- Detalles
A Secretaría Xeral de Política Lingüística publicou no DOG do 06/03/2023, a Resolución pola que convocan as probas para a obtención dos certificados de lingua galega (niveis Celga 1, 2, 3 e 4) no ano 2023.
A convocatoria vai destinada ás persoas maiores de 16 anos, e as probas serán realizadas nos meses de maio/xuño de 2023, nas localidades de Santiago de Compostela e Ponferrada.
As solicitudes preséntanse pola sede electrónica da Xunta, no prazo de 15 días hábiles a contar dendeo o seguinte á publicación desta Resolución en DOG.
- Detalles
A Dirección Xeral de Función Pública enviunos un proxecto de decreto polo que se regula o estatuto do persoal laboral de investigación da Administración xeral e das entidades instrumentais integrantes do sector público autonómico de Galiza. Retoman así a negociación que comezara en novembro do 2022.
Temos de prazo para presentar alegacións ata o día 17 de marzo, polo que se queres achegarnos algo, podes contactar coa CIG.
- Detalles
A Dirección Xeral de Función Pública enviounos a previsión de datas de exame dos procesos selectivos das escalas sanitarias (Lei 17/89). Para todos eles, a previsión é que serán na terceira semana do mes de xuño, en Silleda. Estas con as clases das escalas sanitarias afectadas:
- Clase Farmacéutico/a Inspector/a de Saúde Pública
- Clase Inspector/a Farmacéutico/a
- Clase Inspector/a Médico/a
- Clase Licenciado/a en Ciencias Biolóxicas
- Clase Licenciado/a en Ciencias Químicas
- Clase Licenciado/a en Farmacia
- Clase Licenciado/a en Medicina e Cirurxía
- Clase Licenciado/a en Psicoloxía
- Clase ATS/DUE
- Clase Subinspector/a Sanitario/a
A convocatoria deste proceso fora publicada no DOG do 09/12/2021. Nela recollían con dilixencia as prazas das ofertas de emprego público dos anos 2018, 2019, 2020 e 2021. Durante a negociación da convocatoria, a CIG insistiu en que engadiran a previsión da data de realización do primeiro exercicio, algo ao que se negaron.
Ao longo do 2022 a CIG teimaba en que nos deran as previsións de datas. Chegou o 23/06/2022 e publicaron en DOG a relación definitiva de persoas admitidas e excluídas. Pero seguían sen dar datas de realización do primeiro exercicio.
Chegou decembro de 2022, e levamos a sorpresa de que decidiron modificar a convocatoria para engadir unhas prazas da OEP do 2022 (DOG 04/01/2023). Esto implicaba a reapertura do prazo de solicitude de participación e novos listados provisionais e definitivos de persoas admitidas e excluidas.
Total, que con este comunicado apuntan a que o primeiro exercicio será en xuño do 2023. É dicir, ano e medio despois da convocatoria. PARABÉNS pola boa xestión.
- Detalles
Dende a CIG vimos de presentar unha queixa e solicitar a emenda dos erros sistemáticos na puntuación das baremacións provisionais dos procesos da OEP do SPIF convocados pola Orde do 28 de febreiro de 2019.
O venres día 24 de febreiro de 2023 publicáronse no web de Función Pública as baremacións provisionais da fase de concurso dos seguintes procesos selectivos.
- GRUPO C2 ESCALA 207S - EMISORISTA/VIXIANTE FIXO/A
- GRUPO C2 ESCALA 207T - BOMBEIRO FORESTAL-CONDUTOR/A MOTOBOMBA
- GRUPO C2 ESCALA 207U - BOMBEIRO/A FORESTAL
Tras recibir numerosas queixas, comprobamos que efectivamente eses listados están cheos de erros sistemáticos, polo que rexistramos un escrito dirixido a Función Pública e ao Presidente do Tribunal desas convocatorias, ademais de denuncialo na Mesa Xeral de Empregados Públicos.
- Na especialidade de emisorista/vixiante fixo/a non se valorou a experiencia coma vixilante/a fixo/a.
- Nalgúns casos (e noutros non), baremaron os tempos de inactividade de persoal fixo-descontinuo.
- Non valoran o tempo traballado nos concellos aínda que as bases destes procesos establecen que se debe computar.
- Rebaixas rechamantes no cómputo de servizos prestados onde persoas que tiñan unha puntuación elevada nas listas de contratación por exemplo, aparecen case sen puntos.
Unha OEP do 2018 convocada no 2019 e aínda andamos nestas leas: Que o fagan ben xa!
É incomprensible coma despois dun ano esperando por esta baremación pode ter tal cantidade de erros. Todo isto vai supor a reclamación masiva das puntuacións provisionais e un novo atraso do proceso, convocado no 2019 e ofertado no 2018, hai case 5 anos. Esperemos que detecten as eivas e as corrixan canto antes, para non obrigar a todas as persoas aspirantes a presentar reclamación.
Para calquera cuestión ponte en contacto coa CIG, e non te despistes o prazo de reclamación individual da puntuación deste baremos provisional que comezará cando saia publicado no DOG (nos vindeiros días).
- Detalles
A Dirección Xeral da Función Pública publicou no DOG do venres 3 de marzo, as resolucións polas que inadmiten as solicitudes de de recoñecemento extraordinario do grao I do sistema de carreira profesional (carreira administrativa para o persoal funcionario e complemento de desempeño do posto para o persoal laboral).
Estas resolucións engaden un anexo na que se relacionan as persoas ás que non se lles admite a solicitude, con indicación da causa de inadmisión (non ser persoal da Administración Autonómica a 31/12/2021, non estar incluido/a no ámbito de aplicación, solicitude fora de prazo).
Estas persoas excluídas teñan dúas opcións para reclamar:
- Interpoñer un recurso (potestativo) de reposición perante o conselleiro de Facenda e Administración Pública, no prazo dun mes. Estamos a túa disposición para axudarte con esta vía.
- Interpoñer directamente un recurso contencioso-administrativo no prazo de dous meses. As persoas afiliadas á CIG teñen a súa disposición a asesoría xurídica para utilizar esta vía.
- Detalles
A CIG non está polo labor de aumentar as desigualdades e o mal ambiente nun organismo como o AGADIC, dependente da Consellaría de Cultura e Educación. Nesta primeira xuntanza, que foi o venres 24/02/2023, o director do AGADIC, vendeunos as bondades desta modificación da RPT, na que só vemos problemas, como contamos de seguido e que lle fixemos saber xa nesa reunión.
- Primeiro, lamentamos a destrución de emprego neto: nesta RPT amortízanse oito postos directamente e quedan seis a extinguir. Ou sexa, amortízanse en diferido seis a maiores dos oito.
- Pedimos a memoria económica, que non nos facilitaron, e chegaron a dicir que non se destrúe emprego neto. Pois, que nos digan como crean unha subdirección, reclasifican varios niveis e dan varios específicos a maiores, se non amortizan prazas e non aumenta o gasto, será cousa de maxia!
- Estamos en contra de reconverter postos base en xefaturas de negociado cando están ocupadas. O xeito correcto sería amortizalas e crealas de novo. Se non fan así, premian a uns si e a outros non.
- Estamos en contra da modificación subxectiva de dúas prazas de tremoeiro/a, cambiándolle o nome a estas fora do V convenio chamándolle “tremoeiro/a de escena, e tremoeiro/a supervisor de intendencia”, cando son cinco tremoeiros/as, e só lle soben o específico a dúas. Isto para o único que vale a para crear mal ambiente entre eles. Se a administración ve que hai unha carga de traballo extra doutros oficios (mantemento, luz, son...), o que ten que crear e outras prazas.
- Rexeitamos o traslado forzoso de prazas (mestre gaiteiro e auxiliar de son) dende Coruña a Santiago. O xeito de proceder, aparte de unha negociación e motivación mais exhaustiva, sería o mesmo que para o aumento de nivel.
- Rexeitamos a denominación xeral de postos base para prazas nas que se valora calquera tipo de experiencia ou coñecementos específicos; temos varias prazas así nesta RPT.
- Rexeitamos que, nalgún departamento teñan asignado un C1 nivel 22 a un A1 nivel 20, do que depende.
- Solicitamos a retirada da adscrición A15 o posto de Dirección da Filmoteca de Galiza, e a súa adscrición ordinaria con persoal da Xunta de Galiza (AXG).
- No departamento de coordinación xeral existen dúas prazas de subalterno, un con xornada ordinaria e outro con xornada partida, sen diferencia económica. Solicitamos que se retribúa a distorsión horaria.
En definitiva, como non modifiquen moito esta RPT, este organismo parece que quere converterse nun chiringuito que aumenta as desigualdades, e o mal ambiente entre os seus traballadores, cousa que a CIG rexeita de fronte.
- Detalles
A CIG ten interposto demanda contencioso administrativa contra a OEP de 2017, 2018, 2019, 2020, 2021 por non respectar a porcentaxe de reserva para a promoción interna de persoal laboral que ven establecida no V Convenio Colectivo. A xustiza acaba de darlle a razón a CIG e obrigar a Xunta a convocar as prazas necesarias.
Como xa pasara coas OEP do 2017 e do 2019 a Sala do Contencioso-Administrativo ven sentenciar contra a OEP da Administración Xeral da Xunta de Galiza do exercicio 2020 (a do exercicio 2018 está pendente de sentenza e esperamos que saia proximamente).
O motivo polo que a Sala anula a OEP 2020 é o mesmo que nos casos anteriores: POR NON INCLUÍR A RESERVA DE PRAZAS PREVISTA NO V CONVENIO PARA A PROMOCIÓN INTERNA DO PERSOAL LABORAL, que ademais neste caso é do 50% (tanto na oferta da quenda libre, como na oferta de consolidación).
A Xunta muda a lei cando lle convén
Á Dirección Xeral da Función Pública acumúlanselle as sentenzas desfavorables pero segue a facer o que lle da a gana. E cando ve que perde e que a xustiza lle pon atrancos, o que fai a Administración é usar a Xunta e a maioría do PP no Parlamento para mudar a lei. No 2022 eliminou por lei a promoción interna de persoal laboral das convocatorias de estabilización, aínda que esta nin computa taxa de reposición, nin resta prazas, é ademais esta expresamente compatibilizada na lei 20/2021.
Xa hai dúas sentenzas iguais en prazo de execución forzosa
O TSXG impón as custas procesuais á Xunta de Galiza, mais a Xunta está en prazo de recurso e sempre recorre (como non lle sae do peto ao director xeral...). As que si son firmes e están en prazo de execución forzosa pola negativa da administración de aplicalas, son as sentenzas relativas ás OPE 2017 e 2019 e estamos pendentes de que o Tribunal Superior obrigue á Xunta de Galiza a convocar a promoción interna de laborais non convocada neses exercicios.
Entendemos que a Dirección Xeral da Función Pública esta metida nun lio gordo por non negociar ben as ofertas e tirar para adiante as bravas. Non hai problema, nos estamos sempre dispostas a negociar unha saída equilibrada, mais avisamos que na CIG non nos rendimos na defensa do persoal empregado público que non pode ver pisados ou seus dereitos de promoción.
- Detalles
“Esquecéronse” de negociar coa representación do persoal un título enteiro adicado á Administración pública galega. E agora véñenlles as présas: temos ata o venres 3 para alegar
O pasado venres día 24 fomos convocados pola Consellería de Emprego e Igualdade a unha reunión informativa na que nos deron conta dos aspectos do Anteproxecto de Lei que afectan ao persoal empregado público. Co texto da Lei avanzado e co ditame do Consello Galego de Relacións Laborais e do Consello Económico e Social (polo tanto a piques de entrar ao debate no Parlamento de Galiza), din que nos convocan para “negocialo”. Imos dar batalla, pois imos propoñer activamente melloras na igualdade na Administración pública e nos nosos dereitos de conciliación.
Nunha lectura rápida, este Anteproxecto recolle case literalmente os mesmos contidos que xa formaban parte do Decreto lexislativo 2/2015, de 12 de febreiro, polo que se aproba o texto refundido das disposicións legais da Comunidade Autónoma de Galiza en materia de igualdade. Observamos que hai retrocesos conceptuais importantes, introdúcense termos como “composición equilibrada” na vez de discriminación positiva, a omisión deliberada do machismo social e institucional igualando a base da que partimos homes e mulleres, e colan termos xa desbastados como a “violencia doméstica” na vez de “violencia machista”.
De cara as persoas empregadas públicas: nin mellora a conciliación, nin garante dereitos, nin regula nin achega nada novo. O único destacable e que nos remite á Lei de emprego público, seguindo a impoñer condicións por lei, obviando o carácter informador e regulador que tería o I Plan de Igualdade da Xunta de Galiza (en proceso de negociación na actualidade e que contempla definicións normativas máis actualizadas), obviando avanzar nos dereitos mediante a negociación colectiva.
É esta Lei de igualdade unha ocorrencia acelerada froito da carreira polos votos? Ou simplemente é unha fórmula hipócrita da Xunta de lavar a cara logo de 15 anos sen Plan de Igualdade para o seu persoal? Ou estamos diante dunha competición normativa co Ministerio de Igualdade?
Nós pensamos que Galiza debe de contar cunha regulación avanzada e precisa en materia de igualdade que constitúa dereitos e elimine discriminacións, pero para iso hai que facer as cousas ben: respectando a negociación colectiva, recollendo achegas e dándose o tempo necesario para levala a cabo.
Tes aquí o texto para consultalo (descargar), e se queres facernos algunha achega, contacta coa CIG.
- Detalles
A recén aprobada Lei Orgánica 1/2023, de 28 de febreiro, pola que se modifica a Lei Orgánica 2/2010, de saúde sexual e reprodutiva e da interrupción voluntaria do embarazo introduce novidades con respecto as motivacions das incapacidades temporais que entrará en vigor a partir do día 2 de marzo de 2023.
- Menstruacións incapacitantes: situación de incapacidade temporal xerada por unha menstruación dolorosa a causa dunha patoloxía previamente diagnosticada.
- Incapacidade temporal a partir da semana 39 de embarazo: terá consideración de situación especial a baixa desde o primeiro día da semana 39 de embarazo. Mais lembra que na Administración pública, na práctica, temos permiso retribuído a partir da semana 37. No suposto de xestación múltiple, este permiso poderá iniciarse o primeiro día da semana 35 de embarazo, ata a data do parto (disposición adicional décimo sexta do Real decreto lexislativo 5/2015, do 30 de outubro).
- Aborto: considerarase a incapacidade derivada dunha interrupción do embarazo, voluntaria ou non, sempre que impida traballar. Nos casos nos que a interrupción de embarazo sexa derivada de accidente de traballo ou enfermidade profesional, considerarase incapacidade temporal por continxencias profesionais. Será o persoal médico de atención primaria o que terá que valorar e xestionar esta baixa por incapacidade temporal polos motivos expostos, así como determinar a duración da mesma.
- Detalles
O 1 de marzo tivemos unha xuntanza da Comisión de Persoal na que se aprobaron catro RPTs.
- RPT Presidencia: Sen cambios significativos. Manteñen o intercambio de postos ocupados (concurso encuberto) entre subdireccións xerais sen dar ningunha explicación. Propoñen un incremento retributivo lineal no complemento específico do 325,56 % (2.000 € anuais) para o persoal da Casa de Galicia en Madrid baixo a xustificación do “custe da vida” en Madrid. Non compartimos ese argumento cando o IPC acumulado a decembro de 2022 en Madrid foi do 4,9 % mentres que na Galiza foi do 6,4 %, un punto e medio máis. En base a esa argumentación do "custe da vida" solicitamos o citado incremento de 2.000 € anuais para todos os empregados públicos do ámbito de Función Pública. Presidencia non aceptou.
A RPT quedou aprobada co voto en contra da CIG, a abstención de CCOO e UGT e o voto a favor da CSIF.
- RPT Atriga: Crean 12 novos postos de traballo. Voto a favor de CIG, CCOO, UGT e CSIF.
- RPT Facenda: Un novo paripé de negociación culminado co envío de nova documentación apenas media hora antes do inicio da xuntanza. Incremento de postos en LD sen unha xustificación válida. Crean postos en Función Pública a conta de amortizar postos ocupados en destino provisional por novo ingreso. Creación dun posto de coordinador/a, nivel 20, no Tribunal Administrativo de Contratación sen unha xustificación nin pola responsabilidade, carga de traballo nin pola especial dificultade. Ademais de que este tribunal xa dispón dunha xefatura de negociado (nivel 18) que ten as funcións do posto que se crea, xerando unha duplicidade discriminatoria e innecesaria.
CIG e CSIF en contra. CCOO a favor e UGT abstención.
- RPT Aturga: Amortizan postos.Traspasan crédito dende a Aturga para financiar a RPT de Presidencia. Estamos en contra da apertura a persoal docente do posto novo de Xefatura de Área de Turismo Termal en Ourense.
CIG en contra, CCOO abstención, UGT e CSIF a favor.
- Rogos e preguntas:
Baremación provisional procesos selectivos incendios: estano revisando. Nomean as sentenzas do persoal indefinido non fixo que baremaron a tempo completo, vai haber correccións.
