Os asuntos que están enriba da mesa son de tanta importancia e para tantos compañeiros e compañeiras, que non vamos aceptar que o despachen nunha xuntanza sen tempo a estudar en serio as cousas.

A Dirección Xeral de Función Pública convocounos a dúas xuntanzas para o venres 20 de maio, nas que se van tratar os criterios e o decreto de oferta derivados da Lei 20/21 (de abuso da temporalidade), tanto para os postos da Administración da Xunta, como para as escalas sanitarias (escalas de administración que son xestionadas por Sanidade). Tamén vai a RPT de Medio Ambiente, Territorio e Vivenda e a RPT de Cultura. A maiores de termos que revisar moitísimas actas atrasadas de Mesas Xerais e Mesas Sectoriais de Funcionarios que deixaron acumular.

A convocatoria e toda a morea de documentación para esas xuntanzas achegáranola o mércores 18. Por minutos non deixan sequera 48 horas entre convocatoria e o comezo da primeira reunión.

Contábamos, xa que logo, co xoves para preparar todo o armatoste. Pero debeulles parecer pouco que puxeron en marcha a táctica de saturar ás persoas que teñen que negociar en representación do persoal. Así, o mesmo mércores 18 fomos convocados para unha xuntanza previa para o xoves 19 co director xeral de Función Pública para tratar os mesmos asuntos do día seguinte, venres 20. Esto é, que nos eliminaron o día que tiñamos para estudar a documentación, verificar a existencia de cambios en base ás alegacións presentadas e preparar a resposta.

En paralelo, recibimos tamén a convocatoria para outra xuntanza previa, tamén para o mesmo xoves 19, con Sanidade, para tratar os criterios e OEP das escalas sanitarias e que tamén se tratarían en Mesa o venres 20. Outra xuntanza para o día 19, e por tanto tamén sen tempo para estudala.

Para maior fartura, a proposta de OEP de escalas sanitarias iría a dúas xuntanzas "paripé", en días consecutivos, sen tempo a que valorasen nada do que os sindicatos puideramos manifestar, pois Sanidade xa levou esa documentación a unha mesa de negociación coa representación sindical do persoal estatutario, cando saben sobradamente que as escalas sanitarias son persoal funcionario de administración e por tanto somos nós os lexítimos e lexítimas representantes do persoal, e non o persoal estatutario. Esta claro que non van mover unha vírgula nin mellorar a esfameada oferta de emprego.

En definitiva, que para facer o primo que non contén connosco, e advertímoslles que se observamos o máis mínimo buraco xurídico, iremos por el. Isto non é negociar: e vacilar ao persoal empregado público.

Verémonos con Función Pública e con Sanidade o venres 20, na Mesa Xeral de Negociación de Empregados Públicos e na Mesa Sectorial de Negociación do Persoal Funcionario.