Novas por contido

Os días 13 e 14 de novembro tivemos Mesa Xeral de Negociación, Comisión de Persoal e unha xuntanza previa co director xeral de Función Pública, nas que tratamos asuntos relativos a concursos de traslados, procesos selectivos e máis. 

Concurso de traslados de corpos xerais

As bases da convocatoria levan xa meses aprobadas en Comisión de Persoal pero pendentes de publicación en DOG. Daquela manifestaramos o problema de desigualdade que xenera o feito de que algunha consellería non teña adaptada a RPT ás áreas funcionais. A DXFP propón agora unha modificación das bases para que a puntuación en méritos específicos por áreas funcionais sexa a correspondente coa RPT vixente no momento da publicación do baremo provisional (que prevén en 2/3 meses), e non a do fin de prazo de presentación de solicitude. Con este cambio podería dar tempo a actualizar as áreas funcionais nalgunha consellería. A CIG está en contra das áreas funcionais (non se aplica a postos base, e non aceptan a formación como alternativa), pero este cambio compensa parcialmente unha desigualdade, polo que votamos a favor do cambio.

A previsión que nos trasladan é publicar o concurso antes de rematar o mes de novembro. A semana que ven diranos a data concreta. O motivo do atraso estaría en que queren convocar simultaneamente os procesos selectivos de corpos xerais.

Reclamamos a inclusión dos postos de cultura creados na RPT aprobada na Comisión de Persoal do 14 de novembro.

 

Outros concursos de traslados

Persoal veterinario: enviarán borrador entre finais de novembro e primeiros de decembro.

Resto de Administración especial: Función pública di que se vai por cos borradores cando comecen os traballos co concurso xeral.

Persoal laboral: Negan a concurso de traslados previo a funcionarización. Nós seguimos coa teima da súa necesidade, xa que van pechar a moito persoal en escalas sen posibilidade logo de moverse como antes.

 

Procesos selectivos

Promoción interna e acceso libre a corpos xerais pendente de convocar: os borradores de promoción interna separada do acceso libre enviaránolos nuns días. No acceso libre que nos enviaron o día 13 (A1, A2, C1 e C2), e que tamén contiña promoción interna conxunta con acceso libre, din que foi un erro e só será acceso libre. Queremos lembrar que CCOO, UGT e Xunta comprometéronse no Acordo de concertación a incluír unha promoción interna separada do 40% nas Ofertas de Emprego dos anos 2019 e 2020. Os números non dan. En A1 e A2 de libre podería entrar exercicio de desenvolvemento de temas (din que sería unha excepción ao que pactaron no Acordo de concertación). Vamos, que seguimos sen criterio común nas bases de convocatorias, a bandazos segundo o caso, e con algúns sindicatos de aplaudidores.

Promoción interna corpos xerais actualmente en execución: darán información da súa previsión na vindeira Mesa Xeral.

Persoal subalterno e ordenanza (convocatoria 11/3/19), e auxiliar de clínica (convocatoria 21/2/19): o primeiro exercicio levará un atraso duns 3-4 meses máis.

Veterinarios/as (convocatoria 7/8/17): aínda non está claro como vai ser o seu destino. A intención do DXFP é dárllelo definitivo unha vez resolto o concurso de traslados (que aínda está sen convocar); din que a maioría son actuais interinos/as e en función diso estarían a valorar se darlles un destino provisional ou deixalos no posto en que están ata que se resolva o concurso. Para a CIG, haberá que atopar unha solución que conxugue o interese de quen non quera moverse do posto por uns meses e de quen quera comezar a traballar ou moverse de sitio. 

Veterinarios/as pendente de convocar: suprimiron temas, pero vemos que nalgún caso en realidade son fusións de temas. 

Biólogos/as: din que a convocatoria vai ser como outras de estabilización.

 

Máis asuntos tratados nas xuntanzas

Nas xuntanzas deses días tratáronse máis asuntos: RPT de Política Social e Cultura, modificación do decreto de listas e xubilación parcial anticipada.  Ir á nota informativa destes asuntos.

Outras novas recentes

Venres, 02 Mai 2025

Convocatoria do concurso de traslados de profesores e mestres de institutos marítimo-pesqueiros e axentes extensión pesqueira

No DOG do 02/05/2025 publican a RESOLUCIÓN do 28 de abril de 2025, da Dirección Xeral de Emprego Público e Administración de Persoal, pola que se convoca concurso ordinario para a provisión de postos de traballo vacantes de corpos e escalas de Administración especial da Administración xeral da Comunidade Autónoma de Galiza, escalas de profesores numerarios de institutos...
Luns, 05 Mai 2025

A Xunta non acepta a maioría das nosas alegacións para regular o acceso a postos de traballo de persoas con discapacidade intelectual

Na mesa xeral do día 05/05/2025, a CIG defendeu as alegacións ao Anteproxecto de Decreto polo que se regula o acceso e provisión de postos de traballo de persoas con discapacidade intelectual na Administración xeral da Comunidade Autónoma de Galicia e nas entidades públicas instrumentais do sector público autonómico. Concordamos coa necesidade de regulación que se expresa...
Martes, 06 Mai 2025

Proposta modificación servizos veterinarios (05/05/25)

Ante a negativa unánime por parte das catro organizacións sindicais asinantes do acordo, remitirán en breve unha nova proposta na que quedaron en incluír as melloras organizativas.O pasado día 05 de maio de 2025 fomos convocados pola Consellería e Sanidade para unha xuntanza na que abordamos a proposta de modificación do acordo para a ordenación e mellora da prestación de...