Aínda que estas semanas foron de bastante movemento, tras comprobar os datos, facemonos eco dunha queixa que nos achegaron un grupo de opositores con relación a disparidade no ratio de aprobados/praza do primeiro exercicio destes dous procesos selectivos. No caso do A1 informática pasaron ao segundo exercicio 4 persoas/praza mentres que no A2 foron máis do dobre, 10 persoas/praza.
Dentro do respecto á independencia dos tribunais, vimos de solicitar á Dirección Xeral de Función Pública unha explicación sobre esta disparidade de situacións que da lugar a agravios comparativos entre as persoas aspirantes dos diferentes procesos.
Desde a CIG-Autonómica consideramos que este tipo de disparidades son debidas á falta de criterios claros e axeitadamente establecidos nas convocatorias dos procesos selectivos e na normativa de selección; e, por iso, instamos á Dirección Xeral de Función Pública a que se tomen as medidas oportunas para evitar as distorsións con relación ao número de aprobados/praza que se puideren producir nun futuro.
Na resolución do A1 informática establécese a nota de corte do primeiro exercicio nas diferentes quendas de promoción interna (4 prazas) e acceso libre (9 prazas) en 62 respostas correctas e 50 no caso dos aspirantes da base I.I.3 (2 prazas) de 120 preguntas totais.
Na resolución do A2 informática establécese a nota de corte do primeiro exercicio nas diferentes quendas de promoción interna (2 prazas), acceso libre (5 prazas) e dos aspirantes da base I.I.3 (1 praza) en 50 respostas correctas de 100 preguntas totais.
A pesar de que ambos tribunais estableceron a nota de corte nun 50% aproximado de respostas correctas, prodúcese unha distorsión con respecto a proporción de persoas aprobadas respecto ás prazas ofertadas.
Das listaxes de persoas aprobadas na páxina web de Función Pública temos que en total superaron o primeiro exercicio: 64 persoas no A1 e 79 persoas no A2.
Das convocatorias dos procesos selectivos temos que o número de prazas totais ofertadas son de 15 no caso o A1 e 8 no A2. Así pois temos que para o segundo exercicio no caso do A1 informática pasan aproximadamente 4 aspirantes/praza mentres no A2 o ratio chega a case 10 aspirantes/praza.
A1 informática = Escala de sistemas e tecnoloxías da información. Convocatoria (2011)
A2 informática = Escala de xestión de sistemas da información. Convocatoria (2011)