O 13 de marzo pasado desenvolveuse o terceiro exercicio do proceso selectivo para o ingreso no corpo de xestión da Administración da Xunta de Galiza, subgrupo A2, escala de xestión e sistemas de información. Foi un exame din que difícil, segundo algúns que o fixeron, pero non para todos.
A semana anterior a Axencia de Modernización Tecnolóxica de Galiza (AMTEGA) coa participación directa do subdirector xeral de Calidade, Interoperabilidade e Seguridade, á sazón presidente do Tribunal do subgrupo A2, escala de xestión e sistemas da información, levou a cabo unha serie de sesións informativas para o persoal informático das distintas xefaturas territoriais con respecto á modificación dos postos de traballo afectados coa nova incorporación á AMTEGA.
Nestas sesións informativas, casualmente, tratábase unha temática similar á do exame que posteriormente se desenvolvería o 13 de marzo para o grupo A2 de informática. Casualmente tamén, moitos dos participantes nesas xornadas eran aspirantes que ían participar nese exame. A última das casualidades era que un poñentes, é tamén o presidente do tribunal dese proceso selectivo.
Non parece correcto que un suposto sobre o que o presidente do tribunal deu unha serie de charlas a varios dos opositores se reproduza nun exame, xa que iso dálles unha vantaxe competitiva. E non por ser as charlas sobre o caso concreto do CAU da Xunta e o exame sobre un xenérico CAU, se obvia tal vantaxe.
Tendo ademais en conta que os contidos destas charlas, así como varios materiais sobre a futura configuración da Axencia e do CAU circularon por correo antes da rolda informativa do presidente do tribunal, o cariz deste asunto tórnase aínda pior.
Por unha cuestión de saúde pública e para alonxar toda sombra de sospeita, Función Pública debe adoptar medidas, o tribunal debe dimitir e se debe repetir o exame. A Función Pública galega non pode soportar un caso máis de escándalo nun proceso selectivo. Non debería permitir, nen sequera por asomo, a dúbida sobre ningún proceso, e dende a CIG creemos que neste se dan elementos suficientes para considerar que se vulneraron os dereitos dos opositores e que moitos deles xogaron con vantaxe.
Non imos valorar aquí se nisto hai boa fe ou intereses dalgún tipo. Simplemente constatamos o feito e quen ten que dar resposta non satisface de ningún xeito as nosas demandas polo que a única solución válida e transparente que deixe sen mácula e que inspire confianza nos procesos selectivos da Xunta de Galiza pasa por proceder do xeito seguinte:
1. Dimisión do tribunal do proceso selectivo do A2, escala de xestión e sistemas de información.
2. Repetición do terceiro exercicio do proceso selectivo.
Nota remitida aos medios
Esta nota ten a súa orixe na comunicación do propio director xeral de Función Pública o 26 de marzo das denuncias de varias persoas opositoras. Posteriormente, a CIG-Autonómica ponse en contacto coas persoas afectadas e recompila datos suficientes para elaborar esta nota.
