Tres anos sen convocar a Comisión Técnica de Teletraballo: a Xunta segue permitindo recortes arbitrarios nas xornadas de teletraballo

Na Comisión de Persoal deste venres 6 de marzo de 2026 volvemos denunciar o incumprimento reiterado do Acordo de Teletraballo e a aparición de novas restricións arbitrarias que non teñen amparo na norma. A directora xeral de Emprego Público resposta, unha vez máis, que están preparando a Comisión Técnica, igual que leva facendo dende hai 2 anos.

En primeiro lugar, non se están remitindo á Comisión de Persoal os datos relativos ás persoas teletraballadoras, tal e como establece o propio Acordo. Esta información é imprescindible para poder facer o seguimento e control do sistema de teletraballo. Non enviala supón impedir a transparencia e a supervisión que lle corresponde á representación do persoal.

Estamos a comprobar como, nalgunhas consellarías, se están aplicando reducións de xornadas e interpretacións restritivas do teletraballo que non figuran no Acordo, reducindo dereitos e introducindo obstáculos sen ningunha xustificación real. Non necesitan reducir xornadas para aseguraren a presenza mínima, sénecesitan organización.

Non podemos aceptar que, mentres se fala de modernización da administración e de conciliación, se estea baleirando de contido o teletraballo mediante decisións discrecionais e criterios cambiantes.

No 2024 dende a CIG interpuxemos unha demanda xudicial contra a Xunta para facer valer os dereitos previstos no Acordo de Teletraballo. Porén, estamos ainda endentes de data de xuízo.

 Problemas detectados na aplicación do teletraballo

Nos últimos meses detectamos diferentes prácticas, entre as que se atopan as seguintes:

Redución unilateral dos días de teletraballo

• Nalgúns servizos estase intentando reducir os días de teletraballo ao rematar o período anual, obrigando a presentar novas solicitudes ou recortando días baixo supostas “necesidades do servizo” que nin se explican nin se xustifican.
  Cómpre lembrar que o acordo establece que o teletraballo debe renovarse nas mesmas condicións se non cambiaron as circunstancias. Polo tanto, non se poden introducir restricións nin recortes sen unha motivación real e debidamente xustificada.

 Restricións arbitrarias en determinados días da semana

• Determinadas secretarías xerais de consellarías están limitando días como os luns ou os venres, xerando a sospeita de que o persoal empregado público utiliza o teletraballo para alongar as fins de semana. Esta insinuación, ademais de ser infundada, supón unha falla de respecto cara ao persoal empregado público.
  Resulta, ademais, contraditorio que se pretendan limitar precisamente estes días, cando son os que adoitan rexistrar maiores problemas de mobilidade. Desde unha lóxica organizativa e ambiental, deberían ser precisamente os días nos que máis se favoreza o teletraballo para evitar incrementar a presión sobre uns servizos de transporte xa de por si saturados.

 Exixencia de xustificar tarefas tamén nos días presenciais

• Algúns servizos están a pedir que se xustifique o traballo realizado, mesmo nos días presenciais, o que constitúe un agravio comparativo. Isto contradí directamente o Acordo, que establece que debe existir un plan individual de teletraballo para os días en que se realiza nesta modalidade.

Preguiza das xefaturas para elaborar os plans de teletraballo 

• O que está a ocorrer é que, como moitos servizos non elaboraron ese plan individual, pretenden trasladar ás persoas traballadoras a responsabilidade de xustificar toda a súa actividade, ou directamente denegan o teletraballo para non pasar o traballo de facer o correspondente seguimento.

 Confusión entre a potestade de autoorganización da Administración e arbitrariedade

• Algunhas destas decisións estanse a tomar con base na potestade autoorganizativa, pero ten que estar sempre motivada e xustificada. O que estamos a ver, na práctica, son arbitrariedades.
  Curiosamente, cando pedimos que todas estas decisións se poñan por escrito, moitas veces desaparecen as dúbidas e as limitacións deixan de aplicarse. Non é difícil entender por que.

Dende a CIG invitámosche a que leas o Acordo, a que pidas explicacións, a que te unas e a que non te conformes co que diga a túa xefatura de servizo.

Podes seguir teletraballando os luns e os venres. Só tes que xustificar os días que teletraballes. Non te conformes coas reducións do teletraballo se non cambiaron as circunstancias.

E sobre todo, calquera cousa que queiran cambiar neste senso QUE A COMUNIQUEN POR ESCRITO, nunca verbalmente, nin mediante un correo electrónico ambiguo, senón mediante unha instrución ou unha resolución oficial. Se non o fan así, a súa palabra non ten ningún valor.

Por parte da CIG, coma sempre, daremos a batalla, e para iso precisamos da túa colaboración. Cóntanos como está a ser o teletraballo no teu departamento.