Ás 19:00 horas do 23 de outubro de 2011, segue activo un incendio forestal iniciado ás 11:00 horas no concello lugués da Ribeira de Piquín, o de máis arborado da provincia. Van calcinadas máis de 500 hectáreas, principalmente de arborado, hai varias aldeas ameazadas polo lume: Piquín, Lamas, Moleiras, Sadradín, Ouviaña, Muxen..., arderon 2 vivendas deshabitadas en Moleiras e o incendio mantén unha fronte de 10 km. e avanza pola Ribeira de Piquín cara A Fonsagrada por unha banda e cara A Pontenova e Carballido pola outra.
Os veciños das aldeas afectadas levan todo o día colaborando para que o lume non chegue ás súas casas e nestes momentos xa hai un dispositivo considerábel loitando contra as lapas. Pero esta mañá tiveron que enfrontarse ao lume 1 brigada, un axente forestal e unha motobomba. Os medios aéreos non poideron intervir polas condicións meteorolóxicas e un dos membros da brigada resultou ferido.
Non se pode permitir que a neglixencia dos dirixentes políticos da Xunta de Galicia nos aboque a estas situación: hai compañeiros do Servizo de Prevención e Defensa Contra Incendios Forestais que levan feito xornadas de até 18 horas continuadas na extinción directa e a maior parte do dispositivo que quedou logo do masivo despedimento realizado na segunda quincena de setembro leva duplicando a xornada nas últimas semanas. Montes arrasados, hectáreas e hectáreas de arborado queimadas, aldeas ameazadas, casas ardidas, numerosos compañeiros feridos e o Conselleiro do Medio Rural atrévese a ir ao Parlamento no medio da campaña a dicir que era un bon ano e que ardera pouco. Non teñen vergoña.
Nota remitida aos medios
