- Detalles
A Administración convoca 4 mesas de negociación en unha hora para dar saída a varias cuestións, entre eles os concursos de traslados de bombeiros e axentes ambientais. Levabamos 15 anos sen concurso e en apenas 2 días sacan as bases sen prazo de alegacións e sen tempo entre Mesa Sectorial e Comisión de Personal. Iso si, nestas bases aceptaron retirar dúas cuestións fundamentais das bases xerais en negociación: a valoración do traballo desenvolvido en comisión de servizos e a caducidade da formación.
Atención: prazo previsto para a presentación de solicitudes entre o 11 e o 22 de decembro
CONCURSO DE PERSOAL BOMBEIRO FORESTAIL E VIXIANTE-EMISORISTA
Non aceptan baixar o mínimo de horas de formación para ser valorada e tampouco formación impartida pola consellería. O tempo traballado será valorado no posto de orixe. Mudan o texto das adscricións provisionais para que a adxudicacións vaian cunha listaxe de postos en orde de puntuación introducindo o seguinte nas bases:
“A adxudicación realizarase de conformidade cos criterios dispostos no artigo 38.3 do D 151/2022, tendo en conta a puntuación obtida e o numero de secuencia dos postos ofertados”
Apróbase en Comisión de Persoal co voto favorable de todas as organizacións sindicais (CIG+CCOO+CSIF+UGT)
CONCURSO DE TRASLADOS DE AXENTES AMBIENTAIS
As bases traen un erro garrafal no ámbito que, de manterse non podería concursar nin un só axente, pois ven para o B. Entendendo que é un erro que correxirán, pero non aclaran se poderán participar os axentes forestais funcionarios de carreira do C2. Solicitamos que corrixan e abran para todas as escalas e postos que son C1/C2.
Valoración de méritos específicos: Algúns postos teñen méritos como o PER para as Illas Atlánticas e o curso superior de investigación de incendios nas UIFO. Pedimos eliminar ambos, xa que o PER é de embarcacións de recreo e non ten sentido xa que non é valido para as profesionais e o curso superior non se lle ofertou a maioría do persoal.
E, se mudan a RPT, deberían meter as prazas das novas unidades, xa que sospeitamos que lle viñeron as presas con este concurso xustamente para asignar os novos postos “a dedo” en comisión de servizo. Non aceptan.
Reitérase que valoren a formación impartida polas consellerías, MITECO e CENEAM pero tampouco aceptan.
Buzón de postos: voltamos solicitar que metan 4 postos de xubilacións recentes e pedimos solución para os postos do buzón (uns están e outros non) que ocupan persoal do C2, tanto de interinos de longa duración (a Administración non quixo sacar as prazas a concurso de méritos) como do persoal das tres oportunidades que tiña que ter pasado a laboral fixo.
O director xeral de Función Pública argumenta que “non poden estabilizar porque non teñen a titulación e que van retirar todas as prazas do buzon do C2”. Pero nos insistimos que todos SI a teñen (a titulación hoxe segundo a LEPG é capataz forestal/ciclo medio). Deses malfaceres coa estabilización da lei 20/2021 veñen hoxe estes líos que afectan ao arredor de 20 prazas e compañeiros.
Como non houbo ningún arranxo destas bases, na CIG abstivémonos na votación na Comisión de Persoal xa que non podemos dar a nosa aprobación cando está cheo de eivas e erros. Pola contra, CCOO, UGT e a CSIF votaron a favor.
- Detalles
A consellería de Cultura, Educación, Formación Profesional e Universidades vén de convocarnos a unha xuntanza que terá lugar o 4/12/2023 para tratar a modificación parcial da RPT de Centros de Educación.
Se resulta do teu interese, aquí tes a súa proposta: descargar.
- Detalles
A dirección xeral de Función Pública convocounos a unha Mesa Xeral de Negociación de Empregados Públicos para o luns 4 de decembro, para discutir a proposta de Oferta de Emprego Público (OEP) do ano 2023 de escalas sanitarias (Lei 17/1989).
Previamente vamos ter unha xuntanza coa consellería de Sanidade o venres 1.
- Detalles
Achágannos dende a Dirección Xeral de Función Pública o listado de postos que ofertarán para a elección de destino de Emisoristas-Vixiantes Fixos, Bombeiros Forestais e Bombeiro Forestal Condutor Motobomba. Descargar
No DOG do mércores 29/11/23 publicaron a relación de persoas aspirantes que superaron o proceso selectivo (con corrección de erros no DOG do xoves 30/11/23), que terán que escoller destino provisional segundo se indica no DOG.
- Detalles
Temos en funcionamento unha canle de WhatsApp para enviar información ás persoas que desexen recibila. Podes subscribirte (ou tan só botar un ollo), tanto dende PC como dende móbil, seguindo esta ligazón: https://i.gal/wasapcigaut. Se non te amañas envía unha mensaxe ao 644707434 ou escríbenos.
Dentro de WhatsApp, as canles están no teu móbil en "novidades" (parte inferior da pantalla). Aí terás a nosa canle da CIG-Autonómica e as mensaxes que enviamos.
 |
Por defecto, a subscrición vai ter desactivada as notificacións, polo que non recibirás aviso cada vez que enviemos unha mensaxe. Se queres recibir aviso, terás que activar as notificacións da canle premendo na campá.
 |
- Detalles
Despois de semanas negociando as bases do concurso de traslados de Administración especial (que servirá de modelo para o resto de concursos), o director xeral de Función Pública (DXFP) convocounos para discutir e votar o día 30/11/23 os concursos de traslados das escalas do SPDCIF e de axentes técnicos ambientais.
CONCURSO DE TRASLADOS DA ESCALA DE AXENTES TÉCNICOS AMBIENTAIS
Convocatoria do concurso ordinario para a provisión de postos de traballo vacantes de corpos e escalas de Administración especial da Administración xeral da Comunidade Autónoma de Galicia, escala de axentes técnicos medioambientais. O borrador vai para a Mesa Sectorial de Negociación de Persoal funcionario e para a votación na Comisión de Persoal. Descargar o borrador e o anexo de postos
CONCURSO DE TRASLADOS DAS ESCALAS DO SPDCIF
Convocatoria do concurso ordinario para a provisión de postos de traballo vacantes de corpos e escalas de Administración especial da Administración xeral da Comunidade Autónoma de Galicia, escalas de Prevención e Defensa contra Incendios Forestais. O borrador vai tamén para a Mesa Sectorial de Negociación do Persoal funcionario e para a votación na Comisión de Persoal. Descargar o borrador e o anexo de postos
RETIRAN AS COMISIÓNS DE SERVIZO E A CADUCIDADE DA FORMACIÓN
Grazas á presión sindical finalmente Función Pública recuou e nestes borradores retiraron os dous principais problemas que existían:
- Comisións de servizo: no baremo de traballo desenvolvido, o traballo nun posto en comisión de servizos vai ser valorado como no posto de orixe, non no ocupado en comisión. Para a CIG era inaceptable que se valorase como mérito un traballo que se obtiña exclusivamente por decisión arbitraria, sen criterios, sen obxectividade, pola vontade de persoas superiores.
- A formación non caduca: finalmente os cursos de formación non van caducar aos 20 anos, como insistentemente mantiña o Goberno de Rueda. Así que todo o esforzo na formación vai ser valorado.
OS DEMÁIS CONCURSOS
As últimas intencións manifestadas polo DXFP é que os seguintes concursos serían o de escalas sociais, seguido do resto de escalas de administración especial. Do concurso de administración xeral (corpos xerais e escalas), non sabemos nada, simplemente non resposta cando mesa tras mesa manifestamos que queremos que se convoquen TODOS, para que poidan estar TODOS resoltos a 31/12/2024.
- Detalles
A Xunta publica a licitación da xestión das novas residencias de Compostela e Lugo
O goberno galego renuncia a que a xestión das residencias de maiores doadas pola Fundación Amancio Ortega sexa pública
Segundo un informe do Consello Superior de Investigacións Científicas (CSIC), Galiza está das últimas no cociente entre as prazas en residencias de maiores e as potenciais persoas usuarias. Hai 3,3 prazas por cada 100 persoas con 65 anos ou máis, segundo os datos a setembro de 2022.
Hai 11 comunidades autónomas no Estado nas que o cociente é mellor. Galiza é a terceira comunidade con máis porcentaxe de poboación por enriba de 65 anos, que representan o 26,1% dos habitantes.
Este informe confirma o peso da iniciativa privada neste sector, xa que o 77,4% das prazas que hai na Galiza son privadas e só o 22,6% son públicas. En cifras absolutas, dun total de 22.865 prazas, hai máis de 17.700 en mans privadas e menos de 5.200 en mans públicas; e nas provincias de Pontevedra e Ourense a porcentaxe que controlan as empresas privadas supera o 80%.
Pero a cousa non queda aí, porque varias das residencias públicas son de xestión privada, é dicir: constrúese a residencia con diñeiro público, dótase de material, mobiliario, etc., e despois entrégase a xestión ás empresas privadas, para o que se lle dá unha substanciosa cantidade de diñeiro público para que estas empresas contraten persoal e dean o servizo de atención as persoas usuarias.
No caso das residencias da Fundación Amancio Ortega, a Xunta recibe unhas residencias rematadas e dotadas de material e regala a xestión ás empresas privadas.
Con toda esta febre privatizadora, intrínseca ao modelo de xestión da dereita e extrema dereita, pérdense unha morea de postos de traballo no emprego público, que é o único que garante a calidade do servizo co foco posto nas persoas e o benestar social e non no beneficio empresarial, como xa se veu durante a pandemia da COVID.
Non ao expolio dos recursos públicos! O público é servizo, o privado beneficio!!
- Detalles
A CIG vota NON ao proxecto de decreto polo que se pretende regular o estatuto do persoal de I+D+i ao servizo da Administración da Comunidade Autónoma de Galiza por desintegrador, discriminatorio e sexista. Aínda así, o decreto foi adiante co voto a favor de CCOO, UGT e CSIF.
Función Pública mantén parado durante un ano o borrador de Estatuto do persoal de investigación que nos presentou en novembro de 2022 e preséntanolo agora aos sindicatos amplamente modificado e a toda présa
8 meses despois de que presentáramos as nosas alegacións á primeira proposta de decreto de persoal de investigación, Función Pública envíanos un novo borrador ateigado de cambios e dános 2 días para presentar alegacións.
Despois de 3 reunións nunha semana, Función Pública deu por finiquitada a negociación sen recoller ningunha das alegacións de calado. Agora entroulles a présa e queren que entre en vigor a primeiros de 2024.
Alegacións máis importantes da CIG que non foron recollidas pola Dirección Xeral da Función Pública:
1. INCLUSIÓN DO PERSOAL LABORAL, PERSOAL FUNCIONARIO E PERSOAL ESTATUTARIO
Demandamos unha vez máis que o estatuto de persoal de investigación contemple a posibilidade de que a carreira de I+D+i se poida realizar como persoal laboral, como persoal funcionario e como persoal estatutario. Este estatuto só contempla a posibilidade de persoal de I+D+i de carácter laboral.
A Lei 14/2011 da ciencia, a tecnoloxía e a innovación non obriga a que o persoal de investigación sexa exclusivamente laboral e, ademais, no ámbito do sector público autonómico hai, dende sempre, persoal de investigación laboral, funcionario e estatutario.
Con este proxecto de estatuto o actual persoal de I+D+i funcionario, para ter posibilidades de facer carreira de I+D+i, vai ter obrigatoriamente que renunciar á súa condición de persoal funcionario e converterse en persoal laboral, coas graves consecuencias e prexuízos que isto ten.
Isto conleva ou unha perda de dereitos ou unha exclusión da carreira de I+D+i para o persoal funcionario que leva anos dedicando os seus esforzos a contribuír ao avance da nosa sociedade. Supón, ademais, un prexuízo para o Sistema Galego de Investigación e Innovación pola previsíbel perda de capital humano experimentado que se vai producir.
Consideramos que o estatuto de persoal de investigación ten que recoller a posibilidade de que a carreira investigadora se poida realizar tamén como persoal funcionario e estatutario, contemplando as particularidades da investigación no ámbito sanitario dentro do SERGAS, non só para o persoal que desempeñe tarefas asistenciais, senón para todo o que participe na investigación sanitaria, implantando a figura do persoal investigador estatutario, coa definición de categorías profesionais específicas que permitan ao persoal estatutario do Servizo Galego de Saúde a dedicación de forma estable e estrutural a tarefas de investigación, consonte o previsto no artigo 85 da Lei 14/2007, do 3 de xullo, de investigación biomédica.
Non se entende este afán por limitar a carreira de I+D+i ao persoal laboral. A única explicación que se nos ocorre é outra das novidades deste decreto:
avaliación negativa = despedimento procedente
Este decreto introduce un novo suposto de despedimento procedente non contemplado no Estatuto dos traballadores e traballadoras: a avaliación negativa aos 5 anos. Vén a ser un período de proba de 5 anos.
A CIG non vai apoiar un decreto que inclúa un novo suposto de despedimento procedente non contemplado no Estatuto dos traballadores e traballadoras.
2. INCLUSIÓN DE TODO O PERSOAL DE I+D+i: PERSOAL INVESTIGADOR, PERSOAL TÉCNICO E PERSOAL DE XESTIÓN
Demandamos de novo que este estatuto inclúa, como corresponde, ao conxunto completo do persoal de I+D+i: o persoal investigador, o persoal técnico e o persoal de xestión.
Este decreto deixa fóra a todo persoal de xestión e a parte do persoal técnico do Sistema de Investigación e Innovación público galego que depende de Función Pública.
A Lei 14/2011 da ciencia, a tecnoloxía e a innovación é clara cando establece no seu artigo 3.5 que é o Sistema Español de Ciencia, Tecnoloxía e Innovación, e concreta que forma parte deste sistema os seguinte persoal:
a) O persoal investigador
b) O persoal técnico
c) O persoal que realiza funcións de xestión, administración e servizos relacionados coa I+D, o a transferencia de coñecemento e a innovación
A Lei 14/2011 tamén define ao “persoal de investigación” no seu artigo 27.1, onde di:
Considerarase persoal de investigación ao servizo do Sistema Español de Ciencia, Tecnoloxía e Innovación ao persoal investigador, o persoal técnico e o persoal de xestión.
Na Lei 17/2022, pola que se modifica a Lei da ciencia, indícase que unha das principais características dos actuais equipos de I+D+i é o seu carácter multidisciplinar e a diversidade de perfís profesionais que os integran, como o persoal investigador, persoal técnico e persoal de xestión. Polo tanto, é imprescindíbel a inclusión expresa no Sistema Español de Ciencia, Tecnoloxía e Innovación do persoal técnico e de persoal que realiza funcións de xestión, administración e servizos, como elementos fundamentais del.
Que fai Función Pública neste decreto? Lonxe de respectar o estipulado na Lei da ciencia, con este estatuto de investigación deixa claro que para eles/as nin é fundamental nin é imprescindíbel o persoal técnico nin o persoal de xestión. Pretende excluílos e deixalos totalmente á marxe do Sistema de I+D+i, que disque que quere artellar e fomentar.
Por outra banda, no artigo 2.r), dentro dos seus obxectivos xerais, a Lei da ciencia indica o seguinte obxectivo:
Fomentar a carreira profesional e a mobilidade profesional do conxunto do persoal de investigación, científicos, técnicos e persoal de xestión.
E vai máis aló, xa que a propia Lei da ciencia di expresamente que tanto o persoal técnico como o persoal de xestión da I+D+i teñen dereito a unha carreira profesional semellante á do persoal investigador (artigo 27.2):
A carreira profesional e o réxime xurídico que regule a lei de ordenación da función pública da Administración xeral do Estado e a súa normativa de desenvolvemento serán aplicábeis ao persoal técnico e de xestión funcionario e laboral fixo ao servizo do Sistema Español de Ciencia, Tecnoloxía e Innovación. Así mesmo, este persoal terá dereito á carreira profesional ao amparo desta Lei en termos semellantes aos que contempla o artigo 25 para o persoal investigador.
Función Pública busca con este estatuto a alternativa máis barata, chapuceira e prexudicial tanto para o noso Sistema de I+D+i como para o seu persoal: obrigar a boa parte do persoal técnico e a todo o persoal de xestión da I+D+i a renunciar á carreira de investigación que lles corresponde, e a acollerse a outras alternativas que en nada teñen que ver co ámbito da I+D+i nin coa proposta que se lle fai ao persoal investigador, onde se contempla a mobilidade entre centros de I+D+i,, ao igual que as estadías formativas específicas, e unhas remuneracións e condicións na progresión da carreira considerabelmente mellores.
3. INCLUSIÓN DA PERSPECTIVA DE XÉNERO
Demandamos novamente que este estatuto de investigación inclúa a perspectiva de xénero no eido estratéxico da I+D+i e a realización previa dun estudo de impacto de xénero
Este estatuto carece da máis mínima perspectiva de xénero en todo o seu articulado, e non parte de ningún informe de xénero para coñecer cal é a situación da muller na I+D+i no cadro do persoal de investigación dependente de Función Pública e actuar en consecuencia coas debidas medidas.
A Lei da ciencia dedica dous extensos capítulos a introducir a perspectiva de xénero no Sistema Español de Ciencia, Tecnoloxía e Investigación, buscando convertelo nunha contorna inclusiva, diversa, segura e igualitaria.
Que fai Función Pública neste decreto? Seguir ignorando a Lei da ciencia ao máximo e tamén a normativa vixente de igualdade, como nos ten afeitas; nun ámbito particularmente competitivo e demandante onde hai que asegurar a progresión igualitaria na carreira profesional por parte das mulleres.
Pasou un ano dende os inicios da negociación deste decreto, e Función Pública nin incluíu a perspectiva de xénero nin ningunha das medidas establecidas na Lei da ciencia; e como é costume nesta administración, tampouco ofreceu ningún informe de impacto de xénero como lle solicitamos para poder responder con coñecemento de causa mediante este decreto aos desafíos de xénero e igualdade que presenta o colectivo de persoal de I+D+i e ofertar unha carreira profesional á altura das circunstancias.
NON A UN DECRETO DE INVESTIGACIÓN DESINTEGRADOR DO SISTEMA DE I+D+I , EXCLUÍNTE E MACHISTA!
- Detalles
O director xeral de Función Pública convocounos a varias xuntanzas que serán o luns 27/11/23, nas que se van a tratar os seguintes asuntos:
Convocatoria do concurso ordinario para a provisión de postos de traballo vacantes de corpos e escalas de Administración especial
- O borrador do concurso de traslados pasa a Mesa Sectorial de Negociación de Persoal Funcionario. En principio vai ser para as escalas do SPIF e Axentes Forestais/Ambientais, pero será o modelo a seguir polos seguintes (2º escalas sociais, 3º resto de escalas de especial). Descargar
Proxecto de decreto polo que se regula a organización, promoción e carreira profesional do persoal de investigación de carácter laboral
- Vai a votación na Comisión de Persoal. Descargar
- Detalles
Aprobada a Lei de igualdade no Parlamento de Galiza sen recoñecer a diversidade e obviando a existencia de discriminación de xénero no emprego
O PP vén de aprobar o 21 de novembro en solitario, e aproveitando a data sinalada do 25N, Día Internacional da Eliminación da Violencia contra as Mulleres, unha lei que é un simple compendio normativo e que constitúe un exemplo máis do mero uso ritual e instrumental da igualdade do que fai gala a Xunta, para fins unicamente de propaganda política e electoral, porque a igualdade de xénero “vende”. En palabras da conselleira de Igualdade, Elena Rivo, Galiza “está á vangarda da igualdade”, e para ela a diferenza entre a realidade e a ficción é inexistente, como o é para o resto das dirixentes do PP ao fronte das políticas galegas de igualdade de xénero.
Imos a remolque dos dereitos xa recoñecidos na lexislación europea e estatal, con demoras moi grandes e inxustificadas para poñelos en práctica, motivo polo que a CIG Autonómica votou en contra do anteproxecto. Esta Lei está lonxe de incorporar novos dereitos no camiño da igualdade, o único que fai é reproducir artigos completos xa recollidos na Lei de igualdade galega do ano 2004 e arrastrar terminoloxía desfasada e non concorde coa normativa máis actual, tanto internacional como estatal, en materia de igualdade. Non trae nin unha soa mellora ao persoal empregado público da Xunta, xa que non obriga á Administración a garantir dereitos que hoxe en día aínda non están ben establecidos na nosa normativa de aplicación.
A Xunta desvirtúa a discriminación positiva en seguidismo dos preceptos marcados pola ultradereita españolista
Até o de agora o sector público autonómico era unha fonte tradicional de emprego para as mulleres, e iso é positivo. Mais o goberno da Galiza do PP cambiou o criterio e vincula as medidas de igualdade á presenza máis ou menos equilibrada entre homes e mulleres dentro da Administración, como se este fose o único sector de emprego na sociedade galega, e malia a que tanto no sector privado como na industria temos unha maioría masculina. O sector público é un nicho de traballo feminino que debe seguir séndoo, non só en termos de equilibrio, senón tamén co reforzo da paridade naqueles postos ou categorías nas que as mulleres esteamos infrarrepresentadas, e nos postos de responsabilidadee.
Ademais, o sector público concentra as tarefas de coidados e, polo tanto, as actividades altamente feminizadas e con salarios baixos; isto explica, en grande medida, que a pesar de ser maioría de mulleres na Administración, os salarios globais delas son máis baixos cós dos homes. Nesta Lei debíanse establecer principios para garantir medidas concretas para a revisión salarial e de suba de conceptos retributivos nas categorías feminizadas dos niveis máis baixos da Administración.
Deixan agochados no armario os dereitos das persoas trans ou LGTBI+
Por outra banda, o articulado fai referenza única e exclusivamente a garantir a igualdade entre mulleres e homes, cando a realidade é moito máis diversa e debe ser contemplada na normativa. Obviar outro tipo de discriminacións ou non recoñecer dereitos para as persoas trans ou LGTBI+ nesta Lei é non dar cumprimento ás normativas máis avanzadas e recentes en materia de protección de dereitos á diversidade sexual e de xénero.
A hipocresía de dicir que se fai algo a prol da igualdade, cando na realidade se destrúe
A Xunta mantense na senda marcada da igualdade aparente, de compromisos baleiros e sen dotación orzamentaria, e de instrumentos normativos ocos e inútiles; unha postura esta que constitúe o seu particular muro de contención contra a igualdade de xénero e de oportunidades entre mulleres e homes, dende o cal, dun xeito cargado de hipocresía, se segue a practicar o contrario do que se predica e “vende” publicamente.
Unha mostra deste posicionamento témolo no I Plan de Igualdade da Administración Xeral da Xunta de Galiza (DOG do 10 de novembro de 2023). Nel formúlanse obxectivos para os vindeiros 4 anos que, xa de partida, son dereitos e obrigas recollidos na lexislación vixente. Isto supón unha nova manobra dilatoria e a inutilización de calquera plan de igualdade, que se converte así nun mero instrumento para frear calquera paso cara adiante que poida ser significativo, máis alá do xa existente na norma; un plan aprobado por Función Pública sen previamente levar a cabo, por exemplo, as auditorías salariais ou os rexistros retributivos, obrigados por lei, ou sen protocolo contra a violencia de xénero, e no que se inclúen medidas de retroceso na igualdade, como é a discriminación positiva dos homes no caso de infrarrepresentación masculina.
Se estamos á vangarda en algo, como queda patente, é no atraso nas políticas públicas de igualdade efectiva e real. Basta xa de sabotar os máis mínimos avances!
