Non era sen tempo, despois de moitos amagos, achega a Dirección Xeral de Función Pública o borrador de instrucións que tratará de homoxeneizar as instrucións que regulamentan as vacacións, permisos e licenzas para o persoal funcionario. Nunha rápida ollada deste documento observamos que, en moitos casos, a proposta de interpretación que fai a Administración é a máis restritiva posíbel.
Despois de tempo demandando unha homoxeneización na aplicación de vacacións, permisos e licenzas, observamos con preocupación que a Administración pretende homoxeneizarnos a todos pero por abaixo. A CIG-Autonómica defenderá sempre a interpretación máis favorable para o traballador tomando como base os aspectos máis favorables de instrucións similares existentes, tanto na nosa como noutras Administracións. Agardamos as vosas achegas ao noso correo electrónico antes do 9 de maio que é a data límite para achegar alegacións.
