O pasado 11 de xuño de 2012, en rolda de prensa, o Comité de Empresa de Traballo e Benestar denunciou a privatización de prazas nas residencias de maiores da Porta do Camiño e Volta do Castro en Compostela. Esta privatización implicará a eliminación de postos de traballo público e o despidimento de varias compañeiras e compañeiros interinos.

O Comité de Empresa denunciou publicamente a contratación de gardas de seguridade para suprir postos de ordenanzas. O seu presidente, José Manuel Viqueira, asegura que a dita externalización suporá un sobrecusto ao erario público xa que as prazas de persoal laboral que amortizan, e que fan as mesmas funcións, NON tiñan tanto custo como vai ter a empresa privada. O comite denuncia ademais que a sobre-explotación dos gardas de seguridade será o beneficio das contratas privadas co que se enriquecen as empresas beneficiadas pola política de privatizacións da conselleira Beatriz Mato e a sua secretaria xeral Cristina Ortiz.

O comité anunciou, ademais, que denunciará estas contratacións na Inspección de Traballo e solititará aos grupos parlamentares da oposición a comparecencia da consellería co fin de rendir contar destas privatizacións inxustificadas e máis costosas que os servizos públicos. Informa tamén de que as traballadoras e os traballadores despedidos e afectados polas privatizacións xa presentaron denuncia nos xulgados.