Novas por contido
  • A CIG presenta unha proposta alternativa e pide sentar a negociar melloras reais.
  • Considera que se debe superar o dito acordo (ver anexo) e falar dunha modernización da Administración galega que sitúe á mesma e ás súas persoas empregadas públicas no século XXI.

A Xunta de Galiza vén de presentar un borrador de acordo de mellora de emprego para impor a suba pactada por CCOO, UGT e CSIF en Madrid do 1,5% + 0,25 a partires de xullo.

Isto a pesares de que o IPC interanual está no mes de xuño no 2,3%, e de que os sindicatos asinantes acaban de acordar co goberno e a patronal que no sector privado a suba mínima sexa de entre o 2%.

A CIG non vai entrar no xogo de darlle unha pátina de lexitimidade ás actuacións da Xunta porque non hai unha verdadeira vontade negocial. Isto maniféstase en que nin sequera desenvolven o acordo asinado en Madrid o 9 de marzo en temas como as 35 horas ou eliminar os descontos por incapacidade temporal. Só tocan tres dos seis puntos: “mellora retributiva”, “plan de estabilización” e oferta de emprego público 2018. Por un lado, Feijóo recortou ao persoal público máis que ningunha outra Administración para vender o seu "milagre económico" e polo outro pon enriba da mesa só unha parte do asinado en Madrid polos seus compañeiros de partido. Isto cómpre cualificalo do que é: ridículo.

Acordo de modernización da administración galega

Fronte a isto a CIG presenta unha contraproposta na que se contemplan cuestións “de mínimos” como:

• Recuperar o complemento por Incapacidade temporal (IT) do 100%.
• Eliminar a taxa de reposición e vincular os cadros de persoal ás necesidades reais e á carga de traballo do persoal para garantir a atención dos servizos públicos, fuxindo da subcontratación e das chamadas asistencias técnicas.
• Recuperación do poder adquisitivo e vincular os incrementos salariais ao IPC.
• Negociación da carreira profesional.

A respecto desta última cuestión a CIG lembra que as traballadoras e traballadores da administración autonómica viron deteriorado o seu poder adquisitivo nun 13,20% de media. Por iso non podemos admitir un aumento salarial referenciado ao incremento do PIB e non ao IPC.

Por outro lado, este acordo entra en contradición coa prédica doutros sindicatos de que hai Administracións que cobran incluso un 55,81% máis (como o Parlamento de Galiza) ou o 53,78% (como outras CCAA) e que instan á Xunta a homologarnos con elas. Se isto é así, por que os sindicatos asinantes de todos estes acordos, especialmente do acordo de ámbito galego, non recollen esa homologación?

A CIG defende ademais a necesidade de que se aborde un verdadeiro acordo de modernización da Administración galega noutros aspectos nos que a Xunta de Galiza “aínda vive na idade de pedra” respecto a outras Administracións. Neste sentido sinalamos aspectos como o desenvolvemento obxectivo dunha carreira profesional, os concursos permanentes ou rematar co caciquismo nas comisións de servizo. Consideramos necesario elaborar un acordo moito máis ambicioso pois moito máis ambiciosos foron os recortes e de moito máis atrás partimos en cuestión de carreira profesional.


Plan de estabilidade e oferta de emprego público

Este é o enésimo acordo sobre mellora de emprego e sobre estabilidade e non se aprecia nengunha mellora respecto aos anteriores, aínda sen concretar e sen executar. Recapitulamos:

• 2017-MARZO: Acuerdo para la mejora del empleo público, de 29 de marzo de 2017.
• 2017-OUTUBRO: Acordo entre a Xunta de Galiza e as organizacións sindicais CCOO, UGT e CSIF para o desenvolvemento dun plan de estabilidade no emprego dos servizos públicos, de 18 de outubro de 2017.
• 2018-MARZO: II Acuerdo para la mejora del empleo público y las condiciones de trabajo, de 9 de marzo de 2018.
• 2018-XUÑO: Proposta de ampliación do Acordo do 18 outubro 2017.


Asinan acordo tras acordo e reúnen subcomisión tras subcomisión sen resolver nada, sen ofertar nada e sen convocar nada, xogando coas expectativas de moita xente que espera que se convoquen procesos selectivos de estabilización ou que se desenvolvan procesos de promoción interna dignos de tal nome. As taxas de temporalidade seguen na Administración xeral da Xunta de Galiza no 25% e no persoal laboral dispáranse preto do 40%.

Proponse tamén no borrador do acordo unha taxa de reposición que só poderá superar o 100% en determinados sectores e baixo determinadas circunstancias económicas. Recordamos que a taxa de reposición considera só a cobertura dos postos por xubilación, ou sexa que como moito estariamos mantendo os niveis de profesionais públicos que se xubilan e sen chegar a recuperar os varios centos que eliminaron nestes últimos 8 anos.

Finalmente, a CIG considera que se debe superar o dito acordo de “mellora” e falar dun verdadeiro acordo de modernización da Administración galega noutros aspectos nos que a Xunta de Galiza aínda vive na idade de pedra respecto a outras Administracións: o desenvolvemento obxectivo dunha carreira profesional, os concursos permanentes ou rematar co caciquismo nas comisións de servizo. Así pois, consideramos necesario elaborar un acordo moito máis ambicioso pois moito máis ambiciosos foron os recortes e de moito máis atrás partimos en cuestión de carreira profesional. Deste acordo daremos debida conta coas traballadoras e traballadores da Administración xeral da Xunta de Galiza, a quen chamamos a defensa e mobilización dos seus dereitos.

Outras novas recentes

Martes, 19 Agosto 2025

A CIG critica a caótica xestión do Goberno galego en materia de persoal de incendios

Alertamos de que se están a facer chamamentos en plena vaga de lumes sen tempo para formar en prevención. Dende a CIG-Autonómica denuncia a caótica xestión da Xunta de Galiza en materia de persoal do Servizo de Prevención e Defensa contra Incendios Forestais (SPIF), até o punto de que a día de hoxe aínda non se coñecen nin as vacantes que están por cubrir. Temos datos de...
Xoves, 14 Agosto 2025

Arde Galiza e evidéncianse os problemas na xestión do servizo de incendios: accidentes e graves situacións de risco

Aínda non chegamos a segunda quincena de agosto e as previsións cúmprense antes de tempo. Estamos tendo unha campaña de verán de lumes durísima, altamente perigosa e con milleiros de hectáreas queimadas. Máis os expertos anuncian que o peor virá nas próximas xornadas con Grandes Incendios Forestais (GIF) e condicións de alto risco para a cidadanía e para as bombeiras e...
Venres, 22 Agosto 2025

Máis de 45.000 persoas bótanse á rúa en toda Galiza contra a política forestal do PP e en solidariedade coas persoas afectadas pola vaga ...

A CIG reclama medidas inmediatas para recuperar os bens e paliar as consecuencias, e un servizo público único, de xestión directa e dependente da Xunta de Galiza, para traballar na prevención e respostar ás multiemerxencias do medio natural e rural durante  todo o ano. Un total de 29 localidades de todo o país acolleron o 21 de agosto mobilizacións multitudinarias...