A DXEP retira a proposta de modificar os 12 postos das oficinas agrarias. Mantén o resto da proposta

A directora xeral de Emprego Público e Administración de Persoal (DXEP) anunciou na Mesa Sectorial que tivemos o luns 28 de xullo, que retiraban a proposta de modificación dos 12 postos das oficinas agrarias comarcais, que pasaban de ser para as escalas de enxeñaría agronómica e técnica agrícola, para abrilas tamén ás enxeñarías de montes e técnica forestal. Non retira o posto do centro de formación e experimentación agroforestal “Pedro Murias” de Agacal, nin o de Fogga. Tampouco retira a modificación do posto da xefatura territorial de Lugo e a eliminación do requisito de título profesional de capitán de pesca da Escola náutico-pesqueira de Ferrol.

A CIG defendeu que os postos de enxeñaría agronómica e agrícola son necesarios para a modernización da agricultura e gandería de Galiza, para as políticas da PAC, para a xestión e asesoramento das explotacións, para a atención ás persoas usuarias das oficinas agrarias, e que non semella adecuado substituír estes postos por persoas de enxeñaría de montes ou forestal, que nada teñen que ver coas funcións específicas de agronómica e agrícola. Por tanto, satisfainos parcialmente a retirada dos 12 postos das oficinas agrarias.

Para a CIG, o problema de raíz está na non cobertura regulamentaria dos postos de concurso específico. Segundo os nosos datos, ter feito en tempo e forma o concurso específico implicaría a liberación duns 30 postos de traballo que agora están bloqueados.

A estas alturas a solución non é doada, pois fagan o que fagan, van ter que ofertar postos que non pasaron polo concurso. E dende logo non poden ofertar postos de xefatura con nivel sen pasar primeiro polo concurso de traslados. Así que non queda outra que, se non teñen o número de postos necesarios, terán que crealos.

A DXEP asegura que si teñen os postos necesarios, pero dado que hai moitos postos abertos a A1-montes e A2-forestais, que hai un risco de que non lles cheguen se moitas persoas de A1 collen postos de A1/A2. Asegura que teñen outras alternativas, e comprométese a que nunha ou duas semanas os sindicatos seremos convocados a falar.

Xa adianta que isto implicará un atraso nas eleccións de destino.