Novas por contido

Nova labazada xudicial á Xunta polo recurso de casación en interese de lei que interpuxo contra unha sentenza gañada pola CIG.

O Tribunal Superior de Xustiza de Galiza vén de ditar unha sentenza na que se confirma que a Xunta recortou ilegalmente unha parte da paga extraordinaria do ano 2013. O alto tribunal galego resolve deste xeito en reposta a un recurso de casación en interese de lei presentado pola Xunta contra unha sentenza do Xulgado Contencioso Administrativo nº 1 de Vigo, gañada polos servizos xurídicos da CIG.

Esa sentenza inicial do xulgado vigués -coincidente co criterio de todos os xulgados que até este momento teñen ditado sentenzas en recursos promovidos pola CIG por este motivo-, indicaba que era ilegal descontar con carácter retroactivo a parte proporcional dos meses de xaneiro e febreiro de 2013, toda vez que a Lei de Orzamentos para ese exercicio non se publicou no DOG até o 1 de marzo, obrigando á Xunta a devolver o correspondente a eses dous meses.

Para a CIG chama poderosamente a atención a baixa catadura moral da administración dirixida polo Partido Popular cando fundamenta dun xeito catastrofista, en palabras do propio TSXG, o seu recurso contra a sentenza gañada pola CIG, entre outros aspectos, na situación “gravemente danosa para o interese xeral polo quebranto que supón para os intereses públicos de natureza económica ao supor o aboamento dos funcionarios públicos autonómicos de parte da paga extra, cuxo impacto valora en 23 millóns de euros, unido ao caos organizativo e a insuficiencia de créditos orzamentarios para atendelos”.

O mesmo Núñez Feijoo a quen non lle tremeu a man para roubarlle ao seu persoal 23 millóns de euros no ano 2013 parece que lle doe agora ter que devolver ese diñeiro.

A sentenza implica a obriga de publicación no DOG e pecha definitivamente a cuestión da paga extraordinaria de 2013, ao definir que a Xunta recortou ilegalmente unha terceira parte do complemento específico.

A CIG esixe unha vez máis da Administración Autonómica o compromiso de pagamento a todo o seu persoal desa parte proporcional da paga extra do 2013, unha vez que o Tribunal Superior confirma un dereito que xa viña sendo recoñecido polos diferentes tribunais do contencioso.

No caso de que o goberno galego siga a facer ouvidos xordos ás resolucións xudiciais, poderemos confirmar que a Xunta despreza absolutamente o seu persoal e obrígao a ir persoalmente aos tribunais de xustiza para gañar individualmente, aínda que teña custas para a Xunta, agardando a que a maioría do persoal non o faga e así ver reducido o que definiu como “un quebranto” para as arcas públicas. Nese caso, o compromiso da CIG manterase en estender todo o posíbel os xa máis de 1.000 recursos presentados tanto en vía administrativa como xudicial contra o recorte da paga extra.

Outras novas recentes

Venres, 22 Agosto 2025

Máis de 45.000 persoas bótanse á rúa en toda Galiza contra a política forestal do PP e en solidariedade coas persoas afectadas pola vaga ...

A CIG reclama medidas inmediatas para recuperar os bens e paliar as consecuencias, e un servizo público único, de xestión directa e dependente da Xunta de Galiza, para traballar na prevención e respostar ás multiemerxencias do medio natural e rural durante  todo o ano. Un total de 29 localidades de todo o país acolleron o 21 de agosto mobilizacións multitudinarias...
Martes, 19 Agosto 2025

A CIG critica a caótica xestión do Goberno galego en materia de persoal de incendios

Alertamos de que se están a facer chamamentos en plena vaga de lumes sen tempo para formar en prevención. Dende a CIG-Autonómica denuncia a caótica xestión da Xunta de Galiza en materia de persoal do Servizo de Prevención e Defensa contra Incendios Forestais (SPIF), até o punto de que a día de hoxe aínda non se coñecen nin as vacantes que están por cubrir. Temos datos de...
Mércores, 20 Agosto 2025

‘Por un Monte Galego con Futuro’ convoca protestas contra a política forestal do PP “que queima os montes e as casas”

A CIG fai un chamamento a participar nas 26 concentracións que terán lugar en cidades e vilas de todo o país este xoves 21 a partir das 20:00h A plataforma ‘Por un monte Galego con Futuro’ convoca mobilizacións para denunciar que a actual vaga de incendios que está a padecer Galiza é consecuencia directa da política forestal do PP, unha política forestal que, tal e como...