A CIG ven de presentar un escrito dirixido á Dirección Xeral de Emprego Público e Administración de Persoal (DXEP) reclamando a equiparación no criterio de superación da proba física entre o persoal bombeiro/ a forestal do SPIF, o persoal técnico de defensa contra incendios forestais e o persoal axente técnico de xestión ambiental.

Nas convocatorias publicadas destas escalas e categorías estableceuse unha diferenciación entre homes e mulleres no tempo permitido para a superación da proba física requirida. Así, na convocatoria da escala de axentes ambientais o tempo máximo de realización da proba sería de 30 minutos para os homes e 35 para as mulleres, pero para o persoal bombeiro/a forestal e técnico non hai diferenzas (sería de 30 minutos para homes e mulleres).

Dende a CIG non entendemos nin compartimos esta disparidade de criterio e pedimos dende hai tempo adaptar o acceso ao emprego público implantando medidas de accións positivas, sobre todo naquelas profesións masculinizadas, que permitan ás mulleres acceder en condicións de igualdade real.

Por este motivo, vimos de solicitar á DXEP que corrixa esta eiva e equipare o criterio de superación da proba física entre todas estas escalas e categoría e pase a ser de 30 minutos no caso dos homes e de 35 minutos no caso das mulleres.

A maiores, tamén solicitamos que se establezan medidas para non menoscabar o acceso ao emprego público das mulleres embarazadas, tendo en conta a necesidade da superación da proba física para obter unha praza nas mencionadas categorías e escalas.