Un ambiente de represión, terror e acoso laboral. Este é o resumo do ambiente laboral descrito no informe oficial emitido dende a Inspeción de Traballo sobre os despedimentos masivos de persoal dependente da Secretaría Xeral de Modernización e Innovación Administrativa dende que Mar Pereira fora nomeada a súa máxima responsábel. En base a este informe, o Xulgado do Social número un de Santiago de Compostela declarou a nulidade dos despedimentos denunciados, dándolle así á razón ás reiteradas denuncias que nos últimos meses vimos facendo dende a CIG-Autonómica.
Represión laboral e represión sindical
Nesta recente sentenza, a Xustiza recoñece que os despidos tiveron como causa real a persecución sindical e a represión laboral nos centros de traballo. Trátase do personal contratado nos distintos Centros Tecnolóxicos e de I+D que foran postos en marcha durante o bipartito e que comezaron a ser desmantelados ou privatizados coa volta a San Caetano do Partido Popular. Entre outros a xustiza dalle a razón aos traballadores e traballadoras de centros tecnolóxicos como Mancomún, a Rede de Dinamización e os distintos centros e proxectos de I+D+i.Despilfarro e nova adxudicación de licenzas
Dende a CIG-Autonómica lembramos tamén o alto custe económico que estes procesos xudiciais supoñen para a cidadanía. Así, os gastos estimados resultantes de sumar as indemnizacións, taxas, gastos de asesoría xurídica e representación así como as improcedencias suporán un custe aproximado de 1 millón de euros.
Asímesmo é preciso lembrar as perdas derivadas polos cambios na xestión dos centros tecnolóxicos, das que son boa representación os 2 millóns de euros en axudas europeas que se perderon debido ao desmantelamento Mancomún. Tamén relacionado co software libre, compre sinalar que este despilfarro pode constatarse coa política de licenzas de software onde o Partido Popular adxudicou a traverso de Mar Pereira mais de 6 millóns de euros en licenzas de programas como Windows ou Office, que outras administracións están substituíndo por alternativas libres gratuítas como Ubuntu ou OpenOffice.
Neste sentido a CIG-Autonómica denuncia que a pesar das promesas de ter unificado a compra de licenzas nun único contrato, o pasado venres 5 de novembro a Secretaría Xeral de Modernización adxudicou 800.000 euros en novas licenzas para o "software de base" deste mesmo organismo. Desta forma Mar Pereira deixa blindada a entidade que dirixe contra o software libre durante alomenos tres anos. Non resulta posible outorgar a máis mínima credibilidade ás promesas dunha persona que fai o contrario do que dí públicamente.
O Partido Popular ofrecía no seu programa eleitoral a promesa do uso do software libre. En troques de inxectar unha cantidade inxente de fondos públicos nunha situación de crise a empresas privadas, de cumpriren o seu programa so faría falla unha pequena cantidade para obtermos unha verdadeira promoción dun tecido productivo propio ligado ao desenvolvemento de software, ás necesidades de instalación e de mantemento. Pero non, todo ese diñeiro vaise para xerar emprego fora do país. E sempre sen esquecer que o argumento do recorte salarial dos empregados públicos o xustifican coa reducción de ingresos e a necesidade política de contención do gasto.
A CIG esixe a dimisión de Mar Pereira
Dende a CIG-Autonómica, lembramos que a persecución por causas políticas ou sindicais é unha inxustificabel agresión contra a liberdade de opinión e de expresión, que por estar tipificada como delito no Código Penal podería ser causa de inhabilitación para o exercizo de cargo público. Todos os despedimentos considerados nulos tiveron lugar baixo a xestión de Mar Pereira, única responsabel política dos feitos denunciados.
No que se refire á política tecnolóxica, a Secretaria Xeral de Modernización non cumpriu a día de hoxe nin un só dos seus compromisos. Máis alá deso, resulta evidente que as adxudicacións reiteradas e masivas de licenzas de software contradín as promesas de implantar o software libre realizadas públicamente por ela, que desta forma queda completamente desacreditada para o cargo que ostenta.
Por todos estes motivos, dende a principal central sindical do país esiximos a destitución de Mar Pereira e a designación dunha persona competente para asumir as importantes funcións deste organismo.