Semella que a sinatura do acordo dos Asuntos Propios está a producir remordementos de conciencia entre algún dos sindicatos asinantes, o que o leva a facer uso da mentira, a manipulación e a demagoxia en contra da CIG.

Mentira porque acusar á CIG de non manifestarse na Mesa Xeral de Empregados Públicos e na Comisión de Persoal do 15 de outubro é faltar á verdade e unha noxenta maneira de tapar as súas propias vergoñas.

Como xa relatamos en días pasados e aínda que a UGT non lle goste, a CIG si se manifestou, e nun exercicio de coherencia expuxo que se á hora de recortar dereitos dos/as empregados/as públicos/as non se tivo en conta a opinión sindical, cando menos a da CIG, para a restitución de parte deses dereitos non se pode pretender contar co visto e prace sindical, polo que a CIG negouse a votar na Comisión de Persoal.

Mentira tamén cando din que de non asinarse pola maioría das centrais sindicais non se podería gozar dos días no 2015 e habería que esperar a modificación legal “requirida”. O RD Lei 10/2015 non obriga a ningunha modificación lexislativa e menos a un acordo de transposición entre a Administración e as OOSS, senón que habilita ao goberno para que exercendo a súa potestade regulamentaria faga as modificacións, neste caso podería facelo por decreto da Xunta de xeito inmediato, tal e como indica o RD "cada Administración Pública poderá establecer..."

Neste senso é importante sinalar que na Administración Xeral do Estado están a disfrutar deses días de AAPP e vacacións por antigüidade dende o 12 de setembro mentres que na Galiza o PP estivo dando largas ao asunto case un mes para finalmente embaucar aos resto de OOSS.

Manipulación porque se pretende confundir aos empregados/as públicos/as desviando o foco de atención cara o posicionamento da CIG, obviando o realmente importante que é que o acordo asinado non recolle a recuperación dos nove días de AAPP que tiñamos na Galiza.

E demagoxia por dicir que se pola CIG fora, non se negocia nin se recupera nada. Nada máis lonxe da realidade, a CIG loita e loitará polos intereses das traballadoras/es públicos, pero o que non vai facer é tragar con rodas de muíño como este acordo ou, por poñer outro exemplo, coa LOFAXGA, que saíu adiante co apoio do resto de OOSS e que agora se botan as mans á cabeza cando a Administración a aplica.

Polo tanto, demagoxias as xustas, que todos/as nos coñecemos.