Dentro de cada fase, relaciona unha serie de méritos que nin son de valoración obrigatoria, nin fixa a puntuación de cada un deles.
• Valora o tempo traballado en comisión de servizos. Non aceptamos que unha decisión a dedo poida constituír un mérito.
• Contempla a posibilidade de valorar a impartición de formación, cando non existen mecanismos transparentes e obxectivos para decidir quen serán docentes de formación continua.
• A comisión de selección está formada por 4 persoas da propia consellería (máis unha da DXEP), unha comisión de selección que tenderá á endogamia.

Estas liñas conforman un mecanismo de selección que pode, facilmente, adaptarse ao que en cada caso interese.

O que nos presenta agora a Consellería de Medio Rural, como era de esperar, difire da convocatoria que xa aprobou a Consellería de Facenda para determinados postos, e que ratifica a nosa certeza de que cada consellería vai facer o que lle peta. A modo de exemplo:

Medio Rural viña coa intención de convocar o concurso específico só para as xefaturas de distrito de Lugo, pero é posible que amplíen aos distritos de todo o País. A CIG reclama a convocatoria de todos os postos de Concurso Específico, non só as xefaturas de distrito.

Conclusión: rexeitamos esta forma de provisión de postos (defendemos que sexan todos de concurso ordinario, coas excepcións que se poidan pactar), e se o manteñen, que anulen a segunda fase (subxectiva), ou aumenten a puntuación da obxectiva, e en todo caso, que o modelo sexa o mesmo para todas as consellerías, sen posibilidade de adaptalo ao que en cada caso lles interese.