Opacidade e presións ao persoal funcionario para a autorización de Altri

Malia o forte clamor de toda Galiza e a enorme presión social e política contra a instalación da pasteira de Altri ―proxecto Gama―,  a Xunta do PP teima en seguir adiante co proxecto da pasteira na Ulloa.

Na busca de calquera argumento que xustifique o «si» que xa lle teñen dado publicamente á instalación da pasteira, desta volta centran o seu discurso no persoal funcionario que ten que elaborar os informes e tramitar os procedementos das diferentes autorizacións. Moi ao seu pesar, a cuestión técnica depende do persoal funcionario, quen hoxe ten que traballar con informes que realiza a propia empresa. A presión exercida sobre este persoal está a ser bestial. Falamos de compañeiros e compañeiras funcionarias públicas de diferentes departamentos que se negaron a sacar adiante as autorizacións pola información parcial e sesgada que dá Altri para o seu proxecto. A Xunta tivo que recorrer ás persoas que ocupan postos directivos de libre designación para a asinar os informes.

Augas de Galiza autorizou?

Responsables da Xunta manifestaron publicamente ter a autorización de Augas de Galiza para a retirada de 46.000 m³/día de auga e a posterior vertedura ao río Ulla, mais o certo é que nin a sección de Lugo o tramitou, nin en Servizos Centrais consta que asinaran ditas autorizacións as persoas funcionarias ás que lles correspondería. Sabemos que nin a Área de Calidade de Augas, nin a Sección de Residuos traballaron no proceso de autorización.

Todo indica, segundo as informacións das que dispoñemos, que foi o comisario de Augas, un posto de libre designación, quen validou o informe que lle preparou a propia empresa, sen que nos conste hoxe que estea resolto o expediente. Dados os milleiros de ollos que están postos na parte máis polémica da instalación dunha megapasteira na Ulloa, parécenos raro raro que se atrevan a facelo tan mal.

Dende a CIG non imos permitir que as propias persoas responsables da Administración acosen e ameacen ao persoal funcionario, e tampouco que se secuestren as súas funcións, cumpridas con neutralidade e obxectividade, para outorgárllelas a persoas designadas politicamente e que obvian os criterios técnicos.