A nosa central sindical celebrou asembleas de persoas delegadas nas comarcas para analizar a situación socioeconómica e abordar as problemáticas laborais.
A CIG fixo este 11 de febreiro un chamamento a acumular forzas mediante a loita nas empresas e administracións e na rúa contra a precariedade e a desigualdade camiño do 8 e 10 de Marzo, datas nas que a central sindical aposta por unha importante mobilización da clase traballadora galega en demanda de traballo digno nunha Galiza con dereitos.
Precisamente con este obxectivo a CIG celebrou asembleas de persoas delegadas en todas as comarcas do país, na que tamén se analizou o actual contexto socioeconómico e se abordaron as principais problemáticas laborais.
Nas asembleas a CIG sinalou a importancia dunhas convocatorias que para o noso sindicato teñen unha especial significación polo que representan historicamente para o sindicalismo nacionalista galego, e que chegan nun momento de extensión da precariedade laboral e dos baixos salarios, especialmente entre as mulleres e a xente nova. Un intre no que asistimos, ademais, ao medre do fascismo da ultradereita, que se alimenta da aplicación de políticas neoliberais a través das últimas reformas laborais e dun diálogo social que o único que fai é lexitimar medidas que provocan o empobrecemento xeneralizado da poboación.
E todo isto nun contexto internacional no que o proceso de globalización neoliberal non ten límite na súa agresividade, impoñendo a guerra e o militarismo como arma para seguir acumulando riqueza, sen importarlle o mantemento dun sistema mundial inxusto baseado na desigualdade e no bloqueo a países como Cuba, na intervención directa noutros, como Venezuela, e nas ameazas, como no caso de Groenlandia ou Irán.
Fronte a todo isto, instamos a trasladar as alternativas aos centros de traballo e a animar á participación do maior número de persoas nas convocatorias do 8 e 10 de Marzo, porque só con loita e mobilización seremos quen de conquistar dereitos.
Medidas urxentes
As principais medidas urxentes que a CIG insiste en reclamar concrétanse en seis grandes actuacións: posta en marcha do Plan Galego de Creación de Traballo Digno e Industrialización, que faga posíbel unha transición enerxética galega xusta; a recuperación, ampliación e fortalecemento dos Servizos Públicos, que prioricen o benestar colectivo fronte aos intereses do capital; a aprobación dun Plan Galego pola Igualdade; un Sistema Público Galego de Servizos de Atención ás Persoas; vivenda digna e prohibición dos desafiuzamentos; e apertura dun proceso que supere o actual Estatuto de Autonomía en vigor, para que se recoñezan os dereitos nacionais da Galiza.
