No DOG do 29/05/2023 publican a ORDE do 23 de maio de 2023 pola que se regula o procedemento para o nomeamento como persoal funcionario de carreira do persoal laboral fixo de determinadas categorías profesionais que superou os procesos de funcionarización convocados polas resolucións do 12 de maio de 2021 e do 25 de agosto de 2021.
A partir da publicación desta orde no Diario Oficial de Galiza, o persoal laboral fixo incluído no anexo II deberá asinar un acordo de extinción do contrato de traballo, consonte o establecido no artigo 7.2 do Decreto 165/2019, do 26 de decembro, polo que se establece o procedemento para a adquisición da condición de persoal funcionario de carreira polo persoal laboral fixo do Convenio colectivo único do persoal laboral da Xunta de Galiza. A data de efectos administrativos da sinatura deste acordo de extinción será o 31 de maio de 2023.
A extinción estará condicionada á efectiva toma de posesión como persoal funcionario de carreira.
A toma de posesión como persoal funcionario de carreira, que implicará o cambio do vínculo xurídico coa Administración, será o 1 de xuño de 2023.
As persoas que tomarán posesión como persoal funcionario de carreira, ao abeiro do establecido na presente orde, serán as que proveñen das categorías de persoal laboral que aquí se relacionan.
• Corpo de técnicos de carácter facultativo de Administración especial-grupo B-escala técnica do Servizo de Prevención e Defensa contra Incendios Forestais.
– Especialidade de bombeiro/a forestal xefe/a de brigada. Categoría 100 (Bombeiro/a forestal xefe/a de brigada) do grupo III.
• Corpo de auxiliares de carácter técnico de Administración especial-subgrupo C2-escala auxiliar do Servizo de Prevención e Defensa contra Incendios Forestais.
– Especialidade de bombeiro/a forestal-condutor/a de motobomba. Categoría 33 (Bombeiro/a forestal condutor/a de motobomba) do grupo IV.
– Especialidade de emisorista-vixilante/a fixo/a. Categoría 10B (Vixilante fixo de defensa contra incendios forestais) e 10C (Emisorista de defensa contra incendios forestais) do grupo V.
– Especialidade de bombeiro/a forestal. Categoría 14 (Bombeiro/a forestal) e 14A (Bombeiro/a forestal condutor/a) do grupo V.
• Corpo administrativo de Administración xeral-subgrupo C2. Categoría 32 (Operador/a codificador/a de datos de defensa contra incendios forestais) do grupo IV.