A CIG, hai xa dez anos, que logramos a protección das traballadoras embarazadas das escolas infantís do Consorcio, fronte o risco biolóxico no embarazo, tras unha sentenza dun xulgado do social de Vigo, ratificada polo TSXG.

Non foi doada a aplicación plena da sentenza e a implementación dun protocolo que protexera as traballadoras embarazadas dende o momento que comunicaban a situación de embarazo. Despois de inxentes xestións e denuncias ante a autoridade laboral conseguiuse que se fixera a declaración de postos exentos de riscos para o embarazo, concluíndo que non hai ningún posto sen risco nas escolas infantís porque a natureza do risco está nas propias crianzas usuarias.

Segundo as directrices para a avaliación de riscos e protección da maternidade no traballo impartidas polo Instituto Nacional de Seguridade e Hixiene no Traballo (INSHT), tratándose de CMV están contraindicadas as probas de detección precoz de anticorpos nas traballadoras embarazadas, sendo aconsellable limitar ao máximo o contacto con fluídos biolóxicos no embarazo no caso de seronegatividade mentres que no caso contrario non está garantida a protección fronte á reinfección ou reactivación da infección. Non existe vacinación, asociándose a infección do feto de consecuencias graves coa infección materna.

Tarefas como cambio de cueiros, dar de comer, consolar e calquera outra exposición a fluídos expón ao contaxio á traballadora embarazada.

Tras a denuncia en inspección de traballo, a Consellería séntase a falar coa Mutua e a Dirección Xeral de Emprego Público para darlle saída a esta situación, que pon en risco a saúde das traballadoras das escolas infantís da Axencia Galega de Servizos Sociais e da súa descendencia. Nas mesmas condicións de exposición a un risco de natureza biolóxica, as traballadoras do Consorcio están protexidas e as demais non.

No Comité de Seguridade e Saúde Laboral, trasládannos que están dando os pasos iniciais e que terán que resolverse nos vindeiros días para renderlle contas á inspección de traballo a través dun protocolo único para todas as escolas infantís (Consorcio e Axencia).

A CIG cos dereitos das mulleres!!

Se necesitas axuda, ponte en contacto coa CIG