A Lei 9/2021, do 23 de febreiro, de simplificación administrativa, puxo as bases para a xestión privada da Administración autonómica galega coa desculpa da xestión dos fondos europeos do Plan de recuperación e resiliencia:

• Acurtamento dos prazos para a emisión de informes até facelos inviábeis.
• Reverter a consecuencia do silencio administrativo na emisión destes informes, pasando a ser positivo.
• Reasignación do persoal que se encargue destes informes para escollelos a dedo.
• Privatización da emisión destes informes.
  
  

Para aprobar esta Lei no Parlamento Galego chegoulles coa súa maioría absoluta. Agora “acadar este obxectivo da execución eficiente destes fondos require dunha reorganización interna na Administración en materia de xestión de persoal, flexibilizando os mecanismos tradicionais de asignación de tarefas...” levounos á publicación o 6 de xullo do Acordo sobre as actuacións en materia de persoal para a xestión dos fondos de recuperación e resilencia (FRR) e outros fondos europeos, e para iso contaron coa inestimábel axuda de CCOO e UGT na Mesa Xeral de Empregados Públicos (22 de marzo), e na Comisión de Persoal do día 26 de marzo onde votaron a favor.

Este Acordo supón a aceptación por parte destas dúas organizacións sindicais do obxectivo político do Partido Popular de constrinxir a Administración ao máximo, evitando calquera sinal de independencia funcionarial e escollendo a dedo ao persoal para beneficiar a determinados grupos de presión empresariais. Iso si, todo baixo a cínica expresión de “Acadar este obxectivo leva consigo a necesidade dunha reorganización interna na Administración que garanta a xestión eficaz dos fondos europeos, flexibilizando os mecanismos tradicionais de asignación de tarefas, captando o talento, a proactividade e a capacidade de innovación existente na organización, motivando o persoal empregado público que interveña de forma directa na xestión dos ditos fondos”.

Esta literatura idílica vale de introdución para:

• A creación de grupos de traballo con persoal seleccionado polos directores dos grupos, cargo para o que no caso da administración instrumental “poderá ser designada unha persoa que sexa persoal directivo que non teña a condición de empregado público”
  
  
• A creación de “unidades específicas de carácter provisional” con todo o persoal nomeado en comisión de servizos.
  
  
• O establecemento dun “complemento de produtividade” que pode chegar ao 20% das retribucións.
  
  
• A decisión de que “poderá terse en conta o traballo desenvolvido para os efectos de recoñecemento profesional ou na carreira administrativa do persoal empregado público”
  
  

Así, co beneplácito de CCOO e UGT, os xestores políticos do PP na Administración autonómica introducen un sistema de xestión privado na función pública galega. Xa non son necesarios os concursos de traslados, nin as RPTs, nin se vai valorar o esforzo en formarse, a antigüidade ou a permanencia no posto. A promoción profesional e o incremento salarial a partir de agora pódelos conseguir se te escolle un Xefe de grupo para “diminuír os atrasos na emisión dos informes co obxectivo de dinamizar o desenvolvemento das iniciativas empresariais en Galiza.” Todos e todas podemos intuír o que pode significar esta frase.