Representantes da Xunta de Persoal dos Servizos Centrais acudiron o 29 de maio ao Parlamento para denunciar o abuso das asistencias técnicas ante a nula atención por parte da Xunta de Galiza.
Primeiramente rexistraron un escrito coa denuncia e despois achegáronse polas oficinas dos diferentes grupos parlamentares para solicitar a súa intermediación. Só no caso do PP foi imposible establecer contacto con ningún parlamentar; tanto o PSdG como o BNG confirmaron a súa intención de contactar coa Xunta de Persoal para estudar o tema.
A externalización dos traballos propios de empregados e empregadas públicos se mantén mesmo en época de crise mentres se recorta en persoal propio. A Xunta de persoal de SSCC leva realizado numerosas xestións neste tema sen que a Administración galega se digne nin sequera a contestar. Na denuncia actual se fai referencia ao traslado ás instalacións de San Caetano das asistencias técnicas que prestaban servizos na Secretaría Xeral do Mar.
A xunta de persoal denuncia esta práctica habitual de austeridade hipócrita da Xunta de Galiza aocontratar empresas externas para facer o traballo propio de empregados e empregadas públicas. Tamén acusa á Administración de burlar a lexislación e non prestar importancia aos gastos de procesos xudiciais e os derivados de execución de sentenza. Na mesma liña propónlle a Núñez Feijoo que de querer recortar comece pola externalización de servizos.