Se es persoal laboral, cumpres 65 anos antes do 31/12/2018 e tiveses para entón cotizados un mínimo de 31 anos (ou 30 se cotizaches a unha mutualidade), poderías solicitar a xubilación parcial anticipada, pero é preciso que verifiques que estás incluido/a no listado que Función Pública vai enviar á Seguridade Social o 15 de abril, sen posibilidade de inclusión posterior.
O Real decreto lei 5/2013 anulou a posibilidade de xubilacións parciais anticipadas naquelas empresas en que a parte sindical e empresarial non asinasen un acordo antes do 1 de abril do 2013. No Comité Intercentros de persoal laboral asinamos con Función Pública un acordo uns días antes, o que abre a posibilidade á referida xubilación parcial anticipada.
A CIG-Autonómica ten un listado co persoal laboral susceptíbel de que algún día poidan solicitar a xubilación con esta modalidade, e que Función Pública vai facilitar á Seguridade Social. É moi importante que nos chames e verifiquemos que estás incluido no listado, pois unha vez pasado o día 15 de abril, xa non se van poder incluir máis nomes e as persoas ausentes non van poder acollerse á xubilación parcial anticipada.
Respecto das condicións da xubilación, non é o importante agora, pois do que se trata exclusivamente é de verificar se a xente aparece ou non no listado para que no seu día poidan decidir se se acollen ou non (valorar as condicións e o interese é algo que no seu día terá que considerar o traballador/a).
Se queres saber se ti estás nese listado, estamos á túa disposición nos locais da CIG ou no correo autonomica@cigadmon.gal
Data límite para recibir consultas: venres 12 de abril.
O persoal funcionario está excluido desta posibilidade porque así o impón o Real decreto lei 5/2013.