Novas por contido

Entre as modificacións mantense a mobilidade forzosa a través da adscrición de postos de traballo a chiringuitos e o nomeamento a dedo de máis de 300 xefaturas de servizo.

Na Comisión de Persoal da Administración Autonómica celebrada o 18/10/2010 aprobouse un Anteproxecto de Lei de Orzamentos que mantén varias modificacións polémicas e regresivas dos dereitos do persoal da Xunta consagrados na Lei de Función Pública de Galicia.

A CIG-Autonómica entende que estas modificacións están destinadas a deseñar unha Administración Pública ao servizo de intereses políticos que supón unha degradación da Función Pública galega e un atentado contra os dereitos do persoal funcionario da Xunta de Galicia. A modificación da Lei de Función Pública, co visto e prace de CSI-F e UGT, deixa os nosos dereitos en mans de decisións políticas. A saber: 1) o dereito a inamobilidade e 2) a carreira profesional. Tal e como está a modificación, a Xunta segue tendo a posibilidade de ningunear os efectos dos concursos de traslados e mover forzosamente unidades enteiras a outros órganos ou incluso entidades da administración paralela. Por outra banda, os postos de xefatura de servizo recuperan definitivamente o seu método de provisión por LD, un sistema  reaccionario, que non garante os principios de mérito e capacidade, limitando así a carreira administrativa para quen non ten padriño ou madriña.


MOBILIDADE FORZOSA

Despois dunha semana onde a Xunta pretendeu escenificar unha falsa negociación, acceden a modificar a redacción do artigo onde se contemplaba a mobilidade forzosa. Compre dicir que a Xunta nunca facilitou unha relación de unidades deficitarias de persoal nin un estudo que avalase as súas afirmacións.

Nun primeiro momento se contemplaba a mobilidade forzosa da persoa a outros postos e localidades coa posibilidade de voltar ao posto de orixe. A modificación aprobada hoxe contempla a posibilidade de que a Xunta non só mova á persoa funcionaria senón tamén o seu posto co cal o cambio sería permanente e non habería retorno.

Esta facultade comprende a posibilidade de adscribir postos de traballo das diferentes consellarías, delegacións e localidades a outras distintas e incluso o poder adscribir o posto de traballo a Axencias e entidades da Administración Paralela, dos chiringuitos.


XEFES/AS DE SERVIZO NOMEADOS A DEDO

Durante o actual mandato do Partido Popular, a Administración seguiu a manter que existiría un concurso específico para optar ás Xefaturas de Servizo por parte do persoal funcionario dos grupos A1 e A2, tal e como marcaba o Acordo asinado entre a Administración do anterior goberno e as organizacións sindicais.

Este acordo e a súa execución rematarían coa discrecionalidade no nomeamento destes postos, dando a oportunidade a todo o persoal funcionario que cumprisen os requisitos de poder optar a eles. O froito deste acordo sería unha Administración máis democrática onde primarían os méritos técnicos sobre a afinidade política gañando a Administración en calidade e eficacia.

Despois de manter a mentira durante ano e medio a Xunta opta por voltar aos tempos escuros da Era Fraga e apostar outra vez pola afinidade política para conceder eses postos que son de carácter eminentemente técnico. Un fraude para toda a poboación galega en xeral e para o persoal da Xunta en particular.

Ademais, esta modificación non abre só as Xefaturas de Servizo á libre designación senón que contempla a posibilidade de facelo con outros postos de nivel inferior.


En definitiva, esta reforma parte dunha imposición que non foi negociada realmente e ten un significado político claro, controlar politicamente a estrutura técnica superior dos departamentos nomeando a persoas afíns ao Partido Popular e ter as mans libres para mover ás persoas funcionarias a onde se considere sen ningún atranco.

Dende a CIG-Autonómica consideramos gravísimo que dúas centrais sindicais se preguen a imposición de Feijoo, imposición que deteriora o emprego público, que politiza no sentido máis perverso da palabra a Administración galega, que sementa a arbitrariedade como criterio dos nomeamentos, e que pon en perigo a carreira profesional e a estabilidade das empregadas e empregados públicos.

Documentos relacionados:

Proposta achegada á Comisión de Persoal do 18/10/2010 (en vermello cambios respecto á proposta incial)

Proposta inicial. 11/10/2010.

Descarga: texto consolidado da reforma da Lei da función pública.


Outras novas recentes

Venres, 03 Outubro 2025

Persoal da Xunta de Galiza reclama unha solución inmediata á parálise dos concursos de traslados (Concentración 30/09/2025)

A CIG demanda unha prelación xusta, axilidade na resolución, máis medios e a duplicidade dos postos bloqueados por medidas xudiciais Traballadoras e traballadores da Xunta de Galiza concentráronse na mañá do martes 30 de setembro de 2025 diante do edificio administrativo de San Caetano para esixir unha solución inmediata aos concursos de traslados, paralizados dende hai...
Luns, 06 Outubro 2025

A Xunta, cómplice de maltrato nas residencias

Dende a CIG apoiamos a loita do Comité de Empresa de Política Social fronte á posición de desleixo e inacción da Cosellaría, incapaz de aportar solución algunha ante o maltrato e as agresións que están a sufrir o persoal das residencias e as usuarias e usuarios.   Dende o Comité de Empresa de Política Social de Pontevedra convocouse o pasado venres 3 de outubro unha...
Mércores, 01 Outubro 2025

Concurso de traslados de enxeñarías, arquitectura e ciencias: apertura do prazo de toma de posesión

No DOG do 01/10/2025 publican a RESOLUCIÓN do 24 de setembro de 2025, da Dirección Xeral de Emprego Público e Administración de Persoal, pola que se modifica a Resolución do 9 de xullo de 2025 pola que se resolve o concurso ordinario para a provisión de postos de traballo vacantes de corpos e escalas de Administración especial da Administración xeral da Comunidade Autónoma...