- Detalles
A última sentenza do TSXG gañada pola CIG remata coa chantaxe ao que estaba sometido o persoal laboral fixo para cobrar a carreira profesional: xa non é necesario funcionarizarse.
A Xunta resposta atropeladamente á sentenza contra a Orde de confección de nóminas do 2019 enviando para aprobar a toda presa na mesa xeral a RPT das prazas a funcionarizar para apurar a toma de posesión e manter a chantaxe, a pesar de que non temos negociados os dereitos laborais.
Na CIG solicitamos unha xuntanza con Función Pública para executar a sentenza e que abra un novo prazo para poder solicitar a carreira a todo o persoal, fixo, interino e temporal.
No decreto de funcionarización non hai ningunha referencia aos dereitos laborais
A maior parte dos postos que se funcionarizan teñen condicións laborais específicas como o traballo a quendas, as noites, a penosidade ou traballo con cargas ou tóxicos. A Xunta con CCOO e UGT negáronse a regular as condicións laborais e nin sequera garanten os dereitos que temos hoxe.
E non paran de chegar queixas das categorías que xa foron funcionarizadas, a pesar de que nos dixeron que “ian quedar igual”: neste nadal non cobramos a paga extra como antes, obrigáronnos a estar no centro cando pecha a usuarios e nos impuxeron horarios. Que cristo van armar agora coa funcionarización do persoal bombeiro, ou de centros educativos ou de residencias?
O persoal que se funcionariza vai quedar sen convenio e a Xunta, CCOO e UGT negáronse a traspasar os dereitos á Lei de Emprego Público. Na CIG opoñémonos a unha funcionarización sen regulación das relacións laborais e esiximos á Xunta, previa a funcionarización, un Acordo regulador das condicións de traballo.
Que perdemos coa funcionarización si non trasladamos os dereitos do V Convenio?
1. A negociación de carteleiras (o que na práctica supón imposición horaria e de quendas), as compensacións e os límites de fines de semana e festivos, etc.
2. O dereito a roupa de traballo anual, material…
3. As superiores categorías
4. As adscricións reguladas
5. Os trienios de 31,88
6. Os pluses salariais e a reclamación de cantidades
7. A promoción interna do 50%
8. Acudir ao xulgado do social se tes problemas (sen custes e rápido)
9. A posibilidade de presentar un conflito colectivo
10. A xubilación parcial anticipada e o resto de dereitos ancorados ao contrato de traballo
- Detalles
No DOG do 09/02/2022 a EGAP publica a Resolución do 8 de febreiro de 2022 pola que se convocan as actividades de formación continua en materia de idiomas para o persoal ao servizo da Administración pública da Comunidade Autónoma, das entidades públicas instrumentais, da Administración institucional de Galiza, da Administración de xustiza, das entidades locais e persoal de administración e servizos (PAS) das universidades do Sistema universitario de Galicia (SUG).
A EGAP convoca 51 edicións e 2085 prazas en cursos de inglés, francés, alemán, portugués, italiano e lingua de signos.
As solicitudes de participación nas actividades formativas só poderán realizarse mediante o formulario de matrícula telemática dispoñible desde as 8.00 horas da data de inicio do prazo de presentación de solicitudes e ata as 23.55 horas da data de finalización (día 23 de febreiro). As solicitudes entenderanse presentadas unha vez que se complete correctamente o proceso de matriculación.
O número máximo de actividades formativas que se poden solicitar nesta convocatoria limítase a tres.
Debido á alta demanda dos cursos de idiomas na modalidade de teleformación, establécense as seguintes limitacións:
– Cada persoa só poderá solicitar un nivel por cada idioma ofertado na modalidade de teleformación.
– Non se poderá solicitar o mesmo nivel cursado na anterior convocatoria
- Detalles
Xa todo o mundo fala do venres 11 de febreiro como unha data clave do concurso de traslados de corpos xerais.. pero ainda hai moita confusión.
O propio director xeral de Función Pública referiuse a ese día 11 como a data en que se vai publicar a adxudicación definitiva das prazas no web de Función Pública, e que unha ou dúas semanas despois publicarían no DOG a correspondente Resolución.
A toma de posesión en diferido
A toma de posesión segue a ser un misterio. Ao puro estilo PP, será en diferido? Moita xente fala de maio (cando se cumpren os 6 meses da ampliación de prazo para a resolución do concurso). Pero na CIG ata o poñémos en dúbida, pois temos o problema non resolto das algo máis de 80 prazas de persoal funcionario ocupadas por persoal laboral indefinido non fixo por sentenza, e que por lei calquera destas persoas poden tumbar o concurso xudicialmente se lles collen o posto antes de que se resolva o proceso selectivo que está actualmente en execución.
O director xeral non foi claro na súa información de cando sería a toma de posesión: non dá prazos nin motivos. O que manifesta é que a resolución do concurso coincidirá no tempo coa toma de posesión definitiva das persoas da anterior promoción interna e libre que actualmente están en destino provisional. Pero nada comenta dos procesos que están en execución, tanto de promoción interna como de libre, e que afecta a esas 80 prazas de persoal indefinido non fixo que poden tumbar o concurso.
Por tanto, xúrdenos dúbidas de por que non fai mención a isto último, e as posibilidade son moitas:
- Que as 80 prazas non foran adxudicadas a ninguén no concurso, e Función Pública ao ter estes datos decida non agardar pola resolución dos procesos selectivos ao non haber o perigo de ocupar eses postos por concurrso antes que por proceso selectivo.
- Que si haxa adxudicación dalgún deses postos no concurso, pero Función Pública decidira dalos igualmente, asumindo que o persoal que está neses postos poida ir ao xulgado e incluso gañar. Esto é, darlle unha patada para adiante ao problema e dentro dun tempo xa dirá a xustiza se hai que mover postos.
- Que hipoteticamente si puideran ser adxudicadas pero Función Pública decidira retiralas do concurso de tapadillo, sen dar explicacións.
Fai máis dun ano que a CIG ofreceu ao director xeral a solución de retirar eses 80 postos do concurso e ofertalos no seguinte. Abertamente, non de tapadillo. Se tivera feito así, o concurso podía estar resolto fai moitisimo tempo.
Con este escenario, alguén se atreve a falar de maio para a toma de posesión?
- Detalles
Pao xudicial á Xunta polas prórrogas non motivadas das comisións de servizo. A CIG denunciou no 2019 a prórroga non motivada de 347 comisións de servizos por falta de xustificación da sua prórroga, algunha dende o ano 2010.
A mala xestión das persoas responsábeis da Dirección Xeral de Función Pública cos concursos de traslados fixo que a comisión de servizo fose para moitas compañeiras e compañeiros a única opción de mobilidade ou, incluso, de ter algo de carreira administrativa. Para máis, a súa concesión opaca e sen criterios obxectivos de selección asenta na administración xeral un sistema caciquil e vergoñento de provisión de postos. A Xunta non dá datos de quen solicita a comisión, non motiva a decisión da persoa seleccionada, nin o tempo, ou os motivos da prórroga.
Por iso a CIG, logo de recompilar unha a unha máis de 347 comisións de servizo de longuísima duración, algunhas de máis de 10 anos e por tanto que se pasaban do prazo legal, e que nin sequera se ofertaron en concursos de traslados, denunciámolas ao tempo que seguimos a reclamar un sistema de provisión de postos áxil e transparente pos as comisións deberan ser algo puntual xa que a fórmula ordinaria debera ser o concurso de traslados (permanente ou anual). E para que as comisións non sexan “a dedo” necesitamos un decreto de provisión que as regule de forma clara e con baremo.
O fallo do xulgado do contencioso-administrativo número 2 de Compostela, obrígalle a Xunta a respostar en 30 días á solicitude da CIG, polo que deben xustificar todas e cada unha das prórrogas de comisións de servizos que se pasaban de dous anos no 2019. Se a Xunta non motiva adecuadamente a súa excepcionalidade (e vai telo difícil), a CIG esixirá responsabilidades.
Na CIG vemos positiva esta sentenza que supón un chanzo máis na loita contra a nefasta política de persoal da Xunta, mostra de que non vale o nepotismo instaurado por Función Pública e imos facendo camiño para que o persoal empregado público teñamos dereito a acceder en igualdade de condicións a unha praza en comisión de servizos.
Comisión de Persoal 9/2/22: RPT GAIN e CEEI, modificación decreto listas, regulamento plan igualdade
- Detalles
Estamos convocados a unha Comisión de Persoal para o mércores 9/2/2022, onde se vai aprobar:
- Proposta de modificación da RPT da Axencia Galega de Innovación (GAIN). Descargar
- Proposta de modificación da RPT da Vicepresidencia segunda e consellería de Economía, Empresa e Innovación. Descargar.
- Proxecto de Decreto polo que se modifica o Decreto 37/2006, polo que se regula o nomeamento de persoal interino para o desempeño con carácter transitorio de prazas reservadas a funcionarios e a contratación temporal de persoal laboral da Xunta de Galiza. Descargar.
- Regulamento interno de creación e funcionamento da Comisión negociadora para a elaboración do Plan de Igualdade na administración xeral da Comunidade Autónoma e das entidades instrumentais do sector público autonómico. Descargar.
Esta convocatoria, coa correspondente documentación, foi enviada antes da Mesa Xeral de negociación, o que indica que non teñen vontade algunha de mover unha letra.
- Detalles
No DOG do 07/02/2022 publican as resolucións polas que fan público o procedemento para a acreditación dos méritos correspondentes á fase de oposición dos seguintes procesos selectivos:
- Acceso libre e promoción interna, no corpo facultativo de grao medio da escala de técnicos facultativos de servizos sociais, especialidade de enfermaría (subgrupo A2).
- Acceso libre e promoción interna, no corpo facultativo de grao medio da escala de técnicos facultativos de servizos sociais, especialidade educadores (subgrupo A2).
- Ingreso na escala de auxiliares de clínica, subgrupo C2.
- Extraordinario de consolidación para o ingreso na categoría 007 do grupo II.
- Ingreso na agrupación profesional de persoal funcionario subalterno.
- Extraordinario de consolidación para o ingreso na categoría 003 do grupo V (ordenanza e outras).
- Extraordinario de consolidación para o ingreso na categoría 002 do grupo III e categoría 062 do grupo III.
- Acceso libre e promoción internamna especialidade de bioloxía (subgrupo A1).
O prazo é de 10 días hábiles a contar dende o seguinte a esta publicación ( ata 21 de febreiro).
O proceso é o mesmo para todos os procesos. Será o seguinte:
- Acceder ao expediente no seguinte enlace: https://www.xunta.gal/funcion-publica/expediente-administrativo
- Unha vez no expediente hai dúas opcións:
- Validar a información que figura no expediente por estar completa. Marcar opción de validar e no motivo poñer: fase de concurso de proceso selectivo ( opción 2). A continuación xerar PDF que será o xustificante de validación e conformidade do procedemento.
- Mostrar a disconformidade. As fases a continuación son:
- Completar ou correxir a información
- Xerar impreso de enmenda. No motivo marcar a opción 2 :fase de concurso de proceso selectivo. Nos datos da unidade de persoal en “nome “ poñer: Dirección Xeral da Función Pública e en “dirección” poñer: Edificio Administrativo de S. Caetano. Santiago de Compostela
- Pechar e xerar impreso de enmenda. Rexistrar xunto coa documentación acreditativa dos méritos alegados na enmenda.
Os procesos afectados son:
- A2 Enfermería: méritos ata 6 novembro 2019
- A2 educadores: méritos ata 6 novembro 2019
- C2 auxiliar de enfermería:méritos ata 25 febreiro 2019
- II-007 titulado medio: méritos ata 26 novembro 2019
- V-003 ordenanza: méritos ata 11 marzo de 2019
- III-002 e III-062 administrativos: méritos ata 25 de novembro de 2019
- A1 Bioloxía: méritos ata 28 de novembro de 2019
- Ap, subalternos: méritos ata 11 marzo de 2019
Hai un teléfono para incidencias: 881 99 98 83
- Detalles
A Dirección Xeral de Función Pública achegounos a súa proposta de Relación de Postos de Traballo de funcionarización de postos que irían ás diferentes escalas e especialidades de varias consellerías (Presidencia, Xustiza, Sanidade, Política Social, Cultura, Educación, Mar, Economía, Medio Rural).
A maiores dos anexos e taboas de equivalencias cos datos polo miudo de cada posto, vai outro arquivo que contén un resumo de criterios/orzamentos.
Se queres aportar algo, contacta coa CIG.
- Detalles
A semana pasada fomos convocadas pola consellería de Infraestruturas a unha reunión para darnos información aos representantes sindicais e delegados/as de prevención sobre as obras que se van a acometer no edificio.
Primeiro de todo congratularnos de que haxa consellerías que de motu propio facilitan información completa e axeitada de temas que afectan ao día día dos traballadores e traballadoras. Parabéns por iso e a ver se se estende a iniciativa ao resto.
En concreto, as obras van afectar ao denominado edificio dos espellos no que se vai a acometer o cambio do tellado e a retirada da fachada acristalada e a instalación dunha nova fachada con paramento e fiestras similares ao resto de edificacións de San Caetano.
O prazo de realización das obras será dun ano e comeza xa estes días. Efectuarase en sete fases comezando polo edificio de planta baixa e seguindo polo bloque de pisos.
É unha obra importante que implicará a construción interior duns novos tabiques temporais para aillar as zonas de traballo do persoal da zona de instalación da nova fachada. Informáronnos que a meirande parte do traballo vaise asumir polas tardes pero aínda así haberá traballo matinal, tratando de afectar o menos posible ao traballo administrativo.
De todos os xeitos cando sexa inviábel o traballo nas oficinas vaise conceder un teletraballo especial polos días de afectación das obras en cada unidade.
Agradecemos de novo a información e quedamos á túa disposición para recompilar as incidencias que haxa nesta reforma que esperemos que sexan poucas.
- Detalles
O director xeral da Función Pública convocounos a unha videoconferencia sobre a RPT de funcionarización de Política Social, que vai ser o xoves 3 de febreiro.
A convocatoria xa nos demostra o interese que teñen en facer as cousas de xeito falado e negociado:
- Convocan a unha xuntanza "explicativa". É dicir, que nos van contar o que hai, e punto
- A convocatoria e documentación recibímola a véspera, mércores 2 de febreiro, e por tanto sen moito tempo para estudala polo miudo
E menos mal que a convocatoria chegou o día 2 de febreiro, porque levamos agardando algún tempo máis, dende que o pasado 23 de novembro o director xeral dixo, da súa boca, que nuns días remitirian a RPT de funcionarización (non só de Política Social), que abrangue a preto de 2.000 postos de traballo, e de seguido a do Consorcio, que a tiñan practicamente rematada.
- Detalles
Estamos convocados a unha reunión (Mesa Xeral de Empregados Públicos) o luns 7 de febreiro para tratar tres asuntos:
- Modificación da Relación de Postos de Traballo (RPT) da Axencia de protección da legalidade urbanística (APLU) e a súa adaptación á Lei 2/2015 de emprego público de Galiza. Descargar
- Modificación da RPT do Instituto de Estudos do Territorio (IET). Descargar
- Regulamento de funcionamento da Comisión negociadora para a elaboración do Plan de igualdade na administración xeral da Comunidade Autónoma de Galiza e das entidades instrumentais do sector público autonómico. Descargar
Se queres comunicarnos algo, contacta coa CIG.